Նիկոլ Փաշինյանը հարմարավե՞տ է զգում «սուպերվարչապետական պատմուճանով». հարց վարչապետին

ՀՀ վարչապետ Նիկոլ Փաշինյանը հուլիսի 20-ին լրագրողների հետ հանդիպմանը դիտարկմանը, թե՝ իր կամքից անկախ, հեղափոխությունից հետո կրում է «սուպերվարչապետական պատմուճանը», արձագանքեց.

«Սազո՞ւմ է, հա՞»:

Հարցին՝ հարմարավե՞տ է զգում այդ պատմուճանով, թե՞ ոչ, արդյո՞ք մտադրություն ունի հրաժարվել սուպերվարչապետական լիազորություններից, բալանսավորել վարչապետի ու նախագահի լիազորությունները, նա պատասխանեց.

«Այո՛, միանշանակ, այո՛, բայց ես ուզում եմ ասել հետևյալը. ես նոր խոսում էի, որ մենք արել ենք ամեն ինչ, որ, օրինակ՝ ոստիկանության համակարգի, քննչական, այլ պետական համակարգերի կայունությունը չխաթարվի, առավել ևս՝ ընդհանուր պետական կառավարման համակարգում մենք բալանսավորման քաղաքականությանը պետք է գնանք այնպես, որ պետական կառավարման համակարգի կայունությունը չխաթարվի, ես այդ մասին հայտարարել եմ: Ի միջի այլոց, երբ ժամանակին ասում էի, որ այս համակարգով ավելի հեշտ է հեղափոխություն անել, քան նախորդ համակարգով, շատերը մեղադրում էին, ասում էին՝ վայ, էս ինչ է: Ես համաձայն եմ, որ այդ բալանսավորումը պետք է տեղի ունենա, բայց ես համոզված եմ, որ դա մի օրում տեղի չի ունենա»,- ասաց նա:

Փաշինյանն ասաց, որ եթե դա մի օրում տեղի ունենա կամ այնպես, որ չապահովվի պետական կառավարման համակարգի կայունությունը, մեր երկիրը կունենա լուրջ խնդիրներ: Վարչապետը պատասխան հարց ուղղեց՝ իսկ ո՞վ է ասել, որ բալանսավորում պետք է լինի նախագահի և վարչապետի միջև, շատերը անգամ չգիտեն էլ՝ ով է Գերմանիայի Դաշնության նախագահը:

«Երբ մենք խորհրդարանական կառավարման համակարգ ենք ստեղծել, այսօրվա մեր Սահմանադրությամբ Հանրապետության նախագահն ունի արարողակարգային գործառույթներ, բալանսավորումը պետք է տեղի ունենա ոչ թե նախագահի և վարչապետի, այլ կառավարության և ԱԺ-ի միջև. սա է խորհրդարանական համակարգի տրամաբանությունը, եթե որևէ մեկը մտածում է, որ որևէ պետություն կարող է ունենա երկու ղեկավար, ապա այդ հանրապետության վերջն է: ՀՀ-ն չի կարող ունենալ երկու ղեկավար»,- ասաց վարչապետը:

Փաշինյանը նշեց, որ այսօր հաստատված է խորհրդարանական համակարգ, պետական ղեկավարումը դրված է կառավարության և վարչապետի վրա, ապա ընդգծեց՝ բալանսավորումը պետք է լինի օրենսդիր, գործադիր, դատական իշխանությունների միջև, քաղհասարակության լծակները ուժեղացվեն, չորրորդ իշխանությունը պետք է ուժեղացվի այդ ամենի նկատմամբ վերահսկողություն իրականացնելու համար:

«Ես չեմ բացառում, կարծում եմ՝ ճիշտ կլինի, որ նախագահի ինստիտուտի համար ևս մեկ-երկու արարողակարգային լիազորություններ ավելացվեն: Մինչև ընտրությունները մենք շատ դրամատիկ քայլերի չենք գնա, որովհետև ի վերջո տեղի է ունեցել մի իրադարձություն, կարծում եմ՝ կառավարությունն այսօր ունի մանդատ՝ իրականացնելու հեղափոխության բոլոր նպատակները, իսկ այդ գործընթացը, եկեք հստակ արձանագրենք մի բան, որ այսօր իշխանության որևէ այլ թև չունի լեգիտիմության այնպիսի աստիճան, ինչպիսին ունի կառավարությունը. սա իրողություն է, որը պետք է հաշվի առնել»,- նշեց նա: