ՌԴ ռազմական գործողությունն Ուկրաինայում նոր փուլ է մտնում․ 36-րդ օրվա վերջին մանրամասները

Ռուսական զորքերի մի մասը հետ է քաշվել Կիևի և Չեռնիգովի շրջաններից։ Ռուսաստանի պաշտպանության նախարարությունը հայտարարել է, որ նշված երկու ուղղություններում տեղի է ունենում զորքերի պլանային վերախմբավորում։ Ըստ գերատեսչության պաշտոնական ներկայացուցիչ Իգոր Կոնաշենկովի՝ ռազմական գործողությունների առաջին փուլի նպատակն է եղել հակառակորդին ստիպել ուժերը, ռեսուրսները և ռազմական տեխնիկան կենտրոնացնել մեծ քաղաքների մոտ՝ զրկելով նրան հնարավորությունից ուժերն օգտագործել ռուսական բանակի գործողությունների գլխավոր ուղղության վրա Դոնբասում։ Ըստ Կոնաշենկովի՝ այդ բոլոր նպատակներն իրականացվել են, և արդեն հող է նախապատրաստվել գործողությունների եզրափակիչ փուլի համար։

«Միաժամանակ ռուսական բանակը լուծել է մեկ այլ խնդիր ևս, այն է՝ Ուկրաինայի արևմտյան և կենտրոնական շրջաններից հակառակորդի նոր ուժերի հոսքի բացակայության պայմաններում, պրոֆեսիոնալ ռազմական գործողությունների միջոցով ստեղծել բոլոր անհրաժեշտ պայմանները Դոնբասի հանրապետությունների ազատագրման գործողության եզրափակիչ փուլն իրականացնելու համար։ Այսպիսով, Կիևի և Չեռնիգովի ուղղություններում Ռուսաստանի զինված ուժերի բոլոր հիմնական խնդիրները կատարվել են։ Ռուսաստանի զինված ուժերի վերախմբավորման նպատակն առաջնահերթ ուղղություններում գործողությունների ակտիվացումն է և, առաջին հերթին, Դոնբասի լիակատար ազատագրման գործողության ավարտը»,- հայտնել է Իգոր Կոնաշենկովը։

Մեծ Բրիտանիայի պաշտպանական հետախուզությունն իր հերթին հայտարարություն է տարածել ռազմական գործողությունների առկա իրադրության վերաբերյալ՝ նշելով, որ չնայած Ռուսաստանի հայտարարություններին՝ Չեռնիգովի շուրջ շարունակվել են հրետակոծությունները և հրթիռային հարվածները, նաև կանխատեսումներ է արել առաջիկա օրերի վերաբերյալ։

«Ռուսական ուժերը շարունակում են դիրքեր պահել Կիևի արևելքում և արևմուտքում՝ չնայած սահմանափակ թվով ստորաբաժանումների հետքաշմանը։ Ամենայն հավանականությամբ, առաջիկա օրերին քաղաքի արվարձաններում ծանր մարտեր տեղի կունենան»,- նշվում է հաղորդագրության մեջ։

Բրիտանիայի պաշտպանության նախարարությունը նաև հայտնել է, որ Մարիուպոլում թեժ մարտերը շարունակվում են, այնուամենայնիվ, քաղաքի կենտրոնը գտնվում է ուկրաինական ուժերի վերահսկողության տակ։

Latest Defence Intelligence update on the situation in Ukraine – 31 March 2022

Find out more about the UK government's response: https://t.co/dESTQT4irj

🇺🇦 #StandWithUkraine 🇺🇦 pic.twitter.com/0NUMTq8nrj

— Ministry of Defence 🇬🇧 (@DefenceHQ) March 31, 2022

Իր հերթին Ուկրաինայի Զինված ուժերի գլխավոր շտաբը հայտնել է, որ շարունակվում են պաշտպանական գործողություններն արևելյան, հարավարևելյան և հյուսիսարևելյան ուղղություններում, և այդ բոլոր ուղղություններում իրենց հաջողվել է զսպել ռուսական ուժերի առաջխաղացումը։

Ուկրաինայի զինված ուժերը նաև տեսանյութ են տարածել՝ թվարկելով ուկրաինական բանակի կողմից ոչնչացված ռուսական տեխնիկան։ Դրանց շարքում են 614 տանկ, 1700-ից ավելի զրահամեքենա, 311 հրետանային համակարգ, 135 ինքնաթիռ, 131 ուղղաթիռ և այլն։

Ռուսաստանի ռազմական գերատեսչությունը հերթական ճեպազրույցի ընթացքում հայտնել է, որ ռուսական ուժերը վերահսկողության տակ են առել Զոլոտայա Նիվա բնակավայրը և 6 կմ առաջ են գնացել։ Գերատեսչության պաշտոնական ներկայացուցիչը հայտնել է նաև ուկրաինական ուժերին հասցված վնասների մասին։

«Մարտի 30-ի երեկոյան օդային տեղակայման բարձր ճշգրտության թևավոր հրթիռներով ոչնչացվել են վառելիքի խոշոր բազաներ Դնեպրոպետրովսկ, Լիսիչանսկ, Չուգուև և Նովոմոսկովսկ բնակավայրերում, որտեղից Դոնբասում գտնվող ուկրաինական զորքերին մատակարարվում էր վառելիք։ Գիշերվա ընթացքում օպերատիվ-մարտավարական և անօդաչու ավիացիան խոցել է Ուկրաինայի 52 ռազմական օբյեկտ»,- հայտնել է Կոնաշենկովը։

Միևնույն ժամանակ Ուկրաինայի փոխվարչապետ Իրինա Վերեշչուկը հայտնել է, որ մարտի 31-ին կաշխատի 1 հումանիտար միջանցք, որով Մարիուպոլի բնակիչները կարող են գնալ դեպի Բերդյանսկ։

Ռազմական գործողություններին զուգահեռ՝ բանակցություններ են ընթանում Ռուսաստանի և Ուկրաինայի պատվիրակությունների միջև։ Կողմերի հերթական հանդիպումը տեղի կունենա ապրիլի 1-ին տեսակապի միջոցով։ Ռուս-ուկրաինական նախորդ բանակցությունները տեղի էին ունեցել Ստամբուլում մարտի 29-ին։