Հին ու բարի մուլտհերոսները խոսում են հայերեն․ Shant kids հեռուստաալիքի անակնկալը փոքրիկ հեռուստադիտողին

Shant kids հեռուստաալիքի հեռուստադիտողների համար «Շանթը» հերթական անակնկալն է պատրաստել: Բոլոր ժամանակների ամենասիրելի մուլտֆիլմերը Shant kids-ով կհեռարձակվեն միայն հայերեն:

Գեղեցիկի և բարու ընկալումը, այն զգալու և գնահատելու ընդունակությունը հատկանիշներ են, որոնք ձևավորվում են մանկուց: Այդ ժամանակ է, որ ի հայտ են գալիս անհատի բնավորությունը, լավին և բարուն ձգտելու կամքը: Գաղտնիք չէ, որ այդ ամենում շատ մեծ նշանակություն ունի այն, թե ինչ է տեսնում ու լսում երեխան: Այս դեպքում մուլտֆիլմերն իրենց բովանդակությամբ ու մատուցմամբ որոշիչ դեր ունեն:

Հենց դա հաշվի առնելով՝  «Շանթ» հեռուստաընկերությունն իր փոքրիկ հեռուստադիտողների համար հատուկ առաջարկ ունի: Այսպիսով, խորհրդային տարիների մուլտֆիլմերի ոսկե ֆոնդն իր գույներով ու բազմազանությամբ էկրան կբարձրանա հայերեն կրկնօրինակմամբ ու հնչյունավորմամբ:

Չարաճճի գայլը, ճարպիկ նապաստակը, մեղրասեր արջուկ Վինի Թուխը, ընկերասեր Չեբուրաշկան ու մյուս մուլտհերոսները փոքրիկների հետ հայերեն կխոսեն SHANT DIGITAL TV-ի Shant kids հեռուստաալիքի եթերում: «Դե սպասիր» մուլտֆիլմի սերիաների կրկնօրինակումն արդեն ավարտված է ու հասանելի Shant kids հեռուստաալիքի մեր հեռուստադիտողներին:

Եթե այս ընթացքում դեռ չեք հասցրել դրանք դիտել, խնդիր չէ, կարող եք մտնել հավելվածի տեսադարան բաժին և մանուկների համար նախատեսված հատվածում գտնել սիրելի մուլտֆիլմն արդեն հայերեն տարբերակով:

Տարբեր մուլտֆիլմերի հերոսների հնչյունավորած ու հիմա էլ գայլի կերպարը կրկնօրինակող Արման Նավասարդյանի համար «Դե սպասիր» մուլտֆիլմի դեպքում ամեն ինչ այլ է. այստեղ հատուկ հիշողություններ կան: Ե՛վ կրկնօրինակում են, և՛ հաճույքով վերհիշում սիրելի մուլտֆիլմն ու հարազատ կերպարներին:

Առիթը եղավ, ու Արման Նավասարդյանը փոքրիկ նապաստակին հետապնդող գայլին, իսկ Տաթև Ղազարյանը նապաստակին է կրկնօրինակում: Կերպարներն այնքան հարազատ ու թանկ են, որ հնչյունավորումն ինքնըստինքյան է ստացվում:

«Դե սպասիր» մուլտֆիլմը պատրաստ է: Պատրաստման փուլում են բազմաթիվ այլ` արդեն ճանաչված ու սիրված մուլտֆիլմեր ևս, ոչ միայն խորհրդային տարիներից։ Մուլտֆիլմեր, որոնք երեխաներից շատերի առօրյայի անբաժանելի մասն են: Օրինակ` ավելի ժամանակակից «Մաշան և արջը» մուլտֆիլմը։ Մուլտֆիլմ, որի սերիալներից մեկը YouTube-ում ավելի քան 3 մլրդ դիտում է ունեցել և ամենաշատ դիտվող տեսանյութերի ցանկում 6-րդ հորիզոնականն է զբաղեցնում: Պատկերացնո՞ւմ եք՝ այս մուլտֆիլմը ձեր փոքրիկները հայերեն դիտելու հնարավորություն են ունենալու:

Ահա և մեր Մաշան՝ իրականում 7-ամյա Սյուզին: «Մաշան ու արջը» մուլտֆիլմին մեր փոքրիկ հերոսուհին 4 տարեկանից է ծանոթ, ամբողջ մուլտֆիլմն անգիր գիտի: Մաշային էլ շատ լավ է ճանաչում, իր և Մաշայի միջև նմանություններ էլ տեսնում է:

Ընկերուհիներից, որոնց հետ դեռ մինչ օրս էլ գրեթե ամեն օր «Մաշան և արջը» մուլտֆիլն են դիտում, խորհուրդներ է ստացել և նոր եկել կրկնօրինակելու իրենց սիրելի մուլտհերոսուհուն: Չամաչես` ընկերուհու` Մարգարիտայի խորհուրդն է: Ընկերուհու խորհուրդն է, թե տաղանդը, բայց Սյուզին առանց ամաչելու ու զարմանալի նմանությամբ կրկնօրինակում է Մաշային:  Պարզվեց՝ ոչ միայն կրկնօրինակում է, այլև իր հերոսուհուց սովորում:

Ահա այսպես, ճիշտ ընտրված դերասանական կազմով ու մանրակրկիտ` ամեն հնչյունին ուշադրություն դարձնելով այստեղ բոլորին քաջ ծանոթ ու սիրելի մուլտֆիլմերը հայերեն շունչ են ստանում:

Ոչ միայն փոքրերին, այլև մեծերին են հաճելի պահեր սպասվում: Ի վերջո, բոլորս էլ մեր մանկությունից ենք: Սպասումն ավելի է մեծանում, երբ մանկության սիրելի հերոսները հայերեն են խոսելու:

Հիշեք` Shant kids հեռուստաալիքի հետ ձեր փոքրիկին հայկական մանկություն է սպասվում: