Ես իմ տղուն թողել եմ տանը ու գնացել եմ Ամուլսարի պոստեր. Անի Խաչատրյան

Այսօր շարունակվել է «Ջերմուկցիներն ընդդեմ Տիգրան Ավինյանի» քաղաքացիական հայցով գործի քննությունը Դանիել Մխեյանի նախագահությամբ:

Դատարան էր եկել «Հայկական բնապահպանական ճակատի» անդամ, հայցվոր Անի Խաչատրյանը: Նա պատմեց, որ իրենք պայքարել են Ամուլսարը հանքի չվերածելու դեմ, վերջին 2 տարվա ընթացքում այդ պայքարն ավելի ակտիվացել է: Իրենք ֆինանսավորվում են անհատներից և կազմակերպություններից, և իրենք իրենց ծախսերի մասին հաշվետվություն են ներկայացնում «Հայկական բնապհպանական ճակատի» ֆեյսբուքյան էջում:

Պաշտպանի հարցին թե արդյո՞ք ծախսել են այդ  գումարները անձնական նպատակներով, Անի Խաչատրյանն ասաց.

«Եթե ծախսեինք անձնական նպատակներով, մարդիկ այլևս մեզ չէին վստահի և փոխանցումներ չէին անի: Մեզ մոտ ամեն ինչ թափանցիկ է, մենք կամավորներ ենք: Չկա այնպիսի բարձր աշխատավարձ, հանուն որի կանեի այնքան գործ, որքան անում եմ: Օրը 24 ժամ մենք էս գործի մեջ ենք: Ես իմ տղուն թողել եմ տանը ու գնացել եմ Ամուլսարի պոստեր ու օրերով մնացել: Բնությունը պաշտպանելն իմ պարտքն է, որը ես վերադարձնում եմ»:

Նոյեմբերի 25-ին բնապահպաններն ու Ջերմուկի մի քանի բնակիչներ դատական հայց են ներկայացրել փոխվարչապետ Տիգրան Ավինյանի դեմ՝ պահանջելով հերքել զրպարտություն համարվող տվյալները:

Հիշեցնենք՝ հոկտեմբերի 22-ին ՀՀ փոխվարչապետ Տիգրան Ավինյանը Թբիլիսիում գտնվելու ընթացքում արել էր մի հայտարարություն, ըստ որի՝ «կան մարդիկ, որոնք ուղղակիորեն կապված են ՀՀ տարածքում հանքարդյունաբերական ոլորտի գործարարների հետ, որոնք բավական լուրջ ֆինանսական միջոցներ էին ներդնում, որպեսզի այս (խմբ.՝ Ամուլսարի) արշավը կազմակերպվի»:

Այս հայտարարությանը հետևել են բնապահպանների և ակտիվիստների կողմից Տիգրան Ավինյանին ուղղված նամակները, թե արդյո՞ք իրենց է նկատի ունեցել իր հայտարարության մեջ:

Նոյեմբերի 25-ին «Հայկական բնապահպանական ճակատ» նախաձեռնության անդամներից երկուսը Ավինյանի գրասենյակից ստացել էին իրենց հարցումների պատասխանները, որտեղ նշված էր, թե փոխվարչապետի կողմից Թբիլիսիում Ամուլսարի պայքարի մասին հնչեցրած մտքերի վերաբերյալ հավելյալ մեկնաբանություններ առկա չեն:

Սրան էլ արդեն հետևել է քաղաքացիների կողմից դատական հայցի ներկայացումը: Փոխվարչապետի դեմ հայց ներկայացրած քաղաքացիները 15-ն են՝ Թեհմինե Ենոքյանը, Անի Խաչատրյանը, Արթուր Գրիգորյանը, Լևոն Գալստյանը, Արկադի Գրիգորյանը, Միհրդատ Ներսիսյանը, Գագիկ Գրիգորյանը, Թեհմինե Հունանյանը, Սուսաննա Մարգարյանը, Հենրի Հարությունյանը, Ասքանազ Հովհաննիսյանը, Բորիս Խաչատրյանը, Գոռ Այվազյանը, Աննա Շահնազարյանը և Միլենա Բաղդասարյանը: