Որոնք են կիվիի 6 օգտակար հատկություններն առողջության համար

Կիվիի մասին զարմանալի փաստն այն է, որ թեև այն մոտավորապես ձվի չափ է, սակայն համարվում է հատապտղի տեսակ, որը նաև հայտնի է որպես չինական փշահաղարջ:

Այս փոքրիկ միրգը, որը ծագումով Չինաստանից է, սննդային էներգիայի աղբյուր է:
Ինչպես մրգերի մեծ մասը, կիվին էլ հարուստ է անհրաժեշտ վիտամիններով և հանքանյութերով։ Այն ունի որոշ առողջարար հատկություններ, որոնք շատ այլ մրգեր չունեն:

Դիետոլոգ Ջիլիան Քուլբերթսոնը բացատրում է կիվիի առավելությունները և ինչու է այն հիանալի հավելում ձեր սննդակարգին:

1. Օգնում է պահպանել աղիների առողջությունը

Բջջանյութը լավ է ձեր մարսողության համար: Կիվին մանրաթելի հիանալի աղբյուր է՝ 1 բաժակի մեջ 5 գրամ: Մանրաթելերի մեծ մասը կեղևի մեջ է, այնպես որ պարզապես լվացեք և կտրեք ձեր կիվին, և մի մաքրեք կեղևը: Կիվին կարող է օգտակար լինել աղիների համար:

2. Վիտամին C-ի բարձր պարունակություն

Մեկ կիվին ավելի մեծ քանակության վիտամին C է պարունակում, քան երկու նարինջը:

Վիտամին C-ն`
● Բարձրացնում է ձեր իմունային համակարգը, որպեսզի այն կարողանա պայքարել հիվանդությունների դեմ
● Պայքարում է հոգնածության դեմ
● Օգնում է ձեր մարմնին յուրացնել երկաթը, որը ձեզ անհրաժեշտ է արյան կարմիր բջիջներ ստեղծելու համար, որպեսզի թթվածինը տեղափոխվի ձեր օրգաններ և հյուսվածքներ
● Ձեր մաշկի մեջ արտադրում է կոլագեն, որն օգնում է վերքերը բուժել և մաշկին ավելի երիտասարդ տեսք տալ:
Կիվի ուտելը՝ այլ բանջարեղենի և մրգերի հետ միասին, կարող է օգնել ձեզ ամեն օր բավարար քանակության վիտամին C ստանալ։

3. Ապահովված է վիտամին E-ով

Այս վիտամինը կարևոր սնուցիչ է ձեր իմունային համակարգի և սրտի առողջության համար: Վիտամին E-ն օգնում է ընդլայնել արյան անոթները՝ նվազեցնելով սրտի կաթվածի կամ ինսուլտի ռիսկը: Մեկ կիվին պարունակում է վիտամին E-ի օրական քանակի 7%-ը:

«Կիվին այն սակավաթիվ մրգերից է, որը պարունակում է մեծ քանակությամբ վիտամին E», – ասում է Քուլբերթսոնը:

«Ուսումնասիրությունները ցույց են տալիս, որ կիվիում առկա վիտամին E-ն ձեր մարմինը կարող է հեշտությամբ ընդունել: Վիտամին E-ի օրական ամբողջական քանակությունն ստանալու համար ձեր սննդակարգում ավելացրեք ընկույզներ, սերմեր կամ յուղեր, ինչպիսիք են ցորենի ծիլերը և ծաղկակաղամբի յուղը»,- խորհուրդ է տալիս դիետոլոգը:

4. Հակաօքսիդանտ է

Քանի որ կիվին պարունակում է վիտամին C և E, այն նաև հակաօքսիդանտների հիանալի աղբյուր է: Այս սնուցիչները պայքարում են ազատ ռադիկալների հետևանքով առաջացած բջիջների վնասների դեմ, որոնք գալիս են արևի ճառագայթներից, օդի աղտոտվածությունից և առօրյա կյանքից: Ձեր սննդակարգում հակաօքսիդանտներ ստանալը կարող է մաքրել այդ ազատ ռադիկալների վնասը և բարելավել ձեր առողջությունը:

«Կիվիի նման հակաօքսիդանտներով հարուստ մթերքների օգտագործումը կարող է նվազեցնել հիվանդությունների, այդ թվում՝ որոշ քաղցկեղի տեսակների և սրտի հիվանդությունների ռիսկը»,-ասում է Քուլբերթսոնը:

«Ստացեք ձեր հակաօքսիդանտները ամբողջական մրգերից և բանջարեղենից, այլ ոչ թե հավելումներից: Մենք չունենք ապացույց, որ հավելումները կարող են կանխել հիվանդությունները, ինչպես դա կարող են մրգերի և բանջարեղենի բնական հակաօքսիդանտները»:

Կիվին և այլ մրգերն ու բանջարեղենները կարող են նաև օգնել ձեզ ավելի լավ զգալ ձմռան ամիսներին: Կիվիում պարունակվող հակաօքսիդանտները կարող են ուժեղացնել ձեր իմունային համակարգը մրսածության և գրիպի սեզոնում և կարող են օգնել բարձրացնել ձեր տրամադրությունը:

5. Կալիումի աղբյուր է

Ձեր սիրտը, երիկամները, մկանները և նյարդերը կալիումի կարիք ունեն նորմալ գործելու համար: Մեկ կիվին ապահովում է 215 միլիգրամ կալիում: Ձեր սննդակարգում կալիումի ընդունումը կարող է նվազեցնել  մի շարք հիվանդությունների  ռիսկը`

● Սրտանոթային հիվանդություններ, ինչպիսիք են արյան բարձր ճնշումը և ինսուլտը
● Երիկամային քարեր
● Օստեոպորոզ
● 2-րդ տիպի շաքարախտ

«Շատ մարդիկ չափազանց շատ նատրիում են ստանում իրենց սննդակարգում, ինչը նվազեցնում է կալիումի մակարդակը և կարող է հանգեցնել առողջական խնդիրների: Կալիումով հարուստ մթերքներ ուտելը և նատրիումի սահմանափակումը կարող են վերականգնել այս հավասարակշռությունը»,- ասում է Քուլբերթսոնը:

6. Հարուստ է վիտամին K-ով

«Վիտամին K-ն օգնում է ամուր պահել ոսկորները և նվազեցնում է օստեոպորոզի ռիսկը»,- ասում է Քուլբերթսոնը,- վիտամին K-ը կարող է նաև օգնել ձեզ կանխարգելել կորոնար անոթների հիվանդությունը, որը սրտի կաթվածի և սրտի անբավարարության հիմնական պատճառն է»:

Մեկ կիվին ունի 31 մկգ վիտամին K, ինչը մեծահասակների մեծամասնության համար բավարար չափաբաժնի մոտ 25-30%-ն է: Վիտամին K-ի այլ լավ աղբյուրներից են սպանախը, կաղամբը, բրոկկոլին և սոյայի յուղը:

«Ոչ մի սննդամթերք չի կարող ձեզ տալ անհրաժեշտ բոլոր վիտամիններն ու հանքանյութերը»,-ասում է Քուլբերթսոնը։ «Ձեր ափսեն գունեղ դարձրեք. ներառեք կարմիր, կանաչ, մանուշակագույն, նարնջագույն և դեղին մթերքներ: Բազմազանությունն առանցքային է, երբ խոսքը վերաբերում է առողջ սննդակարգին հետևելուն»: