Ինչպե՞ս «Արսենալի» մարզիչը դարձավ միլիոնավոր երկրպագուների կուռքը և ինչո՞ւ է այդքան դժվար հրաժարվել Վենգերից

Այսօր երեկոյան ժամը 22.00-ին «Շանթ»-ի և «Շանթ Պրեմիում»-ի եթերում ուղիղ հեռարձակմամբ  կարող եք դիտել  Եվրոպա լիգայի 1/16-րդ եզրափակչի  Էստերսունդ -Արսենալ  հանդիպումը:   

Հիշեցնենք, որ «ՇԱՆԹ» հեռուստաընկերությունը ձեռք է բերել ՈՒԵՖԱ-ի «Եվրոպա» լիգայի հանդիպումների  հեռարձակման բացառիկ իրավունքը։   Մեզ համար, իհարկե, կարևորը Հենրիխ Մխիթարյանի հաջող ելույթներն են «Արսենալի» կազմում: 

Իսկ ընդհանրապես   Ինտրիգը  Էստերսուդ – Արսենալ հանդիպման և   Արսենալի  շուրջ բավական մեծ է, ու պայմանավորված է այն նաև Արսենալի մարզչի՝  Արսեն Վենգերի գործոնով:   Բանն այն է, որ հաճախակի են դարձել Վենգերին «Արսենալի» գլխավոր մարզչի պաշտոնից հեռացնելու մասին խոսակցությունները:      

«Արսենալը»,  չնայած վերջին շրջանում ոչ այնքան վստահ ելույթներին և Արսեն Վենգերի  հետագայի  շուրջ պտտվող լուրերին,  մնում է   Եվրոպա լիգայի մրցաշարի  հաղթողի գլխավոր հավակնորդներից մեկը:   

Ակումբի ղեկավարությունը ոչ մի կերպ չի համարձակվում  պաշտոնանկ անել Վենգերին, որը թվում է, թե  սպառել   է իր՝ մարզչական բոլոր հնարավորությունները:   Ազատվել Վենգերից նաև հոգեբանորեն է բարդ:  Արսեն Վենգերը  «Արսենալի» համար մի ամբողջ պատմություն է:    

22 տարի արդեն նա մարզում է թիմը: Սա  յուրատեսակ ֆուտբոլային և մարզչական ռեկորդ է: Այդ ընթացքում Վենգերի ակումբը 3 անգամ դարձել է պրեմիեր լիգայի չեմպիոն, 7 անգամ նվաճել Անգլիայի գավաթը, 3 անգամ սուպերգավաթը, դուրս է եկել չեմպիոնների լիգայի և ՈՒեֆա-ի գավաթի եզրափակիչ:   

Վենգերը առաջին օտարերկրացի մարզիչն էր, ում հաջողվեց հաղթել Անգլիայի առաջնությունում, ձևակերպել նաև այսպես կոչված «ոսկե  դուբլ», այսինքն մեկ մրցաշարում և չեմպիոն դառնալ և գավաթակիր:  Առաջին օտարերկրացին էր, ով  Անգլիայում  արժանացավ «տարվա մարզիչ» կոչմանը:   

2003-2004 թվականներին Վենգերի «Արսենալը»  մի նոր յուրատեսակ ռեկորդ սահմանեց՝ ամբողջ մրցաշրջանի ընթացքում չկրելով ոչ մի պարտություն:  Եվ վերջապես հանուն Արսենալի Վենգերը հրաժարվեց գլխավորել իր հարազատ՝  Ֆրանսիայի ազգային հավաքականը:   

Մի անգամ Վենգերը նույնիսկ հրաժարվեց «Արսենալի» հաղթանակից՝ պնդելով, որ իր թիմը  խախտել է ջենտլմենական խաղի կանոնները: Վենգերը պնդեց այդ ժամանակ, որ  հանդիպումը վերախաղարկվի և հաղթեց արդեն արդար խաղի կանոններով:   

Չափից դուրս մեծ հեղինակություն ունի Վենգերը երկրպագուների շրջանում:  Նրանց համար Վենգերի խոսքը օրենք է, աքսիոմ,  որ ապացույցի կարիք չունի:  Դրա համար Անգլիայում թևավոր խոսք է դարձել «Արսենը գիտի» արտահայտությունը:   

Համաձայնեք,   այսքանից հետո  հրաժարվել Վենգերից, կլիներ մի տեսակ անարդար: Բայց հիմա «Արսենալը» չի փայլում այնպես, ինչպես առաջ էր:   

Արսենալից   դժգոհողները ավելացել են:  Այս ամենով հանդերձ,  սակայն, լոնդոնյան  ակումբի հմայքը   չի նվազել: Դժգոհողների կողքին դարձյալ շատ ավելի մեծ թիվ են կազմում «Արսենալին» ու Վենգերին վստահողները:  Բուքմեքերական  բոլոր ընկերությունները «Էստերսունդ»- «Արսենալ»  խաղում միանշանակ  հավատում են լոնդոնցիների հաղթանակին: