Գյումրիի գլխավոր հատակագիծը փոփոխության կենթարկվի

Պետական ֆինանսավորմամբ կազմվում է Շիրակի մարզի ռեգիոնալ զարգացման հատակագիծ, որով փոփոխություններ են նախատեսվում նաև Գյումրիի հատակագծում: Փոփոխությունները մեծ մասամբ վերաբերելու են կանաչ գոտիներին, որոնց գործառնական կիրառությունը վաղուց շեղվել է հատակագծային ձևակերպումից:

2005 թվականին հաստատված հատակագծով կանաչապատման համար նախատեսված տարածքներում 30 տարուց ավելի է տնակային ավաններ են, իսկ տնակներից շատերը վաղուց քարաշեն կառույցի են վերածվել: Հիմա, երբ դրանց ապամոնտաժումն այլևս անհնար է, ճարտարապետական փաստաթուղթը համապատասխանեցնելու են իրականությանը:

Կառուցապատման, հանրային նշանակության տարածքներն առանձնացված են տարբեր գույներով: Այս գունային համադրության մեջ կանաչապատման և հանգստի գոտիները կանաչ գույնով են բաժանված: Գյումրիի գլխավոր հատակագիծն է, որը մշակվել է 2000 թվականին և հաստատվել է  2005-ին: 15 տարի անց հատակագծի այդ հատվածները միայն թղթի վրա են կանաչապատ: Իրականում այդ տարածքներում տնակային ավաններ են, որտեղ տնակների մեծ մասը դարձել է սեփական տուն:

« Փոփոխվել է իրավիճակը և դարձել է անդառնալի, անշրջելի իրավիճակ: Չենք կարող ստեղծված կառուցապատումը քանդել, վերացնել և ստեղծել կանաչ տարածքներ: Բոլոր առումներով ձեռնտու չէ, բնակելի տներ են կառուցված և այդ տները քանդելն արդեն կնշանակի անօթևանների քանակն ավելացնել»,- Shantnews-ին ասել է Գյումրիի գլխավոր ճարտարապետ Հենրիկ Գասպարյանը:

Օրինակը ավտոկայանի տնակային բանավանն է: Տնակների տեղում կապիտալ շինարարություն են կատարել, տուն կառուցել: Ու այս շինարարությունները հատակագծի հետ համաձայնեցված չեն եղել: Այս տարածքի բնակիչների  կառուցած տները սեփականաշնորհելու դիմումները քաղաքապետարանում մերժվել են՝ պատճառաբանությամբ, որ տարածքը համարվում է կանաչ գոտի, որտեղ կառուցապատումներ չեն թույլատրվում:

Քաղաքապետարանը հիմա նոր գոտևորում է կատարում: Ստուգում ու հաշվառում են, թե հատակագծով կանաչ գոտիներում ինչքան ու ինչ տիպի կառույցներ կան: Այս ամենն անհրաժեշտ է հետագա փոփոխությունների համար: Ավտոկայանի բանավանի մի հատվածում փոփոխություններ կատարվելու են և «կանաչ գոտի» կարգավիճակը հանվելու է:

Այսինքն՝ արդեն կառուցապատված տարածքները համարվելու են ոչ թե կանաչ, այլ կառուցապատման գոտիներ, և սա հնարավորություն է տալու բնակիչներին սեփականաշնորհել իրենց տները: Փոխարենը, ճարտարապետները նոր տարածքներ են փնտրելու դրանք կանաչ գոտու վերածելու համար:

«Հիմա  մենք այդ դիլեմայի մեջ ենք, թե կանաչ տարածքները որտեղ պետք է լրացնենք: Լրացնելու համար պետք է համապատասխան այնպիսի տարածքներ վերցնենք, որոնք կառուցապատման տարածքներ էին, բայց կառուցապատված չեն: Այսինքն՝ հակառակ կողմից պետք է մոտենանք հարցին»,- ասել է Հենրիկ Գասպարյանը:

Շիրակի ռեգիոնալ հատակագծի կազմումը, որի շրջանակներում նաև Գյումրիի գլխավոր հատակագիծն է փոխվելու, տևելու է մեկ տարի: Այժմ քննարկումների, հաշվառումների փուլն է, պարզելու են, թե մարզի բնակավայրերից յուրաքանչյուրը քաղաքաշինական զարգացման ինչպիսի հեռանկարներ ունի: