Ո՞ր գյուղում է ՏԻՄ ընտրություններին մասնակցել ընդամենը 12 մարդ, և անցած ընտրությունների մյուս ուշագրավ արդյունքները

Ինչպես արդեն տեղեկացրել էինք, երեկ Հայաստանի 9 մարզերի 49 համայնքներում տեղի են ունեցել ՏԻՄ ընտրություններ, ընդ որում՝ 4 քաղաքներում ընտրել են քաղաքապետի:

Ընտրությունները լարված ու հետաքրքիր են անցել հատկապես 4 քաղաքներում՝ Էջմիածին, Արմավիր, Հրազդան, Կապան: Ի դեպ, առաջին 3-ում բավականին ցածր մասնակցություն է եղել՝ 34-ից 37 տոկոս, և միայն կապանցիներն են ակտիվ եղել: Այստեղ քվեարկել է ընտրողների 55 տոկոսը:

Արմավիրի քաղաքապետի աթոռի համար պայքարում էր 4 թեկնածու՝ 3-ն անկուսակցական, 1-ը՝ «Քաղաքացիական պայմանագրից»: Հենց այդ մեկն էլ հաղթեց ընտրություններում՝ մոտ մրցակցին գերազանցելով չորս անգամ: Քաղաքապետի ժամանակավոր պաշտոնակատար Դավիթ Խուդաթյանը, որը քարոզարշավի ժամանակ հայտարարել էր, որ նույնիսկ Արմավիրի նման քաղաքում չկան անլուծելի խնդիրներ, դարձավ գործող քաղաքապետ:

Լուծել համայնքի խնդիրները քարոզարշավի ժամանակ խոստացել էր նաև Սևակ Միքայելյանը: Սասուն Միքայելյանի որդին  Հրազդանում էր թեկնածու առաջադրվել: Սևակ Միքայելյանը նույնպես «Քաղաքացիական պայմանագիրն» էր ներկայացնում, բայց  կուսակցությունը հայտարարել էր, որ չի աջակցելու նրան: Դա չխանգարեց սակայն, որ նա միակ մրցակցին հաղթի գրեթե կրկնակի ավելի ցուցանիշով:

Շատ ավելի բարդ էր ընտրապայքարը Էջմիածնում, որտեղ 12 թեկնածու կար, թե՛ կրկնվող անուններով, թե՛ ազգանուններով:  Այստեղ նույնիսկ գենդերային բազմազանություն կար: 10 տղամարդու դեմ պայքարում էր 2 կին: Կանացից մեկն էլ հաղթեց, դեռ մինչև ընտրությունները մի անգամ նշելով, որ ինքը շատ տղամարդկանցից ավելի տղամարդ է եղել այս ընտրությունների ժամանակ: Դիանա Գասպարյանը ժամանակավորից դարձավ գործող քաղաքապետ: Մոտ մրցակցից շուրջ 4500 ձայն ավել էր հավաքել, իսկ մնացած 10-ը միասին վերցված՝ այդ տարբերությունից էլ քիչ: «Քաղաքացիական պայմանագրի» ներկայացուցիչը չժխտեց, որ ամենակարևոր դերը կատարել է Նիկոլ Փաշինյանի խարիզման:

Եվ միայն հեռավոր Կապանում ոչ մի խարիզմա չօգնեց: Թեկնածուն, ով հաղթելու էր ու չէր ներկայացնում «Քաղաքացիական պայմանագիրը» դեռ մինչև ընտրություններն էր բավականին վստահ, հաղթելու դեպքում էլ խոստացել էր նախ և առաջ իր քաղաքի բարոյահոգեբանական մթնոլորտն առողջացնել: Մարդիկ չկամեցող ու նախանձ են դարձել՝ նախընտրական հոլովակում ասում էր ապագա քաղաքապետը: Անկուսակցական Գևորգ Փարսյանի օգտին Կապանում քվեարկել էր մոտ 10.500 ընտրող, «Քաղաքացիական պայմանագիր» կուսակցության թեկնածուն ստացել էր 2000 ձայն պակաս:

Իսկ ընդհանրապես Հայաստանի 49 համայնքներում այս ընտրություններին մասնակցել է 94 222 քաղաքացի, կամ տվյալ համայնքներում ընտրելու իրավունք ունեցողների մոտ 43 տոկոսը, ինչը բարձր ցուցանիշ չէ և մեր երկրի ընդհանուր բնակչության շուրջ 3 տոկոսն է կազմում: Այսինքն՝ երեկ Հայաստանում ամեն 100 մարդուց ընտրության են գնացել 3-ը: Ընդհանուր պասիվության ֆոնին, սակայն, մասնակցության ցուցանիշները խիստ հարաբերական են՝ 8-ից մինչև 80 տոկոս: Լուսաշողում նույնիսկ 80 տոկոսն է մասնակցել, իսկ, օրինակ, Մեծաձորում ամբողջ գյուղից ընդամենը 12 մարդ է քվեարկել: 12 հոգով գնացել են, ավագանու չորս անդամ ընտրել, ամենքին բաժին է հասել 3 ընտրող, 1 քվեաթերթիկն էլ՝ անվավեր: Նույնիսկ հարկ չի եղել, որ թեկնածուների բոլոր տանեցիները գնան ընտրելու: