Գյումրիի զբաղվածության կենտրոնում հաշվառվում են աշխատանք փնտրող արցախցիները

Կառավարությունը ժամանակավոր զբաղվածության ծրագրեր է սկսել Հայաստանում օթևանած այն արցախցիների համար, որոնց բնակավայրերն անցել են Ադրբեջանի վերահսկողության տակ: Խոսքը աշխատանքային փորձ ձեռք բերելու և վարձատրվող հասարակական աշխատանք ծրագրերի մասին է, որտեղ ընդգրկված արցախահայերի աշխատավարձը և դրանից բխող հարկային պարտավորությունները փոխհատուցում է կառավարությունը: Զբաղվածության տարածքային կենտրոններն այժմ  հաշվառում են, ճշտում նրանց մասնագիտությունը, հմտությունները, աշխատելու նախընտրելի ոլորտները: Սրանից է կախված, թե որ գործատուների հետ են բանակցելու նրանց ժամանակավոր աշխատանքի տեղավորելու համար:

Գյումրիի տարածքային զբաղվածության կենտրոնում Վաչիկ Սայամյանն իր փաստաթղթերն է ներկայացրել, որոնք վկայում են այն մասին, որ Շուշիում, շինարարական ընկերությունում, աշխղեկ է աշխատել, համատեղությամբ նաև մշակույթի տան տնտեսվարն է եղել: Այն նույն մշակույթի տան, որը ռմբակոծվեց, որտեղ գործում էր Շուշիի պետական թատրոնը: Նույն օրը Վաչիկը հրաշքով է փրկվել: Շուշիում է թողել տունը, աշխատանքն ու Գյումրի տեղափոխվել: Քանի դեռ այստեղ է ապրում անորոշ ժամանակով, որոշել է աշխատանք գտնել: Մասնագիտությամբ շինարար է:

«Շուշիում աշխատել եմ աշխղեկ, նաև տնտեսվար եմ աշխատել մշակույթի ակումբում: Այստեղ  տնտեսվարի աշխատանք եթե լինի, շատ գոհ կլինեմ: Ինձ՝ որպես շինարար, կանչել են Ստեփանակերտում աշխատելու համար: Քանի դեռ եղանակները շինարարության համար անբարենպաստ են, Գյումրիում եմ մնալու և այս ընթացքում ինձ աշխատանք է պետք: Հետո արդեն կորոշեմ՝ մնալու եմ Հայաստանում, թե Արցախ կվերադառնամ»,- Shantnews․аm -ի հետ զրույցում ասել է Վաչիկ Սայամյանը:

Ադրբեջանի վերահսկողության տակ մնացած բնակավայրերից Հայաստան տեղափոխվածների համար պետական ծրագրեր են զբաղվածության կենտրոնում առաջարկում: Դրանք ժամանակավոր են ու հնարավորություն են տալիս մասնագիտությամբ գործ չգտնելու դեպքում այլ մասնագիտությամբ վերապատրաստվել:

Հասարակական վարձատրվող աշխատանքների կազմակերպման հայտեր ընդունում են այն համայնքներից, որտեղ տեղափոխված արցախցիներ կան և նրանք հաշվառված են զբաղվածության կենտրոնում: Իսկ փորձ ձեռք բերելու ծրագիրը ուղղակիորեն կապված է գործատուների հետ: Գործատուների և շահառու արցախցիների համար պետական ծրագիրը շահավետ պայմաններ է առաջարկում:

«Աշխատանքային փորձ ձեռք բերելու ծրագիրը ենթադրում է այն մարդկանց, որոնք իրենց մասնագիտությամբ չեն կարողանա գտնել տեղում աշխատանք, գոնե հնարավորություն ենք տալիս մեկ այլ մասնագիտությամբ փորձ ձեռք բերել և փորձեն աշխատանք գտնել: Եռամսյա ծրագրի ընթացքում նրանք կստանան ամիսը 100 հազար դրամ: Մենք գործատուին փոխհատուցելու ենք 100 հազար դրամի հարկային պարտավորություններից առաջացած ծախսերը, պետք է նաև ամսական 34 հազար դրամ փոխհատուցենք այն վարպետին, որն իր փորձը կփոխանցի ծրագրի շահառուներին: Փոփոխություններ են տեղի ունեցել նաև «Հասարակական վարձատրվող աշխատանք» ծրագրում: Օրավարձի գումարն  ավելի բարձ է, օրավարձը՝ 8000 դրամ պետք է հատկացնենք արցախահայության համար: Կառավարության որոշմամբ հստակեցված է և ծրագրի ընդհանուր արժեքը կարող է լինել մինչև 2 մլն դրամ»,- նշել է  Գյումրիի զբաղվածության տարածքային կենտրոնի տնօրեն Ամալյա Ադամյանը:

Այժմ զբաղվածության կենտրոնները գործատուների հետ են բանակցում: Կախված նրանից՝ հաշվառվող արցախցիներն ինչ մասնագիտություն ու հմտություններ ունեն, որոշում են, թե որ գործատուներին են դիմելու:

Զբաղվածության ծրագրերը եռամսյա ժամկետով են: Ժամանակավոր են, քանի որ արցախցիներից շատերը Հայաստանում ժամանակավոր են մնալու: Գյումրիի զբաղվածության տարածքային կենտրոնում առայժմ մոտ 30 արցախցի է հաշվառում անցել: