Ի՞նչ խախտումներ են արձանագրվել Արցախի համապետական ընտրություններին․ Դանիել Իոաննիսյանը մանրամասներ է հայտնել

«Իրազեկ քաղաքացիների միավորում» հասարակական կազմակերպության Ստեփանակերտի գրասենյակը ԱՀ համապետական ընտրությունների օրը՝ մարտի 31-ին, իրականացրել է կարճաժամկետ դիտորդական առաքելություն՝ ԱՀ-ում ձևավորված 281 տեղամասերում և Երևանում տեղակայված տեղամասում։

«Մենք դիտարկել ենք ընդհանուր առմամբ 49 տեղամաս, որից մեկը հենց Երևանում տեղակայված տեղամասն է եղել։ Ունեցել ենք 98 տեղամասային և 8 տարածքային դիտորդներ։ Արցախի Հանրապետության բոլոր շրջաններում իրականացրել ենք տարածքային ընտրական հանձնաժողովների դիտարկում։ Եվս 18 դիտորդներ շրջիկ խմբերով՝ երկուական դիտորդներով, շրջել են բոլոր շրջաններում։

Ամփոփելով բոլոր թվերը՝  ասեմ, որ իրականացրել ենք 49 տեղամասային դիտարկում, 8 տարածքային ընտրական հանձնաժողովի դիտարկում և 9 շրջիկ խմբերի դիտարկում։

«Կարճաժամկետ առաքելության» մեր թիմը բաղկացած է եղել 9 իրավաբանից, 9 մուտքագրողից, մեդիա մոնիթորինգի 5 մասնագետից, 25 վարչական աշխատողից և, ընդհանուր առմամբ, 113 դիտորդից»,- հրավիրված ասուլիսում հայտնեց «Կարճաժամկետ առաքելության» ղեկավար Հերմինե Գասպարյանը։

«Իրազեկ քաղաքացիների միավորում» ՀԿ հիմնադիր, ծրագրերի համակարգող Դանիել Իոաննիսյանն էլ խոսեց այն խախտումների մասին, որոնք արձանագրվել են մարտի 31-ին և դրան հաջորդող օրը՝ դիտորդական առաքելության ընթացքում։

«Տեղամասերից 3-ի տարածքը բավարար չէր քվեարկության բնականոն ընթացքի իրականացման համար։ Տեղամասերից 16-ում եղել են դրա իրավունքը չունեցող անձինք։

13 տեղամասում եղել են դեպքեր, որ այլ անձ գտնվի քվեարկության խցիկում, ընդ որում, «այլ անձ» ասելով մենք ոչ մի կերպ չենք հասկանում օրենքով սահմանված կարգով օգնողին կամ երեխաներին, որոշ տեղամասերում այդ «այլ անձի» կողմից գտնվելը դիտորդի կողմից հստակ գնահատվել է որպես վերահսկողական բնույթ կրող։

15 տեղամասում եղել են վստահված անձինք և հանձնաժողովի անդամներ, որոնք չեն կրել համապատասխան վկայական, 12 տեղամասում խախտումները գրանցամատյանում չեն գրանցվել, քվեարկության մասին բարձրաձայնելու դեպքեր գրանցվել են 9 տեղամասում, քվեախցիկից դուրս քվեարկելու դեպքեր եղել են դիտարկված տեղամասերից 40-ում, այսինքն՝ 80 տոկոսում դիտորդները նման դեպքեր տեսել են, ընդ որում, դիտորդները հաշվարկել են 700 նման դեպք, որոնք հիմնականում եղել են տարեցների կողմից։

2 տեղամասում գրանցվել է քվեաթերթիկը դուրս հանելու փորձ, ընդ որում, մեկում ընտրողը փորձել է քվեաթերթիկը դուրս տանել այն բանից հետո, երբ հանձնաժողովի նախագահն արգելել է լուսանկարել քվեաթերթիկը։

Դիտարկված 9 տեղամասերից շուրջ 20 տոկոսում դիտորդները արձանագրել են ընտրողի կողմից սեփական քվեաթերթիկը լուսանկարելու դեպքեր»,- ասաց Դանիել Իոաննիսյանը։