Քննարկվել են 2024 թվականի երիտասարդական մայրաքաղաք Գավառում անցկացվող միջոցառումները

«Գավառը՝ ՀՀ 2024 թվականի երիտասարդական մայրաքաղաք» դրամաշնորհային ծրագրի շրջանակում Գավառ համայնքում քննարկվել են նախատեսվող միջոցառումների մանրամասները, ընթացակարգերը, ժամկետները, առկա խնդիրներն ու լուծման ուղիները:

Քննարկմանը ներկա են եղել ՀՀ կրթության, գիտության, մշակույթի և սպորտի նախարարության երիտասարդության հարցերի վարչության պետ Զարա Ասլանյանը, Գավառ խոշորացված համայնքի ղեկավար Գուրգեն Մարտիրոսյանը և համայնքի ղեկավարի առաջին տեղակալ Գրիգոր Դաշտոյանը:

«Համատեղ աշխատանքի և միասնական ջանքերի շնորհիվ, վստահ եմ, ծրագիրը հրաշալի արդյունք կունենա»,- ասել է Զարա Ասլանյանը: Գավառ համայնքի ղեկավարը վերահաստատել է պատրաստակամությունը՝ հնարավոր բոլոր ուղիներով համագործակցելու և որպես երիտասարդական մայրաքաղաք լավագույնս ներկայանալու գործում:

Բացի նախատեսվող ծրագրերից՝ կողմերն ընդգծել են Գավառ համայնքում մեծածավալ այլ միջոցառումների անցկացման կարևորությունն ու անդրադարձել դրանց համար անհրաժեշտ ռեսուրսներին:

Գավառ համայնք այցի շրջանակում ԿԳՄՍՆ ներկայացուցիչները մասնակցել են նաև «Գավառի երիտասարդների տուն» բաց երիտասարդական կենտրոնի՝ 2023 թվականի տարեկան հաշվետու միջոցառմանը:

Ողջունելով ներկաներին՝ Զարա Ասլանյանն ընդգծել է. «Գավառ համայնքում այսօր ստեղծվել են բոլոր նախադրյալները՝ նպաստելու ինչպես երիտասարդական մայրաքաղաքի ընտրությանը, այնպես էլ երիտասարդական կյանքի ակտիվացմանը: Կարևոր է նաև այն, որ Գավառում արդեն իսկ գործում է երիտասարդական կենտրոն, որտեղ երիտասարդներին մատուցվում են ոչ ֆորմալ կրթության ծառայություններ, ինչը նպաստելու է նրանց մրցունակության բարձրացմանն ու նոր կարողությունների զարգացմանը»:

ԿԳՄՍՆ երիտասարդության հարցերի վարչության պետը կարևորել է նաև փորձի փոխանակումը պետության կողմից ստեղծված երիտասարդական կենտրոնների և «Երիտասարդական նախաձեռնությունների կենտրոնի» կողմից հիմնված «Երիտասարդների տուն» բաց երիտասարդական կենտրոնների միջև:

«Երիտասարդական նախաձեռնությունների կենտրոն» ՀԿ-ի կողմից ՀՀ տարբեր համայնքներում այդպիսի 5 կենտրոն է գործում: Ողջունելով ներկաներին՝ հասարակական կազմակերպության միջազգային խորհրդի նախագահ Արթուր Նաջարյանը նշել է. «Երիտասարդական կենտրոնի՝ ավելի քան 1 տարի առաջ տեղի ունեցած պաշտոնական բացման արարողությունից հետո շատերը չէին հավատում, որ Գավառը հաջողելու է: Նախատեսել էինք 300 երիտասարդի մասնակցություն, սակայն այս մեկ տարվա ընթացքում արդեն 580 երիտասարդ է հաճախել կենտրոն»:

Հաշվետու միջոցառման ավարտին շահառու երիտասարդները հաջողված պատմություններով ներկայացրել են կենտրոնի ակտիվ դերակատարությունը համայնքի երիտասարդական կյանքում։