Հավասարակշռված արտաքին քաղաքականությունից կրթական բարեփոխումներ. ի՞նչ է առաջարկում ՀՀԿ-ն ընտրողին

Հայաստանի հանրապետական կուսակցությունը 2018թ. ընտրություններին մասնակցող 11 ուժերից է: Կուսակցությունը հանդես է գալիս «Եթե մտահոգ ես, ընտրիր հանրապետականին» կարգախոսով: ՀՀԿ նախընտրական ծրագրի սկզբում պատասխան է տրվում «Ինչո՞ւ ընտրել մեզ» հարցին:

Պատասխանը հետևյալն է. «Մենք ունենք պատմություն, գիտելիքներ և փորձ, մենք գիտենք և ընդունել ենք մեր սխալները, պատրաստ ենք ծառայելու Հայրենիքին»:

Ծրագրում շեշտվում է «Ազգ-բանակ» հայեցակարգը` որպես պետության պաշտպանունակության, կայուն ու անվտանգ զարգացման երաշխիք: Կուսակցությունը կարծում է, որ անհրաժեշտ է.

Սպառազինության արդիականացման և համալրման 7-ամյա ծրագրի անշեղ կատարում,

Ռազմական կրթության որակի կտրուկ բարձրացում,

Գիտատար ռազմարդյունաբերական համալիրի զարգացում,

Արդյունավետ ռազմադիվանագիտական և ռազմատեխնիկական փոխգործակցության ընդլայնում,

Սպայական ծառայության սոցիալական երաշխիքների ուժեղացում,

Ժամկետային զինծառայության որակի բարձրացում, քաղաքացու ապագա սոցիալական կարգավիճակի հետ փոխշաղկապում,

Պահեստազորի հետևողական ամրապնդում,

Զինհաշմանդամների ինտեգրման համակարգի ներդրում,

Զոհված զինծառայողների ընտանիքներին բարոյական, հոգեբանական և նյութական աջակցության ընդլայնում,

Արցախի անվտանգ ապագան և կայուն զարգացումը ՀՀԿ օրակարգի թիվ մեկ խնդիրն է:

 Արտաքին քաղաքականության ոլորտում շեշտվում է`

Ռազմավարական դաշնակցային հարաբերություններ Ռուսաստանի հետ, շրջանակային համաձայնագիր ԵՄ-ի հետ, ընդլայնվող գործընկերություն ԱՄՆ-ի հետ, բարիդրացիական փոխգործակցություն Իրանի և Վրաստանի հետ, խորացող երկխոսություն Չինաստանի հետ, նշանակալի դերակատարում ՀԱՊԿ-ում և ԵԱՏՄ-ում, նաև` նախագահություն Ֆրանկոֆոնիայի կազմակերպությունում:

Կուսակցությունը խոստանում է` շարունակելու են աշխատել հավասարակշռված և վարելու են Հայաստանի երկարաժամկետ շահերից բխող արտաքին քաղաքականություն:

Տնտեսության ոլորտում ՀՀԿ-ն կարևորում է արտահանման խթանումը, ժամանակակից տեխնոլոգիաների ներդրմամբ աշխատանքի արդյունավետության բարձրացումը, փոքր և միջին ձեռնարկատիրության խրախուսումը:

ՀՀԿ-ն կարևորագույն մարտահրավեր է համարում Կրթության համակարգը, որը պահանջում է էական բարեփոխումներ, յուրաքանչյուր ուսանողի և աշակերտի լիարժեք ներգրավում ուսման բոլոր գործընթացներում։

Առողջապահության համակարգում, ըստ կուսակցության, ծախսերի օպտիմալացմանը զուգընթաց՝ անհրաժեշտ է օր առաջ քննարկել պարտադիր ապահովագրման հայեցակարգը, որը հնարավորություն կտա պետական ծառայողներին ընձեռված հնարավորության նմանությամբ՝ հանրապետության բոլոր բնակիչների համար հասանելի դարձնել ծառայությունների մեծ փաթեթ:

Սոցիալական ապահովության համակարգը, ըստ ՀՀԿ ծրագրի, պետք է ապահովի արժանապատիվ ծերություն և հարափոփոխ աշխարհում աշխատուժի անընդհատ վերապատրաստման, բարելավման նոր հնարավորությունների ընձեռում։ Եթե իրացված կենսաթոշակային բարեփոխումները երկարաժամկետ հատվածում հնարավոր են դարձնում առաջին նպատակի իրագործումը, ապա երկրորդի համար անհրաժեշտ են կրթության, տնտեսության և սոցիալական ոլորտների մասնագետների համատեղ ջանքերը։