Հայաստան-ԵՄ համագործակցության զարգացումը՝ Փաշինյանի բրյուսելյան այցի առանցքում

Հունիսի 2-ին աշխատանքային այցով Բրյուսելում էր վարչապետի պաշտոնակատար Նիկոլ Փաշինյանը: Նա հանդիպում է ունեցել Եվրոպական խորհրդի նախագահ Շառլ Միշելի հետ։ Այնուհետ հանդիպել է Բելգիայի Թագավորության վարչապետ Ալեքսանդր դե Կրոյի հետ։ Վարչապետի պաշտոնակատարն իր խոսքում անդրադարձել է ինչպես Հայաստան-ԵՄ համագործակցության ընթացքին, այնպես էլ հայ-ադրբեջանական սահմանին ստեղծված իրավիճակին:

Շառլ Միշելի հետ առանձնազրույցի ընթացքում քննարկվել է Հայաստան-ԵՄ համագործակցության ընթացքը, այս տարվա մարտի 1-ից ուժի մեջ մտած Համապարփակ և ընդլայնված գործընկերության համաձայնագրի շրջանակում նախատեսվող ծրագրերը: Վարչապետի պաշտոնակատարն ընդգծել է, որ Հայաստանը մեծապես կարևորում է համաձայնագրի «Ճանապարհային քարտեզի» շրջանակում ակտիվ փոխգործակցությունը: Եվրոպական խորհրդի նախագահը կարևորել է Հայաստանում ժողովրդավարության ամրապնդմանն ուղղված կառավարության քայլերը, Համապարփակ և ընդլայնված գործընկերության համաձայնագրի արդյունավետ իրականացումը: Արցախյան 44-օրյա պատերազմից հետո Հարավային Կովկասում, մասնավորապես, հայ-ադրբեջանական սահմանին ստեղծված իրավիճակը ևս եղել է կողմերի ուշադրության կենտոնում: Փաշինյանն ընդգծել է Հայաստանի ինքնիշխան տարածքից ադրբեջանական զինված ուժերի ներկայացուցիչների` ելման դիրքեր դուրս գալու անհրաժեշտությունը և տեղեկացրել այդ ուղղությամբ իրականացվող դիվանագիտական ու բանակցային գործողությունների, ինչպես նաև իրավիճակի հանգուցալուծման մասին իր ներկայացրած առաջարկի վերաբերյալ: Նա կարևորել է միջազգային հանրության կողմից Ադրբեջանի սադրիչ գործողություններին համարժեք արձագանքելու անհրաժեշտությունը, հայ ռազմագերիների վերադարձի ապահովման ուղղությամբ քայլերի իրականացումը և ողջունել Եվրոպական խորհրդարանի կողմից ընդունված բանաձևը, որով Ադրբեջանից պահանջվում է անհապաղ և առանց նախապայմանների ազատ արձակել բոլոր հայ ռազմագերիներին։ Եվրոպական խորհրդի նախագահը ողջունել է հայկական կողմի` հայ-ադրբեջանական սահմանին առկա խնդիրը խաղաղ, քաղաքական ճանապարհով լուծելու դիրքորոշումն ու հայտնել ԵՄ պատրաստակամությունն օժանդակելու այդ գործընթացին: Հանդիպումը շարունակվել են աշխատանքային ճաշի շրջանակում:

Այնուհետ Նիկոլ Փաշինյանը հանդիպել է Բելգիայի Թագավորության վարչապետ Ալեքսանդր Դե Կրոյի հետ: Կողմերն ընդգծել են երկու պետությունների կառավարությունների շահագրգռվածությունը` առևտրատնտեսական կապերի ընդլայնման, ներդրումների, տնտեսության տարբեր ճյուղերում համատեղ ծրագրերի իրականացման, ինչպես նաև Հայաստանում ժողովրդավարական բարեփոխումներն առաջ մղելու գործում: Ալեքսանդր Դե Կրոն, կարևորելով Հայաստանի հետ տնտեսական կապերի զարգացումը, նշել է, որ նախատեսվում է Բելգիայի առևտրային առաքելության այցը ՀՀ, որը կուսումնասիրի երկու երկրների միջև առևտրային և ներդրումային հարաբերությունների զարգացման հեռանկարներն ու հնարավորությունները: Այցը ծրագրվում է Բելգիայում հայկական համայնքի հիմնադրման 100-ամյակի տոնակատարության միջոցառումներին զուգահեռ։ Հայաստանի և Ադրբեջանի սահմանին ադրբեջանական զինված ուժերի ստորաբաժանումների սադրիչ գործողությունները դուրս չեն մնացել նաև այս հանդիպման օրակարգից: Կողմերն ընդգծել են Հայաստանի ինքնիշխան տարածքից վերջիններիս ելման դիրքեր դուրս գալու և իրավիճակին խաղաղ հանգուցալուծում տալու անհրաժեշտությունը: Բելգիայի վարչապետը նշել է, որ մտահոգություն է առաջացնում տեղի ունեցողը և խնդիրը գտնվում է իրենց ուշադրության կենտրոնում։ Երկուստեք կարևորվել է նաև Ադրբեջանում պահվող հայ ռազմագերիների վերադարձի ապահովումն ու Լեռնային Ղարաբաղի հակամարտության կարգավորման գործընթացը ԵԱՀԿ Մինսկի խմբի շրջանակում վերսկսումը: