Իմ վարչապետության հնգամյա փորձն ինձ հանգեցրել է հետևյալ ձևակերպման՝ սիրում ես հայրենիքդ, ուժեղացրու պետությունդ. Փաշինյան

Հայաստանի վարչապետ Նիկոլ Փաշինյանը փոփոխվող աշխարհում պետականության հայեցակարգային հիմունքները ճշգրտելն առանցքային է համարում՝ առաջարկելով պետական հայեցակարգային ուղենիշ:

«Արմենպրես»-ի հաղորդմամբ՝ վարչապետն այս մասին ասաց ԱԺ մշտական հանձնաժողովների համատեղ նիստում 2024 թվականի պետական բյուջեի նախագծի նախնական քննարկումներում։

«Մեր պետականության հայեցակարգային հիմունքները ճշգրտելն առանցքային է փոփոխվող աշխարհում մեր մրցունակությունն ու կենսունակությունն ապահովելու համար»,-ասաց վարչապետը:

Փաշինյանը սա համարեց կառավարության և անձամբ իր աշխատանքի կարևորագույն մասերից:

«Եվ իմ վարչապետության հանրային երջանկություններով և ողբերգություններով լեցուն հնգամյա փորձն ինձ հանգեցրել է հետևյալ հայեցակարգային ձևակերպման, որն ուզում եմ առաջարկել որպես պետական հայեցակարգային ուղենիշ: Այդ ուղենիշը հետևյալն է՝ հայրենիքը պետությունն է, սիրում ես հայրենիքդ, ուժեղացրու պետությունդ: Այս ձևակերպումը կամ կարգախոսը բխում է այն թեզից, գուցե, գիտակցումից կամ ընկալումից, որ մեր անկախության 32 տարվա ընթացքում մեր առանցքային հիմնախնդիրը եղել է պետության և հայրենիքի շահերի միջև առկա և շարունակաբար մեծացող լարումը, հայրենիքի և պետության ձգողականության երբեմն հակադիր ուղղությունները, պետության և հայրենիքի միջև ընտրություն կատարելու անհնարինությունը: Բայց որքան էլ անհնարին լինի ընտրությունը, այն պետք է կատարվի: Եվ այդ ընտրությունը կատարելու պահին է գալիս ամենակարևոր գիտակցումը, որ պետությունը միակ և անփոխարինելի հայրենիքն է ու պետությունը, նրա անկախությունը, ինքնիշխանությունը, տարածքային ամբողջականությունը, ինստիտուտները կայացնելն ու զարգացնելն է, այդ գործին նպաստելը՝ հայրենասիրության գերադրական աստիճան»,-ասաց Փաշինյանը:

Նա հավելեց, որ դա հասունացման ճանապարհ է, որն անցնում են կառավարությունը, խորհրդարանը, փորձագիտական հանրությունը, ժողովուրդը:

Վարչապետն այս հասունացման առանցքային խորհրդանշական պահերից մեկը համարեց ՀՀ տարածքը 29 հազար 800 քառ. կմ լինելու մասին ԱԺ ամբիոնից իր արած հայտարարությանը հետևած բազմահազարանոց ցույցը: «Դրանից ակնհայտ դարձավ, որ մենք՝ որպես հանրություն, մեր պետության միջազգայնորեն ճանաչված տարածքի չափի մասին այնքան էլ լավ պատկերացում չունենք»,-ասաց Փաշինյանը՝դա համարելով ոչ այնքան չիմացության խնդիր, որքան կրած անհաջողությունների ու ձախողումների անկյունաքար:

Ըստ նրա՝ այս ամենից հետևությունը պետք է լինի միանշանակ. «Փլուզվող աշխարհակարգում մեր անվտանգության ապահովման միակ գործիքը հայրենիքի նույնականացումն է պետության, նրա տարածքի, միջազգայնորեն ճանաչված նրա սահմանների, նրա տարածքային ամբողջականության հետ: Եվ այս նպատակին է ծառայում վերը առաջարկված կարգախոսը»: