6000 տոննա պակաս կարտոֆիլ, 55 հազար տոննա պակաս հացահատիկ. Շիրակի մարզում այս տարի բերքահավաքի ցուցանիշը ցածր է

Շիրակի մարզում գյուղատնտեսական տարին բարենպաստ չէր, սպասվելիք բերքի կեսից ավելին տուժեց 8 անգամ տեղի ունեցած կարկտահարություններից: Այս տվյալներն է մարզխորհրդի նիստում ներկայացրել գյուղատնտեսության և բնապահպանության վարչության պետը: Բերքատվության նվազման հետևանք է նաև համայնքներում սեփական եկամուտների հավաքագրման վատ ցուցանիշը։

Շիրակի մարզի 42 համայնքների ընդհանուր եկամուտները, ըստ նախապես կազմված բյուջեների, մեկ միլիարդ 895 միլիոն դրամ է, բայց անցած 9 ամիսների ընթացքում կատարվել է 273 միլիոն դրամով պակաս։ Սեփական հողերի վարձավճարները համայնքների ղեկավարները կարողացել են հավաքել, ինչը չի ստացվել վարձակալական վարելահողերի համար: Գյուղապետերն իրենց բաժին արդարացումն ունեն, իսկ Շիրակի մարզպետն էլ հավաքագրումների հարցում վերջիններիս թերացումները նշեց:

«Եթե համայնքներում էս տեսակի խնդիր կա, ուրեմն նշանակում է՝ մենք շարունակում ենք աշխատել աբարեխիղճների հետ: Համայնքապետերին պիտի խնդրեմ ուշադիր լինել, դուք գործիք ունեք, որը չեք կիրառում: Ունեք շարունակաբար վատ վճարողներ, վերցրեք հողերը, տվեք նրանց, ովքեր աշխատող են և կարող են հարկերը վճարել»,- ասել է Շիրակի մարզպետ Տիգրան Պետրոսյանը:

Բայց հողից ստացած եկամուտն էլ նվազել է՝ կապված եղանակային պայմանների հետ: Այս տարվա բերքահավաքի ցուցանիշները մտահոգիչ են և կարկտահարությունների, երաշտի ու ցրտահարության պատճառով 6000 տոննա պակաս կարտոֆիլ և 55 հազար տոննա պակաս հացահատիկ է հավաքվել։

«Մարզն ունի 33 հազար հեկտար հացահատիկի ցանքատարածություններ, դրանցից 10 հազար հեկտարը կարկտահարվել էր 50-100 տոկոսով: Եթե մենք պետք է ստանայինք 100 հազար տոննա հացահատիկի բերք, ստացել ենք 55 հազար տոննա, մեր բերքի ուղիղ կեսը կորել է»,- մարզի բերքահավաքի ցուցանիշներն է ներկայացրել Մարզպետարանի գյուղատնտեսության և բնապահպանության վարչության պետ Մովսես Մանուկյանը:

Համայնքապետերը հարց ուղղեցին վարչության պետին՝ կորցրած բերքի կամ վնասի փոխհատուցում արդյոք լինելո՞ւ է։ Հետաքրքրվեցին, թե հնարավո՞ր է նախորդ տարիների օրինակով սերմացու կամ դիզվառելիք տրամադրվի գյուղացիներին: Մովսես Մանուկյանն այս մասով լավ նորություն չուներ հայտնելու տուժած համայնքների ղեկավարներին՝ պետությունից սուբսիդավորման ծրագիր այս անգամ ևս չի լինելու:

Համայնքային խնդիրների լուծմանն ուղղված մյուս պետական ծրագիրն էլ սուբվենցիոն է: Կառավարություն-համայնք համաֆինանսավորման տարբերակով 25 համայնքների ներկայացրած բոլոր 49 ծրագրերը հաստատվել են, դրանց որոշ մասը ավարտվել է, իսկ մի քանիսն ընթացքի մեջ են: Բայց համայնքի ղեկավարները այստեղ էլ մտահոգություններ ունեին: Պետության համաֆինանսավորման գումարները շինընկերություններին դեռ չեն փոխանցվել:

«Շինարարները ստացել են համայնքային համաֆինանսավորումները, աշխատանքը կատարել են, հիմա հասել են պետական մասնաբաժնի աշխատանքներին, կատարել են, մեկ ամիս կատարողական են տվել, գումարը չեն ստացել, 2 ամիս կատարողական են տվել, գումարը չեն ստացել, այլևս չեն կարողանում աշխատել, որովհետև պարտքեր են կուտակում, բայց պետությունից որևէ արձագանք չկա, թե երբ է լինելու էդ գումարների տրամադրումը»,- շինընկերությունների դժգոհությունները մարզխորհրդի նիստում ներկայացրեց մարզպետարանի քաղաքաշինության վարչության պետ Ալբերտ Մարգարյանը։

Սուբվենցիոն ծրագրերի ներկայացման սահմանափակումներ 2020 թվականից չեն լինելու, ինչը հնարավորություն կստեղծի հիմնականում մարզի փոքր բյուջե ունեցող համայնքներին ծրագրերով հանդես գալ, բացի դրանից՝ համայնքնային ֆինանսավորման սահմանված շեմ չի պահանջվելու: