Բելառուսում մինչև այս պահն ինտերնետը խափանված է․ Սանդիկով

Բելառուսում երեկ տեղի ունեցած նախագահական ընտրություններին հաջորդել են քաղաքացիների զանգվածային ցույցերը։ Երկրում մինչև այս պահը խափանված է ինտերնետ կապը։ Դիտորդական առաքելությամբ Բելառուսի Հանրապետությունում գտնվող ՀՀ Ազգային ժողովի պատգամավոր Ալեքսեյ Սանդիկովը «Հորիզոնին» մանրամասներ է փոխանցել Բելառուսում տիրող իրավիճակի և անցկացված ընտրությունների վերաբերյալ։

«Երեկ՝ ընտրությունների արդյունքների ամփոփման ընթացքում, ընդդիմադիր ուժերի կողմից նկատվում էր ակտիվություն, նկատվում էր նաև ոստիկանական ուժերի կուտակում։ Այս պահին քաղաքում սովորական, աշխատանքային օր է, սովորական եռուզեռ է, ինչը իրականում, դիտվում էր առավոտվա ժամերից»,- ասաց Ալեքսեյ Սանդիկովը։

Նշենք, որ երեկ ուշ երեկոյան արդեն բախումներ տեղի ունեցան ցուցարարների ու ոստիկանական ուժերի միջև և տասնյակ քաղաքացիներ ստացել են մարմնական վնասվածքներ։ Ալեքսեյ Սանդիկովը նշեց, որ երեկվանից մինչև այս պահը կա նաև ինտերնետի հասանելիության խնդիր։

«Երեկ՝ օրվա 2-րդ կեսից կապի խափանումներ են եղել, բջջային ինտերնետն ընդհանրապես հասանելի չէ։ Տեղացի մեր գործընկերներից ճշտեցինք և նրանք նշում էին, թե ինչ-որ կիբեր հարձակումների խնդիր է առաջացել և չգիտեմ ի պաշտպանություն դրա թե ոչ, բայց անորոշ ժամանակով և մինչև այս պահը ինտերնետ կապը խափանված է»,- նշեց Սանդիկովը։

Բելառուսի նախագահական ընտրությունների ընթացքին հետևելու համար ՀՀ ԱԺ պատգամավորները եղել են ավելի քան տասը ընտրատեղամասերում։ Ալեքսեյ Սանդիկովը մեր հետ զրույցում նշեց, որ  ընտրական գործընթացն, ընդհանուր առմամբ, համապատասխանել է Բելառուսի օրենսդրությանը, սակայն որոշ գործընթացներ իրենց համար խորթ են եղել․ որոշ տեղամասերում քվեատուփերը եղել են փայտե՝ ոչ թափանցիկ, որոշներում էլ՝ օրգանական ապակուց, պարունակությունն էլ՝ բոլորի համար տեսանելի։

«Աչքի զարնող կարևոր հանգամանքն այն էր, որ, օրինակ, մեր մոտ ԿԸՀ-ը բոլորին տրամադրում է միասնական քվեախցիկներ, միասնական քվեատութեր՝ կիսաթափանցիկ պլաստիկից, մենք իրականացնում ենք ուղիղ հեռարձակում և այլն։ Բնականաբար այստեղ նման բաներ օրենսդրությամբ սահմանված չեն, նման չափանիշներ չկան և, ճիշտ չէ ասել, որ սա խախտում է, սա ընդամենը մեր կողմից արձանագրում է, որը կրում է բարեկամական,  գործընկերային բնույթ»,- ասաց ՀՀ ԱԺ պատգամավոր Սանդիկովը։

Մեր զրուցակիցը նշեց նաև, որ ինտերնետի բացակայությամբ պայմանավորված, ռադիոյով է փորձել ծանոթանալ ընտրության արդյունքներին և իր տվյալներով Ալեքսանդր Լուկաշենկոն հավաքել է ձայների շուրջ 80 տոկոսը, իսկ ընդդիմադիր Սվետլանա Տիխանովսկայան՝ շուրջ 10-ը տոկոսը։

Մանրամասները՝ ձայնագրությունում։