Բայդեն-Հարիս վարչակազմը կաշխատի կանխել Թուրքիայի նման պետությունների և օտարերկրյա վարձկանների միջամտությունը Արցախում

ԱՄՆ նախագահի թեկնածու Ջո Բայդենը և փոխնախագահի թեկնածու սենատոր Քամալա Հարիսը նախընտրական քարոզարշավի շրջանակներում ներկայացրել են, թե Բայդենն ինչ է արել հայկական հարցերի հետ կապված և թե Բայդեն-Հարիս վարչակազմն ինչ կանի ընտրվելու դեպքում, գրում է Asbarez-ը։

Հայտարարությունն արվում է Բայդենի ու Հարիսի առանձին կոչերից՝ ուղղված ղարաբաղյան հակամարտության խաղաղ կարգավորմանը:

«Ջո Բայդենի աջակցությունը հայ ժողովրդին» խորագրով հայտարարության տեքստում մասնավորապես մեջբերվում է 2020 թվականի ապրիլի 24-ին Բայդենի արտահայտած միտքը. «Հայոց ցեղասպանության զոհերին հիշելու և նրանց հիշատակը հարգելու հարցում ես կանգնած եմ ողջ հայ ժողովրդի և ամերիկահայ համայնքի կողքին, որն այնքան մեծ ներդրում է ունեցել ԱՄՆ-ում»:

Անդրադառնալով Բայդենի հետագա անելիքներին՝ մասնավորապես նշվում է, որ նա կճանաչի Հայոց ցեղասպանությունը և մարդու համընդհանուր իրավունքները կդարձնի իր վարչակազմի գերակա առաջնահերթությունը, որպեսզի նման ողբերգություններ այլևս չլինեն:

Նշվում է նաև, որ Բայդենը կուժեղացնի ԱՄՆ-Հայաստան գործընկերությունը՝ բարելավելու հայ ժողովրդի կյանքը: Բայդենը կաջակցի տարածաշրջանում տևական խաղաղության հաստատմանը՝ ակտիվացնելով ԱՄՆ-ի ներգրավվածությունը Լեռնային Ղարաբաղի հակամարտության կարգավորման գործընթացում, կփնտրի նաև լրացուցիչ միջազգային դիտորդներ՝ հրադադարի ռեժիմը վերահսկելու համար: Շեշտվում է նաև, որ Բայդենը կաշխատի կանխել երրորդ կողմերի, այդ թվում՝ Թուրքիայի նման պետությունների և օտարերկրյա վարձկանների միջամտությունը, որոնք վարձատրվում են Լեռնային Ղարաբաղի ժողովրդի դեմ հանցագործություններ կատարելու համար: Նա լիովին կաջակցի Հայաստանին ԱՄՆ աջակցության շարունակմանը՝ ժողովրդավարական կառավարումն ամրապնդելու և տնտեսական աճը խթանելու համար, կվերանայի Ադրբեջանին անվտանգության նպատակով տրամադրվող աջակցությունը՝ համոզվելու համար, որ այն չի օգտագործվում հարձակողական նպատակներով: Նշվում է նաև, որ նա կշարունակի հումանիտար ականազերծման երկարաժամկետ օգնությունը Լեռնային Ղարաբաղում, որը Թրամփը փորձել է կասեցնել: Բայդենը նաև կդատապարտի ատելության հողի վրա կատարված հանցագործությունները ամերիկահայերի դեմ:

Հայտարարությունում ներկայացվում է նաև, թե Բայդենն ինչ է արել հայկական հարցերի առնչությամբ: Մասնավորապես, որպես ԱՄՆ սենատոր, նա ջանքեր է գործադրել՝ ճանաչելու Հայոց ցեղասպանությունը: Անցյալ տարի Բայդենը Կոնգրեսում սատարել է երկկուսակցական օրենսդրական նախաձեռնությանը, որը ճանաչում է Հայոց ցեղասպանությունը և ԱՄՆ-ում ոգեկոչման անհրաժեշտությունը:

Այս տարի Հայոց ցեղասպանության զոհերի հիշատակի օրը նա կոչ է արել ցեղասպանությունը լիովին ճանաչել և խոստացել է աջակցել դրա ճանաչմանը: Այնուհետև նա ասել է. «Եթե մենք լիովին չենք ընդունում, ոգեկոչում և մեր երեխաներին տեղեկացնում ցեղասպանության մասին, ապա «այլևս երբեք» բառերը կորցնում են իրենց իմաստը»: