Հանքավայրերի մասնատումը պետք է բացառել. գործադիրը հավանություն է տվել «ՀՀ ընդերքի մասին» օրենսգրքում և հարակից օրենքներում փոփոխություններ կատարելու նախագծին

Կառավարությունն այսօր հավանություն է տվել «ՀՀ ընդերքի մասին» օրենսգրքում և հարակից օրենքներում փոփոխություններ կատարելու նախագծի փաթեթին: Նախագիծը ներկայացրել է տարածքային կառավարման և ենթակառուցվածքների նախարար Սուրեն Պապիկյանը, նշելով բավականին լայն և կարևոր հարցեր են ընդգրկված: Այն նպատակ ունի ընդերքի ռացիոնալ և արդյունավետ օգտագործելու նպատակներ են և հարցեր, որոնք մեկ տարվա ընթացքում գրավել են ուշադրությունը: Հիմա փորձում են սրանց համար ինստիտուցիոնալ լուծումներ գտնել:

«Առաջարկվում է  ընդերքի ռացիոնալ օգտագործման նպատակով հնարավորինս բացառել հանքավայրերի մասնատումը և պաշարները տրամադրել ողջ հաշվեկշռային ծավալով: Նախկինում եղել են դեպքեր, երբ հաստատված պաշարը բաժանվել է մի քանի մասերի, ինչը հնարավորություն է տալիս բարձր արդյունավետություն ունեցող հատվածներն օգտագործել, իսկ ավելի ցածր տոկոսայնություն ունեցողները թողնել, այսպիսի բաները այս նախագծով կբացառվեն»,- ասաց նախարարը:

Նախարարը նշեց, որ արդյունահանման թույլտվություններ կտրամադրվեն միայն այն հանքավայրերի դեպքում, որտեղ մետաղականի համար վերջին 5 տարիներին գնահատվել և հաստատվել են պաշարներ, իսկ ոչ մետաղականի դեպքում` վերջին 10 տարվա ընթացքում:

«Սա արվում է այն նպատակով, որ յուրաքանչյուր գործարար, ով իսկապես ցանկանում է ներդրում կատարել և արդյունավետ շահագործում իրականացնել, նախ իրականացնի համապատասխան ուսումնասիրություն, քանի որ ՀՀ-ում վերջին ուսումնասիրությունները կատարվել են 1950-ական թվականներին: Մենք ամենևին չենք ասում, որ ուսումնասիրությունները սխալ են, բայց արդի աշխարհում դրանք թարմացման կարիք ունեն»,- ընդգծեց Պապիկյանը:

Մեկ այլ փոփոխությամբ՝ գործող իրավունքի տրամադրման 50 տարի առավելագույն ժամկետը փոխել 25 տարվա, իսկ ոչ մետաղականների համար՝ 15 տարվա ժամկետով:

«Մշտապես գերատեսչության ղեկավարի, այսինքն՝ իմ կողմից հաստատվում են 50 տարով թույլտվություններ, որ համարում ենք ճիշտ չէ, և անհրաժեշտության դեպքում ժամկետը կարելի է  երկարացնել և սահմանել ավելի ցածր ժամկետ: Առաջարկում ենք նաև ընդերքօգտագործման գրավադրումն իրականացնել ոչ թե տեղեկացմամբ, այլ նախապես համաձայնության ստացման ընթացակարգով, իսկ համաձայնություն կտրվի այն դեպքում, եթե գրավի հիմքով ձեռք բերված փոխառությունն օգտագործվի տվյալ հանքավայրերի շահագործման և ընդերքօգտագործողի պարտավորությունների իրականացման նպատակով»,- նշեց նախարարը:

Նա ընդգծեց նաև, որ սահմանվում է, որ եթե տեսչական մարմնի եզրակացության հիման վրա որոշում է կայացվում կասեցնել հանքի գործունեությունը, իսկ սեփականատերը դիմում է դատարան, հանքը մնում է կասեցված, մինչև դատարանի որոշումը: