Գյումրիի պատմական փողոցների ու տնակային թաղամասերի գեղանկարչական մեկնաբանությունը Սամվել Գալստյանի կտավներում

Գյումրին արվեստագետների համար ոգեշնչման ու ստեղծագործելու անսպառ աղբյուր է: Քաղաքն իր հին ու կոլորիտային փողոցներով, պատմաճարտարապետական կառույցներով ու ամենակարևորը՝ մարդկանցով, արտացոլված է գեղանկարիչ Սամվել Գալստյանի «Գյումրի» շարքում:

Յուրաքանչյուր նկար արտահայտում է գյումրեցիների առօրյան, կենցաղը, նիստն ու կացը: Քաղաքի հոգսերն անգամ գեղանկարիչը ներկայացնում է արվեստի լեզվով: Այս հարցում հեղինակին օգնում ու ոգեշնչում են իր իսկ պայմանները: Սամվել Գալստյանը 30 տարուց ավելի ապրում ու ստեղծագործում է տնակում:

Գեղանկարիչն  ապրում է Գյումրիի ծայրամասային տնակային թաղամասում: Այստեղ միայն մաշված տնակներ են, որոնցից մեկում նա է ստեղծագործում: Գորշ ու քայքայված տնակները նույն տնակային արվեստանոցում բոլորովին այլ գույներով են ներկայացված: Սամվել Գալստյանը Գյումրիի տնակային ավանների շարք է ստեղծել: Սա ստեղծագործողի անուղղելի լավատեսության , մինևնույն ժամանակ բողոքի արտահայտումն է:

«Այն ինչ տեսնում ես, ինքը պետք է ազդի քո վրա, նույնիսկ բացասական երևույթը: Պետք է այնքան լավատես լինես, որ դրա մեջ գեղարվեստը տեսնես, մատուցես որպես նկար: Ավելի լավ է չհամակերպվես այս ամենի հետ: Բողոքի ձևով այսպես դուրս է գալիս միջիցդ, բայց եթե արվեստագետ ես, դու չես կարող տգեղ բան դուրս տալ, մանավանդ երբ լավատես արվեստագետ ես, ամեն ինչի մեջ լավը պետք է տեսնես»,-SHANTNEWS-ի հետ զրույցում ասել է  գեղանկարիչ Սամվել Գալստյանը:

Քաղաքի խնդիրներին ստեղծագործ մոտեցում ցուցաբերել նկարիչը սովորեցրել է նաև իր աշակերտներին, որոնք քարուքանդ ու ցեխոտ Սավոյան փողոցով են հասնում նրա արվեստանոց: Բայց նույն տխուր, երբեմն ընկճող տեսարաններին նկարիչն այլ մեկնաբանություն է տալիս՝ դրա մեջ գույն ու երանգ տեսնելով:

Ամեն մի նկար հեղինակի հիշողություններն են: Տնակները՝ ներկայի, իսկ քաղաքի հին փողոցները՝ նկարչի մանկության, որն ամենահին թաղամասերից մեկում է անցել:

Բոլոր նկարներում ոչ միայն հին ու ճարտարապետական արժեք ներկայացնող շենքերն են, այլ  նաև մարդկային կերպարներ: Դրանք ոչ թե մտացածին կերպարներ են, այլև քաղաքի բնակիչներն՝ իրենց հոգսերով, աշխատանքով, արվեստով ու հումորով:

«Գյումրի» կոչվող շարքի շատ նկարներ այլևս Սամվել Գալստյանի արվեստանոցում չեն: Դրանք արտերկրում ապրող գյումրեցիների պահանջով վաճառել է: Նկարիչն է նշում՝ աշխատանքները վաճառելու առաջարկը չի կարողանում մերժել , որովհետև սա մարդկանց իրենց հարազատ քաղաքից մասնիկ ու հիշողություն ունենալու հնարավորություն է տալիս:

«Արվեստագետի համար շատ դժվար է բաժանվել իր գործերից, բայց երբ տեսնում եմ, թե ինչ կարոտով են այդ մարդիկ, որոնք գնորդներն են,  մեկնաբանում աշխատանքները, արդեն մեծ սիրով եմ տալիս նկարներս: Ասում են «Վա՜խ Գյումրիս, վա՜յ իմ փողոցը, իմ մանկությունը։ Ես գիտեմ, թե իմ մանկությունն եմ նկարել, բայց պարզվում է՝ ես շատ մարդկանց մանկությունն եմ նկարել: Սա ինձ շատ է ուրախացնում »,- ասումէ  Սամվել Գալստյանը:

Գյումրին ստեղծագործելու անսպառ նյութ ու թեմա ունի: Նկարիչը համոզված է «Գյումրի» շարքը կարող է անվերջ լինել: Ամեն ինչի մեջ լավն ու գեղեցիկը տեսնելու ցանկությունը նորից ու նորից իր համար հարազատ դարձած տնակային թաղամասը նոր գույներով պատկերելու առիթ է: Այս անգամ իր տնակը ձմեռային է՝ եղանակին ու տրամադրությանը համահունչ:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։