Ադրբեջանական իշխանությունը հակաօրինական է և գործում է սեփական ժողովրդի դեմ. Լապշին

Ռուսաստանի և Իսրայելի քաղաքացի, բլոգեր Ալեքսանդր Լապշինն այժմ ԱՄՆ-ում է, որտեղ հանդիպումներ է նախատեսում մի շարք իրավապաշտպան կազմակերպությունների ու լրագրողների հետ, հայտնում է «Արմենպրես»-ը:

Այցի շրջանակներում քննարկվելիք հիմնական թեման Ադրբեջանում իր հետ կապված իրադարձությունների ու դրանց արդյունքում բլոգերի կողմից առաջիկայում նախատեսվող գործողություններն են:

Աղբյուրի հետ զրույցի ընթացքում Լապշինը հայտնել է, որ ինքն արդեն հայց է ներկայացրել Ադրբեջանի իշխանությունների դեմ՝ իր դեմ մահափորձ կատարելու գործով:

«Ինձ մոտ են Իսրայելի դատաբժշկական փորձաքննության բոլոր փաստաթղթերը, որոնցում ասվում է, որ Բաքվի դատարանում իմ դեմ մահափորձ է իրականացվել, որը հետագայում փորձ է արվել ներկայացնել որպես ինքնասպանության փորձ: Ընդ որում, դա արվել է անգրագետ կերպով»,- ասել է Լապշինը:

Իր խոսքով՝ մեկ այլ հայց էլ նարկայացվել է Նյու Յորքի Բրուքլինի դատարանում, որը կբացվի՝ Ստրասբուրգի դատարանի կողմից որոշման հրապարակումից հետո:

«Կարծում եմ՝ այս ամենն օգուտ կտա հենց Ադրբեջանին, քանի որ այնտեղ իշխանությունը հակաօրինական է և առաջին հերթին գործում է սեփական ժողովրդի դեմ, որը ոչնչում մեղավոր չէ: Դրանից բացի՝ դա օգուտ կտա նաև Լեռնային Ղարաբաղի ժողովրդին, որը չպետք է գերի լինի Հայաստանի ու Ադրբեջանի հարաբերություններին կամ Բաքվի նավթին»,- ասել է բլոգերը:

Նշենք, որ Ալեքսանդր Լապշինն այժմ ընտանիքի հետ բնակվում է Վրաստանում: Հարցին, թե մտավախություններ չկա՞ն, արդյոք, որ Ադրբեջանական իշխանությունները կցանկանան վնասել իրեն ու իր ընտանիքի անդամներին՝ հաշվի առնելով նաև իր բնակավայրում ադրբեջանցիների մեծաթիվ համայնքի առկայությունը, բլոգերն ասել է, որ նշանակություն չունի, թե ինքը որտեղ է գտնվում այս պահին, քանի որ ցանկության դեպքում իրեն կարող են գտնել ցանկացած վայրում:

«Ադրբեջանն, անկասկած, մեծ ազդեցություն ունի Վրաստանի վրա, այդ երկրի գլխավոր ներդրողներից է, Վրաստանով է անցնում Բաքու-Թբիլիսի-Ջեյհան նավթամուղը: Այդ երկրում մեծ ադրբեջանական համայնք կա, սակայն չեմ կարծում, որ այնտեղ իմ կյանքն ավելի մեծ վտանգի տակ է, քան ցանկացած այլ երկրում: Ադրբեջանի ռեժիմը մարդկանց սպանում է թե՛ Եվրոպայում, թե՛ ԱՄՆ-ում: Այսինքն՝ եթե նրանք մտադրվեն ինձ սպանել, ապա նրանք ինձ ամենուր կգտնեն, անգամ Արգենտինայում»,- ասել է ռուս բլոգերը:

Նա անդրադարձել է նաև Ադրբեջանի հասցեին հնչող մեղադրանքներին ու միջազգային հարթակներում այդ երկրի ցածր վարկանիշին՝ նշելով, որ այլ սկանդալի այդ երկիրը պատրաստ չէ:

«Այդ երկիրն առանց այն էլ ներկայում ոչ լավ միջազգային իրադրությունում է հայտնվել «ադրբեջանական լվացքատան» հետ կապված փողերի լվացման, ԼՂ չկարգավորված հիմնախնդրի, խավիարային դիվանագիտության պատճառով:

Կարծում եմ, որ նրանց հետաքրքրությունների շրջանակում չէ ունենալ հավելյալ ևս մեկ սկանդալ իմ սպանության հետ կապված: Իհարկե, այստեղ մեկ այլ ռիսկ էլ կա: Քանի որ Ալիևի իշխանությունը կայուն չէ և գուցե վերջին տարիներն է ապրում, ապա կգտնվեն մարդիկ կառավարության ներսում, ովքեր կարող են իմ դեմ հարձակում իրականացնել՝ հետագայում դա Ալիևի դեմ որպես կոմպրոմատ օգտագործելու նպատակով»,- ասել է Ալեքսանդր Լապշինը: