Հայ ժողովուրդը հաղթեց, որովհետև հույսը դրեց իր վրա. Փաշինյանի ելույթը՝ Սարդարապատում

Սարդարապատում ՀՀ վարչապետ Նիկոլ Փաշինյանը ընդունել է  «Հաղթանակի դար» խորագրով զինվորական շքերթը, որից հետո հանդես է եկել ելույթով:

Վարչապետը շնորհավորել է Առաջին հանրապետության 100-րդ տարեդարձի կապակցությամբ և նշել, որ առաջին անգամ 100 տարի առաջ հայ ժողովուրդը ունեցավ պետություն, որտեղ իշխանությունը պատկանում է իրեն:

«100 տարի առաջ այս օրը՝ 1918թ. մայիսի 28-ին, հայ ժողովրդի պատմության մեջ տեղի ունեցավ աննախադեպ մի իրադարձություն: Մեր իրականության մեջ առաջին անգամ հիմնադրվեց պետություն, որտեղ իշխանությունը պատկանում է ժողովրդին, քաղաքացիներին, այդ պատճառով այդ պետությունը կոչվեց հանարապետթյուն` Հայաստանի Հանրապետություն: Իր պատմության մեջ առաջին անգամ հայ ժողովուրդը ոչ  թե հպատակ էր, այլ քաղաքացի, ոչ թե ծառա էր, այլ տեր: Այս կարգավիճակը նվաճեց քրտինքով ու արյունով»,- ասել է վարչապետը:

Իր ելույթում վարչապետն անդրադարձել է նաև հայ ժողովրդի տարած վերջին հաղթանակին՝ թավշյա հեղափոխությանը՝ նշելով, որ որքան անհավանական էր 1918-ի հաղթանակը, նույնքան էլ անհնարին էր թավշյա հեղափոխությունը, սակայն հայ ժողովուրդը հաղթեց, որովհետև հույսը դրեց իր և ոչ թե ուրիշի վրա, հաղթեց, որովհետև ուզում էր հաղթել:

«Աներևակայելի է, թե ինչպես ցեղասպանության ենթարկված, սրի քաշված հայ ժողովուրդը կարողացավ հաղթել թուրքական բանակին, արդյո՞ք կային սոցիալ-տնտեսական, ռազմաքաղաքական նախադրյալներ: Ո՛չ, չկային: Սառը հաշվարկի տեսակետից հայ ժողովուրդը չուներ հաղթելու շանս, բայց հաղթեցինք, որովհետև հասկացանք, որ մեր երակներով հոսում է Մաշտոցի արյունը, Արտաշես արքայի արյունը, Վարդան Մամիկոնյանի արյունը:

Հայը հաղթեց, որովհետև իր պատմության  վերջին 400 տարում առաջին անգամ հույսը դրեց ինքն իր վրա, հաղթեց, որովհետև հասկացավ, որ ազգային պետությունն է ինքնության միակ երաշխիքը: Հաղթեց և դրանից հետո հաղթել է բոլոր այն դեպքերում, երբ որոշել է, որ պետք է հաղթի, երբ հավատացել է իր բազկին, ներկային ու ապագային: Սա է մեր ժողովրդի հաղթանակի բանաձևը:

Սարդարապատից 100 տարի անց էլ հայ ժողովուրդը հերթական փառահեղ հաղթանակը տարավ, որովհետև հերթական անգամ հույսը դրեց իր վրա, հավատաց իրեն, վստահեց ուժերին և ապագային»,- ասաց վարչապետը: