Շիրակի մարզում կարտոֆիլի ցանքերը ևս կապահովագրվեն

Նախորդ տարի Շիրակի մարզում ապահովագրության ենթակա մշակաբույսերի ցանկում էին հացահատիկն ու խնձորի այգիները: Հիմա գյուղացիները կարող են ապահովագրել նաև կարտոֆիլի ցանքերը: Էկոնոմիկայի նախարարությունը հաստատել է մշակաբույսերի ցանկը, հնարավոր ռիսկերը և պետության մասնակցության բաժինը գյուղապահովագրության ծրագրում, ինչպես նաև ապահովագրական պայմանագրերի կնքման ժամկետները, բայց դեռ վերջնական հաշվարկված չեն ապահովագրավճարները: Ապահովագրական ընկերությունները փոխհատուցում են ոչ թե սպասվող բերքի եկամտի կորուստը, այլ կատարված ծախսերը:

Ազատանի պահեստներում կարտոֆիլի սերմացուն զատել են պարենայինից ու պահում են գարնանը ցանելու համար: Միայն Ազատանում տարեկան մոտ 700 հեկտար կարտոֆիլ են մշակում: Մարզի ամենամեծ ֆերմերային տնտեսություններն այստեղ են: Հարևան գյուղերում էլ  հողեր են վարձակալում: Մշակում են, ցանում, ամեն տարի էլ կարկուտից տուժում են:

Այս տարի ընդլայնվել է մշակաբույսերի ցանկը, նաև հնարավոր ռիսկերը: Նախորդ տարի Շիրակի մարզում փոխհատուցվում էին միայն կարկտահարության և հրդեհի հետևանքները, այս տարի ավելացել է նաև ցրտահարությունը: Սա սպառնում է հիմնականում վաղահաս կարտոֆիլի ցանքերին:

«Ամենակարևորը մեր մարզի համար կարտոֆիլի ցանքերն են ընդգրկված: Նույնիսկ կարտոֆիլի ցանքերը բաղդատած են՝ վաղահաս, միջին վաղահաս և ուշահաս տեսակների: Բոլորի համար պայմանագրերի կնքման  տարբեր ժամկետներ են սահմանված: Վաղահաս կարտոֆիլի համար հողօգտագործողները ապահովագրական պայմանագիրը պետք է ունենան մինչև մարտի 10-ը, միջին վաղահասի համար՝ մինչև մարտի 20-ը, իսկ հացահատիկի համար ժամկետ է սահմանված մինչև մայիսի 1-ը»,- Shantnews-ին ասել է Շիրակի մարզպետարանի գյուղատնտեսության բաժնի պետ Անդրանիկ Նալբանդյանը:

Ապահովագրական ընկերությունները պարտավորվում են փոխհատուցել ոչ թե սպասվող բերքից ակնկալվող եկամուտը, այլ կատարված ծախսերը:  Ապահովագրավճարների 50-60 տոկոսը կսուբսիդավորի կառավարությունը:

Ծրագրում ընդգրկված նոր մշակաբույսերի ապահովագրավճարները դեռ  հաշվարկված չեն: Բայց հստակ է, որ մեկ հեկտար կարտոֆիլի դեպքում ապահովագրավճարը մի քանի անգամ ավելին կլինի, քան մեկ հեկտար հացահատիկի դեպքում էր:

«Ըստ մեր նախնական հաշվարկների՝ մոտավորապես 120 հազար դրամ մեկ հեկտար կարտոֆիլի համար հնարավոր է ապահովագրական վճար վճարի գյուղացին, բայց կարտոֆիլի եկամուտն ու վնասն էլ է շատ: Եթե հաշվարկենք, վճարելով 120 հազար դրամ՝ մեկուկես մլն վերադարձ կստանա: Կարելի է ասել՝ վնասն ապահովագրված է: Ճիշտ է, եկամուտ չի ստանա, բայց վնաս էլ չի կրի»,- նշել է Անդրանիկ Նալբանդյանը:

Շիրակի մարզում հացահատիկի ցանքերը կազմում են 28-30 հազար հեկտար, կարտոֆիլի ցանքերը 3000-4000 հեկտար են, 60 հեկտար էլ խնձորի այգիներն են: Շիրակի մարզում բնական աղետի վնասները ամբողջությամբ ապահովագրելու համար անհրաժեշտ է, որ բոլոր գյուղացիներն իրենց հողատարածքներն ապահովագրեն, ինչպես նաև ծրագրում ընդգրկվեն բանջարաբոստանային կուլտուրաները, որոնք Շիրակի մարզում 1800 հեկտար են կազմում:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX  և Opticom ցանցային օպերատորների կապուղիներով։ Ինչպես նաև  Shant Digital Tv հավելվածով ամբողջ աշխարհում։