Մարմաշենում սպանված երիտասարդի ընտանիքի փաստաբաններն գործի՝ իրենց հետաքննությունն են սկսել

Վահրամաբերդ ու Մարմաշեն գյուղերի երիտասարդների միջև ծագած վեճի հետևանքով սպանված 21-ամյա բնակչի ընտանիքի փաստաբաններն իրենց հետաքննությունն են սկսել: Այս մասին այսօր հայտնել են փաստաբանները և սպանված երիտասարդի քույրը, որը ճանաչվել է տուժողի իրավահաջորդ:

Հիշեցնենք, որ դեպքը տեղի է ունեցել մայիսի 27-ին: Մարմաշեն և Վահրամաբերդ գյուղերի երիտասարդների միջև վեճ է ծագել ֆուտբոլային խաղից հետո, ինչի հետևանքով մահացել է Վահրամաբերդ գյուղի բնակիչ Զարզանդ Մանուկյանը: Դիտավորյալ սպանության հոդվածով մեղադրանք է առաջադրվել մեկ անձի: Նա Մարմաշեն գյուղի անչափահաս բնակիչ է:

Դեպքից մեկ ամիս անց մահացած երիտասարդի հարազատներն ու փաստաբանները ներկայացնում են իրենց իսկ նախաձեռնած հետաքննության արդյունքները: Որպես տուժող և տուժողի իրավահաջորդներ՝ շատ մանրամասներ նախաքննությունից նրանց հայտնի չէ: Միայն գիտեն, որ մեկ անձի մեղադրանք է առաջադրվել դիտավորյալ սպանության հոդվածով, և որ Զարզանդ Մանուկյանի մահը վրա է հասել գլխին ստացած 5 վնասվածքների պատճառով:

Փաստաբանները հետաքննություն են սկսել՝ պարզելու դեպքի մասնակիցների ու ականատեսների շրջանակը: Համոզված են՝ այն, ինչ տեղի է ունեցել, մեկ անձի ձեռքի գործ չէ: Երկու գյուղերի երիտասարդների միջև ֆուտբոլային խաղ է կազմակերպված եղել, որին, ըստ փաստաբանի, երկու տասնյակից ավելի մասնակիցներ են եղել, բայց նախաքննության ընթացքում մասնակիցների ու ականատեսների շրջանակը փոքր է:

«Եթե մեղադրականով նայենք, 12 հոգի են և վերջ: Իսկ մենք արդեն ունենք ստուգված տեղեկություն, որ դեպքի վայրում եղել է ոչ պակաս, քան 30 հոգի, այսինքն՝ 10-12 հոգի խաղացողներն են եղել, 20 հոգի էլ գյուղի մյուս երեխաները: Մեր հորդորն է նախաքննական մարմիններին՝ բոլոր անձանց շրջանակը պարզվի: Որոշ վկաներ հարցաքննության ներկայացել են փաստաբանների հետ»,- ասել է փաստաբան Հայկ Հարությունյանը:

Ըստ փաստաբանի՝ մի շարք առանցքային վկաների իրենք են ուղղորդել քննչական մարմին: Նաև միջնորդել են որպես վկա Մարմաշեն համայնքի ղեկավարին հարցաքննելու մասին: Համայնքի ղեկավարը, ըստ տուժող կողմի, այն անձն է, որը դեպքին հաջորդած օրերին իրականությանը և իրավապահների արձանագրածին չհամապատասխանող տեղեկություններ է տարածել զանգվածային լրատվամիջոցներին:

«Դեպքը տեղի է ունեցել մայիսի 27-ին: Մայիսի 28-ին արդեն հարուցվել է քրեական գործ 104-րդ հոդվածի հատկանիշներով: Ահարոն Արշակյանը մայիսի 28-ին տվել է տեղեկություն, որ Զարզանդ Մանուկյանը վայր է ընկել: Այսինքն՝ նախաքննական մարմինը տեղեկություն ունի, որ հանցավոր արարք է տեղի ունեցել, իսկ ինքը նման տեղեկություն է տալիս: Մեկ այլ լրատվականի տեղեկություն է տրամադրել մայիսի 29-ին, այսինքն՝ քրգործ հարուցելուց հետո է նման տեղեկություն տալիս, իսկ այդ ժամանակ արդեն կար կալանավորված անձ»,- ասել է տուժողի իրավահաջորդի ներկայացուցիչ Արտուշ Հակոբյանը:

Իսկ տուժողի իրավահաջորդը՝ սպանված երիտասարդի քույրը՝ Հեղինե Մանուկյանը, ասել է.

«Ի՞նչ է մտածել համայնքի ղեկավարը այդ պահին, երբ որոշել է կայքերին դատաբժշկական փորձաքննության արդյունքներից առաջ ընկնելով տեղեկություն հաղորդել: Իմ կասկածները սկսում են հիմնավորվել՝ իր ազգականներից մեկը ևս եղել է այդտեղ խաղացողների մեջ և ինքը արդեն իսկ կողմնապահություն անելով խառնվել է քրեական գործի ընթացքին»:

Համայնքի ղեկավարին գրություն են ուղարկել, հորդորել ու պահանջել հերքել իր իսկ տարածած տեղեկությունները:

Փաստաբանները մասնավոր հարցումներում երկու գյուղերի բազմաթիվ երիտասարդների են ընդգրկել: Բայց հարցումները, ըստ նրանց, անարդյունք են: Բոլոր նրանք, ովքեր ֆուտբոլային խաղի մասնակից են եղել, նշում են, թե չեն տեսել, թե ինչպես ու ինչ հարվածի հետևանքով է Զարզանդ Մանուկյանը հայտնվել գետնին:

Ըստ տուժողի իրավահաջորդի՝ լռում է անգամ այն ընկերը, ում պատճառով ծագել է վեճը, ում ուղարկած հաղորդագրության պատճառով էլ Զարզանդը գնացել է Մարմաշեն ու ընկել վեճի մեջ:

Նախաքննությունը շարունակվում է, որին փաստաբանների մասնավոր հետաքննությունը օգնելու է բազմակողմանի քննություն ապահովելու համար: