Սրանից 50 տարի հետո էլ սրանից լավ խորհրդարան չի կազմավորվելու. հիշում են ԳԽ պատգամավորները. այսօր լրանում է ԳԽ 30-ամյակը

Գերագույն խորհրդի կազմավորման 30-րդ տարեդարձի առիթով այսօր քննարկում է տեղի ունեցել «Գերագույն խորհրդի պատմաքաղաքական դերն ու նշանակությունը և պառլամենտարիզմի խնդիրները Հայաստանում» թեմայով:

Քննարկմանը մասնակցել են ԳԽ պատգամավորներ Խոսրով Հարությունյանը, Սուրեն Զոլյանը, Կիմ Բալայանը, Գևորգ Բաղդասարյանն ու Ազատ Արշակյանը:

«Ցավում եմ, որ առ այսօր թեˊ քաղաքագիտական, թեˊ պատմագիտական հանրությունը լուրջ վերլուծության չի ենթարկել Գերագույն խորհրդի պատմական-քաղաքական դերակատարումը, որովհետև ես կարծում եմ, որ 90-ականների սկզբին անցնում էինք մեր պատմական զարգացման ամենապատասխանատու, նույնիսկ ամենաբարդ փուլը»,- ասաց Խոսրով Հարությունյանը:

Նրա խոսքերով՝ պատմական զարգացումների բերումով մենք հայտնվել էինք հեղափոխական փոփոխություններ կատարելու անխուսափելի անհրաժեշտության առջև: Մեծ իմաստով, խոսքը գնում էր լուրջ անցումային մի փուլի մասին, երբ պատմականորեն պարտադրված իրադարձությունների արդյունքում անցում էր կատարվելու տոտալիտար կամ արտադրված տնտեսական,  քաղաքական համակարգից դեպի ազատական ու կայուն տնտեսության համակարգին:

«Սա իրական հեղափոխական շրջան էր և բոլոր հետխորհրդային ժողովուրդները ապրում էին այդ փուլը: Ես կարծում եմ, որ ԳԽ պատմական առաքելությունը կայանում էր հենց այդ անցումը հնարավորինս անցնցում ապահովելու մեջ: Խոսքը նոր պետական ինստիտուտների, քաղաքական ավանդույթի ձևավորման մասին է և կարևոր էր հանրության արձագանքն այդ փոփոխություններին»,- ընդգծեց Խոսրով Հարությունյանը:

ԳԽ պատգամավոր Ազատ Արշակյանն էլ իր խոսքում նշեց, որ հանրության առաջին խնդիրն էր գնահատական տալ անկախություն հռչակած ԳԽ պատգամավորներին:

«Անձամբ ես մեդալ ու պատվոգիր չեմ ուզում, բայց պետք էր գնահատական տալ ինստիտուտին: Արցախը ազատագրել է հենց այդ իշխանությունը: Օրինակելի խորհրդարանը նա էր, օրինակելի ԱԺ էր, որտեղ կային բազմակարծություն, վեճեր և կառուցողական գործընկերություն: Ցավալի էր, որ չտվեցին գնահատական»,- ասաց Արշակյանը:

Կիմ Բալայանն էլ մի դրվագ հիշեց.

«Ջղայնացած ասեցի «էˊս այլանդակները որտեղի՞ց են մտել»: Ջինսերով ու պատառոտած շորերով եկել էին նիստի, բայց ինձ ասացին, որ պարո՛ն Բալայան, հավաստիացնում եմ, որ սրանից 50 տարի հետո էլ սրանից լավ խորհրդարան չի կազմավորվելու: Սա ամենալավ խորհրդարանն է և փորձը ցույց տվեց, որ այս 30 տարվա մեջ ԳԽ-ին անցնող խորհրդարան չի եղել»: