Ի՞նչն է խանգարում և ի՞նչն է թույլ տալիս դիմել ՍԴ. ԼՀԿ ներկայացուցիչների մեկնաբանությունները

ՀՀ ԱԺ «Լուսավոր Հայաստան» խմբակցության ղեկավար Էդմոն Մարուքյանն ու անդամ Տարոն Սիմոնյանն այսօր խորհրդարանում կազմակերպված ասուլիսի ժամանակ անդրադարձել են սահմանադրական փոփոխություններին: Էդմոն Մարուքյանը նշել է, որ Սահմանադրությունն ասպատակության է ենթարկվել: Տարոն Սիմոնյանն էլ մանրամասնել է, թե որոնք են խախտումները, ու ինչ հիմքերով է հնարավոր դիմել ՍԴ։

«Միջին իրավաբանական գիտելիքներ ունեցող ՀՀ յուրաքանչյուր քաղաքացու համար պարզ էր, որ այն բոլոր գործողությունները, որոնք կատարվեցին, դրանք ի խախտումն ՀՀ սահմանադրության էին: Այդ խախատումները մի քանի ուղղությամբ են տեղի ունեցել: Առաջին խախտումն այն է, որ սահմանադրական փոփոխությունները, երբ որ ընդունվում են ԱԺ-ի կողմից, մինչև ընդունվելն անպայմանորեն պետք է ուղարկվեն ՍԴ՝ եզրակացության համար: «ԱԺ կանոնակարգ» օրենքի 86-րդ հոդվածը տալիս է ընթացակարգ, թե ինչպես պետք է տեղի ունենա ՍԴ դիմելը։ Այլ կերպ է մեկնաբանվել քաղաքական իշխանության ներկայացուցիչների կողմից, և այդ մեկնաբանության արդյունքում խախտվել է Սահմանադրության 169-րդ հոդվածի 2-րդ մասը: Մյուս խախտումն այն է, որ հանրապետության նախագահին զրկել են սահմանադրական փոփոխությունները ստորագելու և հրապարակելու իրավունքից:  ԱԺ մեկ խմբակցությունը, ինչքան էլ որ այն մեծ լինի,  մեկ այլ սահմանադրական մարմնի լիազորություն է որպես այդպիսին ի չիք դարձրել, ինչը ևս ՀՀ օրենսդրության և Սահմանադրության խախտում է», – ասել է Սիմոնյանը՝ հիշեցնելով ՀՀ սահմանադրության ընձեռած այն հնարավորության մասին, ըստ որի՝ պատգամավորների 1/5-ը կարող է դիմել ՍԴ:

Ըստ Տարոն Սիմոնյանի հիմքերը մի քանիսին են.

«Հիմքերից մեկն ԱԺ որոշումների, ենթաօրենսդրական ակտերի սահմանադրականության վիճարկումն է: Այս հիմքով վիճարկվելու են «ԱԺ կանոնակարգ» օրենքի համապատասխան փոփոխությունները, որով նախագահին զրկել են իր լիազորություններից: Մեկ այլ հիմքը, որն էլի սահմանված է ՀՀ սահմանադրությամբ և ՍԴ մասին օրենքով՝ սահմանադրական մարմինների լիազորությունների շուրջ առաջացած վեճն է: Արդյո՞ք ԱԺ-ն իրավունք ուներ չդիմել ՍԴ, թե՞ ոչ: Այս հարցերի պատասխանը տվող միակ մարմինը ՍԴ-ն է»։

Պատգամավորը  հիշեցրել է, որ հանրության կողմից հարց է բարձրացվել, թե պետք է սահմանադրական փոփոխությունների սահմանադրականությունը վիճարկել ՍԴ-ում: Բայց, պետք է նշել, որ չի կարող պատգամավորների 1/5-ով վիճարկվել ՍԴ-ում, որովհետև սահմանադիրն այն ժամանակ այս դրույթը գրել է այն կանխավարկածով, որ ԱԺ-ն ինքը պարտավոր է դիմել ՍԴ՝ սահմանադրական հարցը որոշելու համար.

«Հետևաբար, այս հարցով չեն կարող դիմել ՍԴ, բայց կարող ենք այն հարցերով, որոնք որ ես նշեցի արդեն: Սա, որպես այդպիսին, իրավաբանական տարրական գիտելիքների արդյունք պետք է լիներ, չեմ կարծում, որ շատ խորը գիտելիքներ պետք է ունենաս այս բնագավառում, որ այս ամեն ինչը հասկանաս: Հետևաբար, եթե մեր քաղաքական գործընկերներն այս ամեն ինչն անտեսում են, ապա ես հիմքեր ունեմ կասկածելու, որ նրանք կա՛մ գիտակցված կեղծավորությամբ խեղաթյուրում են սահմանադրական պահանջները, կա՛մ էլ հասարակությանը և հատկապես այն հատվածին, որը հավատարիմ, ամեն գնով ցանկանում է հավատալ իշխանության խոսքին, այսպես կոչված՝ ազնիվ տգիտության քարոզ են իրականացնում իրավաբանական գիտելիքներն իջեցնելով զրոյական մակարդակի, ինչն անթույլատրելի է», – ավելացրել է Սիմոնյանը։