Մենք նոր աշխարհի դարպասների մոտ ենք և պետք է վերափոխենք մեր մտածելակերպն ու մոտեցումները. նախագահ

Հայաստանի Հանրապետության նախագահ Արմեն Սարգսյանը հունվարի 14-ին 7-րդ գումարման խորհրդարանի առաջին նիստի ժամանակ շնորհավորեց խորհրդարան անցած քաղաքական ուժերին, մաղթեց հաջողություն ու արդյունավետ աշխատանք, նշեց, որ իբրև նախագահ` իր լիազորությունների սահմաններում պատրաստ է համագործակցել և աջակցել նրանց: Արմեն Սարգսյանը շնորհակալություն հայտնեց նաև նախորդ գումարումների խորհրդարանների պատգամավորներին օրենսդիր աշխատանքների համար:

«Պատմական դարձած 2018թ. մեծ փոփոխությունների, փորձությունների, սպասումների ու հույսերի տարի էր, մեր ժողովրդի լավագույն հատկությունների` միասնականության, համախմբվածության, բարձր բարոյական և քաղաքական, քաղաքական ոգու բազմաթիվ դրսևորումների տարի էր:

Դեկտեմբերի 9-ի խորհրդարանական ընտրությունների արդյունքները, որոնք ճանաչվել են դրանց մասնակցած բոլոր քաղաքական ուժերի և միջազգային դիտորդների կողմից, բարձր լեգիտիմությամբ են օժտել ներկա ԱԺ-ին: Նոր ԱԺ և նոր կառավարության ձևավորմամբ ավարտվում է քաղաքական փոփոխությունների առաջին փուլը, սկսվում է հաջորդ` հույսերի և խոստումների իրականացման հետևողական, համառ և ամենօրյա աշխատանքի փուլը:

Հարգելի՛ պատգամավորներ, դուք ստացել եք լայն հնարավորություններ` կյանքի կոչելու թավշյա հեղափոխության գաղափարները և արդարացնելու հասարակության սպասելիքները, կերտելու նոր Հայաստան: Ձեր գործունեության հաջողությունը մեծապես պայմանավորված է լինելու Հայաստանի քաղաքացու աջակցությամբ և նրա մասնակցությամբ հասարակական, քաղաքական, տնտեսական, մշակութային և կրթական կյանքին»,- ասաց նա:

Արմեն Սարգսյանը, դիմելով պատգամավորներներին, հիշեցրեց` Սահմանադրության 1-ին հոդվածը հռչակում է` Հայաստանի Հանրապետությունը ինքնիշխան, ժողովրդավարական, սոցիալական և իրավական պետություն է, ապա ընդգծեց` այդ դրույթը ոչ թե փաստի արձանագրում է, այլ պետության համար կարևորագույն սկզբունք, նպատակ, նպատակ, որը չի կարող լինել լիարժեք իրականացված, նպատակ, որին պետք է ձգտել` մշտապես կատարելագործվելով և անցնելով երկար ճանապարհ: Նախագահը նշեց` նոր Հայաստան կառուցելու համար դեռ բազում և լուրջ բարեփոխումներ պետք է իրականացվեն բոլոր բնագավառներում և տարբեր մակարդակներով: Ըստ Սարգսյանի՝ առաջնային է մնում Հայաստանում յուրաքանչյուր անձի բարեկեցիկ կյանքի երաշխավորումը, սակայն դեռևս թե՛ իրավական հարթության վրա, թե՛ գործնականում այդ իրավունքներին բավարար կարևորություն տրված չէ:

«Նոր Հայաստանում մարդու տնտեսական, սոցիալական, մշակութային, կրթական իրավունքները և ազատությունները պետք է հանդիսանան մարդու արժանապատվության կարևոր բաղկացուցիչ մասը, և հենց այդ ընկալումը պետք է ընկած լինի իրավական ակտերի և պետական մարմինների գործունեության հիմքում: Աշխարհը դառնում է ավելի անկայուն և անկանխատեսելի, լի մարտահրավերներով: Միջազգային հարաբերությունների մեջ ավանդական մեթոդները, մոտեցումները, ինստիտուտները, կառույցները հաճախ կորցնում են իրենց արդյունավետությունը, սա ստեղծում է նոր ռիսկեր, միաժամանակ ստեղծում է նոր հնարավորություններ»,- ասաց նա:

Նախագահը շեշտեց` 21-րդ դարն արագ գնահատականների ու որոշումների դար է լինելու, մենք նոր աշխարհի դարպասների մոտ ենք և պետք է վերափոխենք մեր մտածելակերպն ու մոտեցումները: Սարգսյանի խոսքով` գիտակցելով մեր թվացյալ և իրական առավելություններն ու թերությունները, ունենալով հստակ տեսլական և ծրագիր, պետք է օգտագործենք աշխատող, ստեղծող, մտածող մեր ազգի բոլոր կարողությունները:

«Այո՛, փոփոխվում են ժամանակները, սակայն անփոփոխ են մեր նպատակները` նպաստել հզոր ու զարգացած Հայաստանի կերտմանը, նպաստել 21-րդ դարի մարտահրավերներին պատրաստ արժանապատիվ քաղաքացու ձևավորմանը: Նոր ԱԺ-ին բավական ծավալուն աշխատանք է սպասվում խորհրդարանական դիվանագիտության արդյունավետության բարձրացման ուղղությամբ` հաշվի առնելով արտաքին ոլորտում Հայաստանի առջև ծառացած խնդիրներն ու մարտահրավերները, դրանց շարքը երկար է` ԼՂ հակամարտության խաղաղ և արդար կարգավորություն, Հայաստանի և Արցախի անվտանգության բարձրացում, բանակի արդիականացում, եվրոպական և եվրասիական ուղղությամբ համագործակցության խորացում, համագործակցության զարգացում հարևանների, համաշխարհային բոլոր դերակատարների, բոլոր գործընկերների և, իհարկե, բարեկամների հետ, Հայաստանի տեղի ամրապնդում աշխարհում` որպես միջազգային հուսալի և կայուն գործընկեր, այս ամենի համար անհրաժեշտ են պրոֆեսիոնալ մոտեցումներ ու հմտություններ»,- ասաց նա: