Գյումրիում բնակարանների պահանջարկը նվազել է, բայց քաղաքապետարանը բնակարանաշինական ներդրումային առաջարկ է քննարկում

Գյումրիի բնակարանային շուկայում պահանջարկը մոտ 30 տոկոսով նվազել է: Սա ցույց են տալիս անշարժ գույքի գործակալությունների ուսումնասիրությունները: Համավարակով, ապա նաև հետպատերազմյան իրավիճակով պայմանավորված՝ նվազել է գնողունակությունը, հետևաբար նաև պահանջարկը: Սա իր հերթին ազդել է գների վրա: Գյումրիի բնակարանային շուկայում առայժմ գնանկումը մեծ չէ, բայց մասնագետների կանխատեսումներով այն շարունակական է լինելու:

Բնակարանային շուկայում գին ձևավորողը մի շարք գործոններ են՝ որտեղ է գտնվում շենքը կամ տունը, երբ է կառուցվել՝ հին է, թե նոր, վերանորոգված է, թե պետական վիճակում:Գյումրիի նկատմամբ նաև ուշադրության շնորհիվ, բնակարանների գները 2 տարի առաջ աճեցին։

Միևնույն ժամանակ անշարժ գույքի շուկայի մասնագետը հետաքրքիր դիտարկում է անում՝ Գյումրիում բնակարանների գնանկումն ավելի քիչ է, քան մայրաքաղաքում:

«Երևանի շուկայում գնանկումը կազմել է մոտ 5%: Գյումրիում գնանկումը կազմել է մոտ 1,5%: Դա հնարավոր է այն դեպքում, եթե Գյումրիում ազդող գործոններն ավելի թույլ են, քան Երևանում կամ այն դեպքում, երբ Գյումրիում պահանջարկն ավելի շատ է՝ առաջարկի հետ համեմատած »,-Shantnews-ի հետ զրույցում ասել է անշարժ գույքի գործակալության տնօրեն Արարատ Պապոյանը:

Մոտ 20 տոկոսով ավելի թանկ են բնակարանները, որոնք համեմատաբար նոր շենքերում են: Գյումրիում նոր բնակֆոնդ ասվածը 88-ից հետո կառուցված ու ամրացված շենքերն են: Մայրաքաղաքում բնակարանաշինությունը, որպես բիզնես , շահավետ է, քանի որ հենց նորակառույց բնակարանների պահանջարկն է մեծ: Գյումրիում բիզնեսի այս տեսակը զարգացնելու համար նախապայման կա:

«Որպեսզի Գյումրիում ծավալվի բնակարանաշինություն, որպես ձեռնարկատիրական գործունեություն, պետք է, որ բնակարանաշինության ինքնարժեքը շուկայական արժեքից ցածր լինի:Այսօրվա դրությամբ մոտեցել ենք,բայց դեռ չենք հասել դրան, որ բնակարանների շուկայական արժեքը լինի ինքնարժեքից բարձր»,-նշում է Արարատ Պապոյանը:

Այդուհանդերձ բնակարանային ներդրումային ծրագրի առաջարկ Գյումրիում կա: Մայրաքաղաքում նույն բիզնեսով զբաղվող ընկերություններից մեկն է Գյումրիում 320 բնակարան կառուցելու հայտ ներկայացրել: Էսքիզային նախագիծը Գյումրիի գլխավոր ճարտարապետի սեղանին է:

Ինչքանով է այն իրականանալի, երբ Գյումրիում բնակարանների պահանջարկը նվազել է։ Քաղաքի գլխավոր ճարտարապետը  նշում է՝ ներդրողն ինքն է շուկայի ուսումնասիրություն արել, իսկ քաղաքապետարանին ծրագրի նկատմամբ արժանահավատություն է ներշնչում այն,որ ընկերությունը ոչ թե անհատույց հողհատկացում է խնդրել, այլ գնել է հողատարածքը:

  «Տվյալ ընկերությունը հողը ինքը մասնավորից է գնել՝ իր միջոցներով:Մենք իրեն հողհատկացում չենք կատարել և ինքն այդ ծրագիրն իրականացնում է: Շատ խոշոր կազմակերպություն է, մեծ փորձ ունի ոլորտում:Նախագծման առաջադրանքները տվել ենք, էսքիզային նախագիծը հաստատել ենք: Գտնվում է մարզպետարանի և քաղաքաշինության կոմիտեի հաստատման փուլում: Նախատեսում են կառուցել 320 բնակարան բոլոր ենթակառուցվածքներով »,- Shantnews-ին ասել է Գյումրիի գլխավոր ճարտարապետ Հենրիկ Գասպարյանը:

Քաղաքի բազմաթիվ այլ տարածքներ, որոնք տարիներ առաջ են օտարվել, չեն կառուցապատվում: Մասնավոր շինարարության ծավալները ևս նվազել են:

Այս տարի ավելացել է հողակտորների կադաստրային արժեքը, ինչը նաև հողի հարկն է թանկացրել: Սա, ըստ ճարտարապետի, արվել է այն բանի համար, որ մասնավորը ստիպված լինի կառուցապատել կամ տարածքը վաճառել նրանց, որոնք ունեն կառուցապատելու հնարավորություն:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։