Մորեխ, սկավառակ և գորգ-դիմանկար. համաշխարհային առաջնորդների զվարճալի նվերները

ԱՄՆ պետքարտուղար Մայք Պոմպեոն ուրբաթ օրը՝ հուլիսի 6-ին, ժամանել է Հյուսիսային Կորեա: Ընդ որում, ինչպես տեղեկացնում է BBC-ի ռուսական ծառայությունը, նա դատարկաձեռն չի եկել: Կորեական լրատվամիջոցները հաղորդում են, որ Պոմպեոն հյուսիսկորեական առաջնորդ Կիմ Չեն Ինին պետք է փոխանցեր ԱՄՆ նախագահ Դոնալդ Թրամփի նվերը: Ըստ որոշ տեղեկությունների՝ Հյուսիսային Կորեայի և ԱՄՆ առաջնորդները հանդիպման ժամանակ խոսել են այն մասին, որ Թրամփը Կիմ Չեն Ինին մարդ-հրթիռ է անվանել՝ նկատի ունենալով թե նրա ռազմական նկրտումները, թե Էլթոն Ջոնի համանուն երգը: Պարզվել է, որ Կիմ Չեն Ինը երբեք չի լսել այդ երգը: Արդյունքում Թրամփը որոշել է նրան նվիրել այդ երգի սկավառակը, որպեսզի իր գործընկերն այդ բացը լրացնի:

Կիմ Չեն Ինը առաջին ղեկավարը չէ, որ սկավառակ է նվեր ստանում: 2009 թ. Բարաք Օբաման՝ ԱՄՆ նախագահը, Մեծ Բրիտանիայի վարչապետ Գորդոն Բրաունին DVD-սկավառակ նվիրեց, որում իր սիրելի ամերիկյան ֆիլմերն էին: Ակնհայտ է՝ անգլիացիներն այդ նվերն ըստ պատշաճի չգնահատեցին: Բացի այն, որ այս նվերը պատասխան էր բրիտանացիների տված՝ անհամեմատ ավելի արժեքավոր նվերին, այն նաև բացարձակ անօգուտ նվեր էր. Միացյալ Թագավորությունում այլ տարածքների արտադրանք սկավառակների սահմանափակում կա, և Օբամայի նվիրած սկավառակները պարզապես մնացին դարակում:

1997 թ. օգոստոսին Ադրբեջանի նախագահ Հեյդար Ալիևը Բիլ և Հիլարի Քլինթոններին նվիրեց գորգ՝ նրանց դիմանկարներով: ԱՄՆ նախագահի և առաջին տիկնոջ դեմքերը տեղավորված էին մեծ սրտի կենտրոնում: Նվերի հեղինակը ադրբեջանցի նկարիչ Քամիլ Ալիևն էր:

Հիլարի Քլինթոնը ևս պատմության մեջ անմահացավ իր նվերով, թեպետ չնայած ամերիկյան ջանքերին՝ նվերն առանձնապես մեծ գնահատանքի չարժանացավ:
2009 թ., լինելով ԱՄՆ պետքարտուղար, Հիլարի Քլինթոնը այցելեց Մոսկվա, նա ՌԴ ԱԳ նախարար Սերգեյ Լավրովին նվիրեց մի բան, որ խորհրդանշում էր երկու երկրների նոր՝ բարեկամական փուլը: Նվերը կարմիր կոճակ էր, որի վրա գրված էր reset, այն է՝ սառը պատերազմի ժամանակներից ի վեր եղած վիրավորանքները մոռանալու և նոր էջից սկսելու առաջարկ: Սակայն պարզվել է՝ ամերիկացիները թարգմանության ժամանակ սխալ են թույլ տվել և արդյունքում կոճակի վրա վերբեռնում-ի փոխարեն գրվել է գերբեռնում:

2002 թ., երբ բրիտանական թագուհի Եղիսաբեթ 2-րդն առաջին անգամ ցույց տվեց իր կառավարման շրջանում ստացած նվերները, հանրությունը անսպասելի մի նվեր հայտնաբերեց:
Տարբեր ժողովուրդների ազգային, թանկարժեք ապրանքների կողքին Բուքենգհեմյան պալատում կարելի էր տեսնել գինու սառեցման մեծ հարմարանք՝ պատրաստված պողպատից և սևրյան ճենապակուց. այն մորեխի տեսք ուներ: