Մինաս Ավետիսյանի Ջաջուռի թանգարանը վերաբացվել է

Պարետի որոշումից հետո թանգարանները բացվեցին ոչ միանգամից ու ոչ բոլորը միասին: Ամեն թանգարանի ժամանակ էր պետք, համավարակի պայմաններում, աշխատանքը կազմակերպելու համար: Շիրակի մարզում վերջինը՝ սեպտեմբերի 1-ին, վերաբացվեց Մինաս Ավետիսյանի Ջաջուռի թանգարանը։Զբոսաշրջիկների հետաքրքրությունը բավարարելու համար թանգարանը պատրաստվում է Ազգային պատկերասրահից Մինասի բնօրինակ գործերը բերել ցուցադրության:

Համավարակի պայմաններում արդեն կենսակերպ դարձած կանոնները կիրառվում են նաև Ջաջուռում՝ Մինասի թանգարանում: Ջերմաչափում, սահմանված հեռավորության պահպանում: Վերաբացումից հետո առաջին այցելուներից են հարևան Լոռու մարզի Արջուտի դպրոցի մանկավարժները: Մինչ դասերի մեկնարկը որոշել են ներքին տուրիզմի առաջարկներից օգտվել: Արջուտը Ջաջուռից շատ հեռու չէ, բայց առաջին անգամ են Մինասի թանգարան այցելում:

«Մենք համարվում ենք Ազգային պատկերասրահի մասնաճյուղ: Մեզանից մեկ շաբաթ առաջ վերաբացվեց ազգային պատկերասրահը և մենք վերաբացվեցինք  մեկ շաբաթ հետո: Խնդիրը զուտ գնում էր կազմակերպչական առումով,որովհետև պետք է ստանայինք բավականին պարագաներ, կապված կորոնավիրուսի հետ: Մեկ-երկու օր էլ նախապատրաստվեցինք մինչև բացվելը: Այժմ արդեն այցուլեր ենք ընդունում»,-shantnews-ի հետ զրույցում նշեց Մինաս Ավետիսյանի թանգարանի տնօրեն Արման Ավետիսյանը:

Մինասյան գույները ,վառ ու գյուղական տեսարանները նկարչի բնօրինակ կտավներում են: Ջաջուռի թանգարանի ֆոնդերում է Մինասի ամենահայտնի գեղանկարներից «Հայկական նատյուրմորտը» և նկարչի կուրսային աշխատանքներից մեկը, որը նույնպես խորհրդային տարիներին առանց քննադատության չի ընդունվել:

Ջաջուռի թանգարանում Մինասի 9 բնօրինակ գեղանկարներ են պահվում և երկու որմնանկար: Ավելի շատ գործեր Ազգային պատկերասրահում են, որտեղից պարբերաբար ցուցադրության համար կտավներ ու գրաֆիկական գործեր Ջաջուռ բերվում են, բայց Մինասի բնօրինակներն այստեղ պահելու համար շենքային պայմանները թույլ չեն տալիս:

«Հաշվի առնելով այն, որ մենք չունենք գազ, ջեռուցում, չենք գտնում նպատակահարմար մեծ թվով նկարներ բերել այստեղ: Այս պահի դրությամբ ունենք 9 գեղանկար  Մինասի՝ օրիգինալ , ունենք Մինասի որմնանկար, Գայանե բալետի ձևավորման առաջին հագուստները, որոնք իրենցով շատ արժեքավոր են»,-ասաց Արման Ավետիսյանը:

Մինասի բեմական ու հագուստի ձևավորումների ցուցանմուշների համար թանգարանում նոր տարածք են առանձնացնելու: Այս գաղափարը հարկադիր պարապուրդի ընթացքում է ծնվել: Թանգարանը այցելուներին ավելի հետաքրքիր դարձնելու համար նորություններ միշտ են պետք:

Հարկադիր պարապուրդի ընթացքում նաև թանգարանի տանիքն են նորոգել: Կաթոցներից մնացած հետքերը վերացնել դեռ չեն հասցրել: Ջաջուռի թանգարանը, ի տարբերություն մյուսների , այցելուների ընդունում է սեզոնային: Թանգարանը  ձմռանը  ջեռուցում չունի, գրեթե այցելուներ չի ունենում: Ներքին տուրիզմի ակտիվացմամբ պայմանավորված, ակնկալում են, որ մինչև հոկտեմբեր ամիսը այցելուներ կունենան: Այս տարի պահանջված են Լոռու և Տավուշի ուղղությունները, իսկ Ջաջուռը գտնվում է Գյումրիից այդ մարզեր տանող ճանապարհին: