Հերքում եմ տեղեկությունը, թե ջերմաչափում իրականացրել է մեկ անձ. Լիանա Եղիազարյան

Օրեր առաջ SHANTNEWS.am-ը հայտնել էր, որ  ժամը 18.00-ին, «Զվարթնոց» օդանավակայանում վայրէջք կատարած ինքնաթիռի ուղևորները վիճել են իրենց դիմավորող անձնակազմի անդամների հետ։ Բանն այն է, որ օդանավակայանում ջերմաչափումն իրականացրել է միայն մեկ աշխատակից: Ականատեսներից մեկի խոսքերով՝ թուղթ լրացնողներից ոմանք գրիչ չեն ունեցել, հետո բերել են գրիչներ:

«Թուղթ լրացնողները երեքն էին, ջերմաչափողը՝ մեկը»,- SHANTNEWS.am-ին հայտնել է ուղևորներից մեկը

ՀՀ ԱԱՏՄ իրազեկման, խորհրդատվության և հանրության հետ աշխատանքի բաժնի պետ Լիանա Եղիազարյանն այսօր  մեկնաբանություն է ներկայացրել հրապարակման վերաբերյալ.

«Այս առումով նախ հերքում եմ տեղեկությունը, թե ջերմաչափում իրականացրել է մեկ անձ։ Շեշտում եմ հերթական անգամ՝ ողջ ուղևորահոսքը, մինչ անձնագրային ստուգման կետ հասնելը, վերևում արդեն անցնում է ջերմաչափում 2 սարքով միաժամանակ, ինչը հաճախ աննկատ է մնում, քանի որ ջերմաչափումը հեռավար է ու ավտոմատ՝ 3-5 մետր հեռավորությունից հերթապահ հիգիենիստների հսկողությամբ։

Տեսանյութի նկարահանման պահին միաժամանակ ժամանել է երկու ինքնաթիռ, ու դրանց ուղևորները միմյանցից անջատ են սպասարկվել։ Իսկ հերթը եղել է այն պատճառով, որ մարդկանց ինքնաթիռում ավիաընկերության կողմից չեն բաժանվել հասցեական քարտեր։ Որոշ լոուքոսթերներ չեն հետևում Քաղավիացիայի հորդորին՝ բաժանել դրանք ինքնաթիռում, ինչը կօգնի ժամանակ խնայել։

Այնինչ՝ հասցեական քարտերի լրացումը պարտադիր է ու անչափ կարևոր երկիր մուտք գործողների առողջական հետագա վիճակը հսկելու, հնարավոր վարակվածների կոնտակտավորներին գտնելու առումով։ Իսկ արդեն անձնագրային ստուգման կետի մոտ, ուժեղացված վերահսկողական աշխատանքի շրջանակում, իրականացվել է կրկնակի ջերմաչափում հասցեական քարտեր ու ինքնամեկուսացման ծանուցագրեր ստուգող հսկիչի կողմից։ Դրանք տրվում են 42 երկրից, այդ թվում՝ Ռուսաստանից վերադարձողներին։ Ի դեպ, ուղևորահոսքին դիմակներ բաժանելու գործառույթ ԱԱՏՄ-ն չունի, իսկ տեսանյութում աղմկող անձին, ով հայտարարել է, թե վատ է զգում, առաջարկել են հերթից դուրս գալ ու առանձին ստուգում անցնել, ինչից նա հրաժարվել է»,- ասել է Լիանա Եղիազարյանը: