Գիրք նվիրելու օրը տեղի կունենա «Ազգային գրադարանային հավաքածուն 105 տարեկան է» խորագրով միջոցառում

Գիրք նվիրելու օրը՝ փետրվարի 19-ին՝ 11:30-ին, Ազգային գրադարանի թամանյանական մեծ դահլիճում տեղի կունենա «Ազգային գրադարանային հավաքածուն 105 տարեկան է» խորագրով միջոցառում, որին հրավիրված են մեր գործընկեր հրատարակիչներ, գրադարանի նվիրատուներ, հանրապետության մարզային և համայնքային գրադարանների աշխատողներ, գրքի, ընթերցանության և գրադարանների աջակիցներ։

Բացման խոսքում գրադարանի տնօրեն Աննա Չուլյանը շնորհակալական խոսք կասի գրադարանի նվիրատուներին և կներկայացնի ազգային գրադարանային հավաքածուի ստեղծման պատմությունը, հավաքածուի ձևավորման այսօրվա և վաղվա մարտահրավերները։

2023 թվականի ընթացքում արժեքավոր գրականություն ենք նվեր ստացել գրող, գրականագետ, թարգմանիչ Ֆելիքս Բախչինյանից, գրադարանի բարեկամ, պատմաբան Գևորգ Յազիչյանից, Վանուշ Խանամիրյանի ընտանիքից, Արտաշես Պարսամյանից, Հայկական հանրագիտարան հրատարակչությունից, Բուկինիստ ՍՊԸ-ից և այլն։ Գրադարանը արժեքավոր գրքեր նվեր կստանա նաև միջոցառման օրը:

Ազգային գրադարանում Գիրք նվիրելու օրը հատկանշական է լինելու ավելի քան 25 մարզային և համայնքային գրադարանների համար, որոնք վերջին տարիներին լույս տեսած արժեքավոր գեղարվեստական և մանկական գրականություն նվեր կստանան ՀՀ Նախագահի կողմից։

ՄԱԿ-ի Բնակչության հիմնադրամի հայաստանյան գրասենյակը Ազգային գրադարանին կտրամադրի «Համանդամություն ունեցող 50 կանայք, որ փոխեցին աշխարհը» գրքի 1100 օրինակ՝ քաղաքային և մարզային գրադարաններին բաշխելու համար։ Ներկա կլինեն նաև գրքի հեղինակները՝ ժամանակակից բանաստեղծ Հասմիկ Սիմոնյանը և Արմինե Դանիելյանը։ Գրքի օրինակներ կբաժանվեն հանդիպման մասնակիցներին։

Փետրվարի 19-ին և ամբողջ շաբաթվա ընթացքում գրադարանին նվերներ կհանձնեն տարբեր հայաստանյան և սփյուռքյան կազմակերպություններ և անհատներ։

Միջոցառման ընթացքում կհրապարակվեն երեք հրատարակչությունների անունները, որոնք 2023 թվականին անթերի են կատարել Ազգային գրադարանային հավաքածուի հանդեպ ունեցած պարտավորությունները. նրանց կհանձնվեն «Տարվա օրինապահ հրատարակիչ» վկայագրեր։

Այդ օրը գրադարանն ինքը ևս հանդես կգա նվիրատուի դերում։ Գրադարանի մուտքի մոտ կտեղադրվի նվիրատվության ԳՐՔԱՆԻՎ, որին կդրվեն գրադարանի կողմից առանձնացված գիրք-նվերները։ Դրանք նախորդ տարվա ընթացքում գրադարանին անհատներ նվիրաբերած այն գրքերն են, որոնցից մենք ավելի քան բավարար թվով օրինակներ ունենք։ Հերթապահ գրադարանավարը տեղում կպատասխանի ընթերցողների հարցերին։

Քանի որ փետրվարի 19-ը երկուշաբթի է, հանգստյան օր թանգարանների համար, ուստի գրադարանի գրատպության թանգարանի Գիրք նվիրելու օրվան նվիրված միջոցառումները կազմակերպվելու են օրվան հաջորդող շաբաթվա ընթացքում։ Այս մասին հայտնում են Հայաստանի ազգային գրադարանից։