Ոնց որ ես հիմա հանցանք գործեմ, հետո ասեմ՝ ինձ հետապնդում են. Արարատ Միրզոյանը՝ Հրայր Թովմասյանի մասին

ԱԺ նախագահ Արարատ Միրզոյանն այսօր լրագրողների հետ զրույցում անդրադարձել է ՍԴ նախագահ Հրայր Թովմասյանի նկատմամբ հարուցված քրգործին: Թովմասյանի հայտարարությանը, թե իր նկատմամբ «քաղաքական հետապնդում» է իրականացվում, Միրզոյանն արձագանքել է.

«Չգիտեմ՝ ինչի մասին է խոսքը: Հրայր Թովմասյանի կամ որևէ այլ անձի երբևէ կատարած առերևույթ կամ իրեն մեղսագրվող հանցագործությունը, օրենքի խախտումը կապ չունի այս պահին կամ նախկինում զբաղեցրած որևէ պաշտոնի հետ»:

Լրատվամիջոցների հրապարակած տեղեկությանը, թե Թովմասյանի արտաամուսնական կապերի մասին տեղեկություններ են հավաքվում, Միրզոյանը չի ցանկացել արձագանքել.

«Եկել եք, անհեթեթությունների մասին հարցեր եք տալիս, ես էդքան ժամանակ չունեմ՝ մտացածին բաներ մեկնաբանեմ»:

ԱԺ նախագահը դարձյալ պնդել է՝ ՍԴ ճգնաժամը հանգուցալուծում չի ստացել: Միրզոյանը Թովմասյանին տեսել է սուրբծննդյան տոներին՝ պատարագի ժամանակ: Հարցին՝ երբ հանդիպեցին, ՍԴ նախագահն իր մտահոգությունները փոխանցե՞ց նրան, Միրզոյանը պատասխանել է.

«Չէ: Մենք մեկ-երկու կատակ արեցինք»:

ԱԺ նախագահը վստահեցրել է՝ Թովմասյանի նկատմամբ հարուցված քրգործը հնարավոր չէ ներկայացնել որպես քաղաքական հետապնդում:

«Ոնց որ ես հիմա որևէ հանցանք գործեմ, հետո, երբ մեր իշխանությունը փոխվի ժողովրդի որոշմամբ, նոր իշխանությունը, իրավապահ համակարգը սկսի հետազոտել իմ որևէ հանցագործություն, ես ասեմ՝ ա՛յ, քանի որ զբաղեցրել եմ քաղաքական պաշտոն, ինձ հետապնդում են: Եկեք՝ երկու երևույթներն իրար հետ չխառնենք: Էնպես չի, որ մենք քնում-զարթնում ենք հենց էս խնդրի մասին միայն մտածելով, և մեր գերնպատակն է Հրայր Թովմասյանին հեռացնել ՍԴ-ից»,- նշել է նա:

Միրզոյանը վստահեցրել է՝ եթե անգամ Հրայր Թովմասյանը հրաժարական տար, քրեական գործը լինելու էր:

«Եթե իրավապահներն այս նույն ճանապարհով գնային, բացահայտումներ անելու էին: Եկեք՝ մեկընդմիշտ արձանագրենք՝ քրեական գործը պայմանավորված չէ իր պաշտոնավարմամբ»,- ասել է նա:

Լրագրողները Միրզոյանին հարց են ուղղել՝ ԱԱԾ նախկին պետ Արթուր Վանեցյանը «քաղաքական հակառակո՞րդ» է: Միրզոյանը բացասական պատասխան է տվել:

Մարիամ Փաշինյան-Արթուր Վանեցյան հեռակա բանավեճն ԱԺ նախագահը որևէ կերպ չի ցանկացել մեկնաբանել:

«Կենցաղային խոսակցություն է»,- ասել է Միրզոյանը: