Փոքր և միջին բիզնեսը լուրջ աջակցման կարիք ունի. Նիկոլ Փաշինյան

ՀՀ տնտեսական զարգացման և ներդրումների նախարար Արծվիկ Մինասյանը Կառավարության հունիսի 28-ի նիստի ժամանակ ներկայացրեց «Առևտրի և ծառայությունների մասին» Հայաստանի Հանրապետության օրենքում լրացումներ կատարելու մասին» Հայաստանի Հանրապետության օրենքի նախագծի վերաբերյալ Հայաստանի Հանրապետության կառավարության առաջարկությունների նախագիծը:

Դրանով առաջարկվում է մեծածախ և մանրածախ առևտուրը տարանջատել առևտրային ցանցերում, որը հնարավորույթուն կտա, որ առևտրով զբաղվող փոքր սուբյեկտները կարողանան մրցակցել: Մինասյանը նշեց, որ գաղափարը Կառավարության համար ընդունելի է, սակայն ձևակերպումները մի շարք հարցեր են առաջադրում, և դրանք փոփոխելու անհրաժեշտություն կա:

Իբրև օրինակ՝ նա նշեց առևտրային ցանցի սահմանման առաջարկը, որն ինտեգրում է իր մեջ ՏՄՊՊՀ մասին օրենքով արդեն իսկ տրված երկու տարբեր իրավահարաբերությունների սահմանումը, նաև հավելում է, որ խոսքը 1,5 մլրդ դրամի շրջանառությունը գերազանցող սուբյեկտների մասին է:

Մինասյանի խոսքով՝ ՏՄՊՊՀ մասին օրենքն այդ շրջանառությունը արդեն գերիշխող դիրք ունեցող սուբյեկտների հետ է կապում, ուստի հասկացությունները նույնականացնելու, իրավական որոշակիության ու համարչափության խնդիր կա: Այդ սահմանումն, ըստ նախարարի, որոշակի վերանայման և քննարկման պիտի ենթարկվի:

Նախարարը նշեց, որ նախագծով անդրադարձ չկա օրենքի ընդունման դեպքում անցումային ռեժիմի հետ կապված՝ թե մնացորդների, թե դրանց հաշվառման, թե իրացման կանոնների տեսանկյունից, որ տնտեսվարողները չհայտնվեն վատ վիճակում: Մինասյանը քննարկման ենթակա է համարում նաև հետևյալ դրույթը, որ խոշոր սուպերմարկետներին կամ առևտրային ցանցերին շաբաթ-կիրակի օրերին անհրաժեշտ է արգելել 20:00-22:00-ն աշխատելը:

Այս կարգավորումն, ըստ նախարարի, լուրջ վերլուծության պիտի ենթարկվի, որ մի կողմից ապահովեն հավասար մրցակցությունը, մյուս կողմից փոքր բիզնեսին հնարավորություն տան, բայց սպառողների պաշտպանությունը ևս կարևոր է, ուստի Մինասյանը համոզմունք հայտնեց՝ չբացառելով նման կարգավորման հավանականությունը՝ այն նաև պետք է լուրջ վերլուծության ենթարկվի, հավասարակշռված որոշում կայացվի:

Նախարարը նաև ասաց, որ նախագծում պատասխանատվության նորմերն են բացակայում, կան մի շարք իրավական-տեխնիկական կանոններ: Նա տեղեկացրեց, որ օրինագծի հեղինակների հետ քննարկում են իրականացրել, պայմանավորվածություն կա, որ այս տեսքով նախագիծն ընդունելի չէ, և համատռղ աշխատանքի արդյունքում պետք է միասնական մոտեցում ցուցաբերեն: Նա կառավարությանն առաջարկեց նախագծին հավանություն տալ, ուղարկել ԱԺ:

Արձագանքելով այս նախագծի զեկուցմանը՝ վարչապետ Նիկոլ Փաշինյանը նշեց, որ տվյալ հարցը պետք է դիտարկել Կառավարության համար շատ կարևոր և առաջնահերթություն հանդիսացող փոքր և միջին բիզնեսի աջակցման գործընթացի շրջանակներում:

«Մենք լրջորեն աշխատում ենք այդ ուղղությամբ, ես վաղը խորհրդակցություն եմ հրավիրել փոքր և միջին բիզնեսի աջակցության թեմայով, որ արդեն շատ կոնկրետ որոշենք մեր անելիքները, ուղղությունները, թե ինչ պետք է անենք փոքր և միջին բիզնեսին աջակցելու համար: Գաղափարներ, մոդիֆիկացիաներ քննարկել ենք, եկել եզրակացության, որ պետք է 7 չափել, մեկ կտրել, բայց փոքր և միջին բիզնեսը լուրջ աջակցման կարիք ունի»,- ասաց նա:

Փաշինյանը նշեց՝ կառավարությունը միջոցներ է ձեռնարկելու, ամեն ինչ անելու է, որ դրանք լինեն արդյունավետ, կարևորեց այն, որ այդ հարցում բոլորը միակարծիք են: