Երկրորդ ընթերցմամբ քննարկվել են մի շարք ոլորտներ կանոնակարգող նախաձեռնություններ

Ազգային ժողովը հունիսի 14-ի նիստում երկրորդ ընթերցմամբ քննարկել է մի շարք նախագծեր, փոխանցում է ԱԺ կայքը։

Գործող կարգավորումներով որոշակի վարչական վարույթների ժամանակ քաղաքացին իրավունք ունի տեղեկանալու և մասնակից լինելու իր մասով նշանակված վարչական վարույթներին, ու առանց իր ներկայության չի կարող գործընթացը տեղի ունենալ: Մի շարք իրավաբանական ու ֆիզիկական անձինք փորձում են չլինել ծանուցված: Այս խնդրի մասին բարձրաձայնել է ԱԺ պատգամավոր Գևորգ Պապոյանը՝ ««Վարչարարության հիմունքների և վարչական վարույթի մասին» օրենքում փոփոխություններ և լրացումներ կատարելու մասին» իր և Միքայել Թումասյանի հեղինակած օրինագիծը երկրորդ ընթերցմամբ ներկայացնելիս:

Առաջարկվում է ֆիզիկական և իրավաբանական անձանց սահմանված կարգով ծանուցելու հետ միաժամանակ տվյալ ծանուցումը տեղադրել նաև ՀՀ հրապարակային ծանուցումների պաշտոնական ինտերնետային կայքում: Ծանուցումը տեղադրելու օրվան հաջորդող օրացույցային հինգերորդ օրն անձն այլևս կհամարվի պատշաճ ծանուցված:

Գևորգ Պապոյանը տեղեկացրել է նաև, որ առաջին ընթերցումից հետո իրավական տեխնիկային առնչվող փոփոխություն է կատարվել: Առաջին ընթերցմամբ առաջարկվող կարգավորումը վերաբերում էր վարչական վարույթի հարուցման փուլին: Փոփոխության արդյունքում կարգավորումը վերաբերելու է ոչ միայն այդ փուլին, այլ նաև ընթացքին և եզրափակիչ փուլերին:

ԱԺ պետական-իրավական հարցերի մշտական հանձնաժողովի դրական եզրակացության մասին բարձրաձայնել է Արտակ Դավթյանը՝ նշելով, որ գործող օրենսդրությունն ունի ծանուցման խնդիր: Առաջարկվող կարգավորումը վերաբերելու է այն անձանց, որոնք փոստային ծանուցում չեն ստանում:

ՀՀ արդարադատության նախարարի տեղակալ Երանուհի Թումանյանցի խոսքերով՝ նախագծի ընդունման պարագայում պետական կամ ՏԻՄ բյուջեներում կարող է նաև ծախսերի նվազեցում նախատեսվել:

ԱԺ պատգամավոր Արմեն Խաչատրյանի գնահատմամբ՝ միայն փոստային ծառայության միջոցով հնարավոր չէ ունենալ կատարելագործված ծանուցումների համակարգ: Նրա խոսքերով՝ պետություն և քաղաքացի հարաբերությունները պետք է լինեն էլեկտրոնային:

Երկրորդ ընթերցմամբ քննարկվել են կառավարության հեղինակած «ՀՀ քրեակատարողական օրենսգիրք», ««Դատախազության մասին» օրենքում փոփոխություններ կատարելու մասին» , ««Թմրամիջոցների և հոգեմետ (հոգեներգործուն) նյութերի մասին» օրենքում լրացում կատարելու մասին» և կից ներկայացված օրինագծերի փաթեթները, պատգամավոր Գևորգ Պապոյանի հեղինակած «ՀՀ քաղաքացիական օրենսգրքում փոփոխություններ կատարելու մասին», կառավարության ներկայացրած ««Ազգային ժողովի կանոնակարգ» սահմանադրական օրենքում փոփոխություններ և լրացումներ կատարելու մասին», «ՀՀ հարկային օրենսգրքում լրացումներ կատարելու մասին» օրինագծերը: