Համավարակի ֆոնին Արցախում ցեղասպանության սարսափն է արթնացել. Forbes-ի անդրադարձը Ղարաբաղյան հակամարտությանը

Կանանց սոցիալական ձեռներեցների, խաղաղությանև փոփոխությունների համար պայքարողների թեմաներով հեղինակ Ջեքի Աբրամյանը Forbes-ում անդրադարձել է Ղարաբաղյան հակամարտությանը:

Genocide Watch-ի. GENOCIDE EMERGENCY: Azerbaijan in Artsakh զեկույցում նշվում է.

«Հայերի նկատմամբ անցյալում իրականացված ցեղասպանության ժխտման, ատելության խոսքի պաշտոնական օգտագործման և Արցախում ներկայումս քաղաքացիական անձանց թիրախավորելու պատճառով Genocide Watch-ը համարում է, որ Ադրբեջանը գտնվում է 9-րդ փուլում՝ բնաջնջում և փուլ 10՝ հերքում: Այն եզրակացրել է, որ ադրբեջանական ռազմական գրոհները, «լազերային ղեկավարվող անօդաչու թռչող սարքերը, որոնք մատակարարվում են Թուրքիայի և Իսրայելի կողմից», ընդդեմ արցախցի խաղաղ բնակիչների, «պատերազմական հանցագործություններ են Ժնևի կոնվենցիաների համաձայն»:

Այն մանրամասն նկարագրում է 1918-ի Ադրբեջանի ժողովրդավարական հանրապետության կողմից հայ բնակչության համակարգված ոչնչացումը «Ադրբեջանում, Նախիջևանում և Լեռնային Ղարաբաղում` որպես 1915-ի օսմանյան հայերի տեղահանության և ցեղասպանության շարունակություն»: Այնտեղ նշվում է, թե ինչպես են ադրբեջանական ուժերը Բաքվում կոտորել «առնվազն 15000 հայ խաղաղ բնակիչների «սեպտեմբերյան օրերի» ընթացքում, իսկ 1000 հայի՝ 1919-1920 թվականներին Ղարաբաղի Շուշի և Հայբալիքենդ քաղաքներում»:

Հոդվածում նշվում է, որ Թուրքիայի կողմից աջակցվող Ադրբեջանի հարձակումը խախտում է ՄԱԿ-ի Գլխավոր քարտուղարի՝  անհապաղ գլոբալ հրադադարի մասին` համաճարակի վրա կենտրոնանալու նպատակով: Amnesty International Crisis Response-ի փորձագետները «հայտնաբերել են իսրայելական արտադրության M095 DPICM կասետային զինամթերք, որոնք, պարզվում է՝ արձակվել են ադրբեջանական ուժերի կողմից»:

Նա անդրադարձ է կատարում Haaretz- ի վետերան, վերլուծաբան Յոսի Մելմանի, Սիմոն Սփանգինի՝ Haaretz Podcast-ում «Ինչո՞ւ է Իսրայելը զինում Ադրբեջանին Հայաստանի դեմ» հարցազրույցին, որտեղ վերջինս քրիստոնյա հայերի դեմ Թուրքիայի և Իսրայելի համատեղ պայքարը համարել է «ցինիկ»:

«Իսրայելը՝ հրեաների հայրենիքը, որոնք զոհվեցին Հոլոքոստի ժամանակ, և Հոլոքոստը վերապրածները հրաժարվում են ճանաչել Հայոց ցեղասպանությունը: Որպես հրեա և որպես իսրայելցի՝ ես չեմ կարող դա ընդունել: Ես հասկանում եմ, թե ինչ է նշանակում ազգային շահեր: Իսրայելն իր արտաքին քաղաքականության մեջ գոնե մեկ բարոյական արժեք պետք է ներմուծեր. Իսրայելը պարզապես շահագրգռված է զենք վաճառել, վաճառել և վաճառել»:

Հոդվածագիրը նշել է, որ մինչ անցյալ ուրբաթ Վաշինգտոնում Հայաստանի և Ադրբեջանի արտգործնախարարները հանդիպում էին ԱՄՆ պետքարտուղար Մայք Պոմպեոյի հետ, Արցախը շարունակում էր ռմբակոծվել: Երկու կողմերն էլ համաձայնվել էին հրադադարին, բայց այն կրկին խախտվել է:

«Ես վիրտուալ հարցազրույց եմ անցկացրել Արցախի Հանրապետության Մարդու իրավունքների պաշտպանի գրասենյակի գլխավոր մասնագետ, 29-ամյա փաստաբան Մարինա Սիմոնյանի հետ: Նա ծնվել է մայրաքաղաք Ստեփանակերտում. Սիմոնյանն գրեթե իր ամբողջ կյանքն ապրել է պատերազմի և հակամարտության մեջ: Մի քանի օր առաջ նա կորցրել է իր 31-ամյա փեսային, որը բժիշկ էր. նրան հարվածել էր ադրբեջանական կասետային ռումբը»,- գրել է նա:

Ջեքի Աբրամյանը նրա հետ զրուցել է այնպիսի հարցերի շուրջ, ինչպիսիք են Արցախում մարդու իրավունքների պաշտպանությունը, Արցախի բնակչության ֆիզիկական և հոգեկան վիճակը և այլն։

Նրանք խոսել են նաև այն հարցի մասին, թե ինչպես է ՄԻՊ գրասենյակը պայքարում Ադրբեջանի կեղծ տեղեկատվության դեմ։ Սիմոնյանն ասել է, որ Հայաստանում և Արցախում ստեղծված է միասնական տեղեկատվական կենտրոն, որը տալիս է Արցախում առկա իրավիճակի վերաբերյալ պաշտոնական և ճիշտ տեղեկատվություն։