Գյումրիի թիվ 29 դպրոցում 3 ուսուցիչների թեստավորման իրարամերժ պատասխաններ են ստացվել

Ինչքանով է կորոնավիրուսի թեստերի պատասխանը ստույգ: Այս հարցը քննարկման թեմա է դարձել Գյումրիի թիվ 29 դպրոցում, որտեղ ուսուցիչների պարտադիր թեստավորման արդյունքում 8 աշխատակցի մոտ վիրուս է հայտնաբերվել, այսինքն՝ թեստավորման պատասխանը դրական է եղել, իսկ ընդամենը մեկ օր անց, երբ մանկավարժներից 3-ը կրկնակի թեստավորում են անցել մեկ այլ բուժհաստատությունում, ստացվել է թեստի բացասական պատասխան: Այժմ պարզ չէ, թե թեստավորման որ պատասխանն է ավելի արժանահավատ: Համենայնդեպս, մանկավարժներին մեկուսացման ցուցում է տրվել: Թիվ 29 դպրոցում թեստավորվել է 65 աշխատակից:

Մինչ նոր ուսումնական տարվա մեկնարկը բոլոր դպրոցների աշխատակիցները պետք է թեստավորվեն: Այս որոշման հիման վրա էլ Գյումրիում առաջիններից թիվ 29 հիմնական դպրոցում, սեպտեմբերի 4-ին թեստավորում է կատարվել: Մեկ օր անց՝ սեպտեմբերի 5-ին ստացվել են թեստավորման պատասխանները, համաձայն որոնց՝ դպրոցի 8 աշխատակցի մոտ կորոնավիրուս է հայտնաբերվել: Թեստի արդյունքները աշխատակիցներից 3-ը կասկածելի են համարել ու կրկնակի թեստավորվել այլ բուժհաստատություններում:

«Աշխատակիցներից երեքը նույն օրը հանձնեցին կրկնակի թեստ «Գյումրի» բժշկական կենտրոնում  և պատասխանը բացասական եկավ: Քանի որ մեզ ասեցին, որ պարետատունը հիմնվում է առաջին թեստի պատասխանների վրա, մնացած 5 աշխատակիցները չգնացին կրկնակի թեստավորման: Հիմա բոլոր 8 աշխատակիցներն ինքնամեկուսացված են, 8-ն էլ իրենց լավ են զգում»,- shantnews-ին ասաց Գյումրիի թիվ 29 հիմնական դպրոցի տնօրեն Գայանե Բիչախչյանը:

Կրկնակի թեստավորում անցածներից մեկը դպրոցի ուսուցիչ Արուս Պետրոսյանն է: Նա իր թեստավորման դրական արդյունքը կասկածի տակ էր դրել մեկ պարզ պատճառով, որ մայիսին կորոնավիրուսով հիվանդացել է, հոսպիտալացվել, թեստի բացասական արդյունքը ստանալուց հետո, հունիսի սկզբին դուրս է գրվել: Հիմա՝ 3 ամիս անց նրա թեստավորման պատասխանը կրկին դրական է ստացվել ու նույն օրն էլ հերքվել է Գյումրի բժշկական կենտրոնում կատարված թեստավորման արդյունքներով:

«Ինձ ասեցին, որ ես քովիդ ունեմ, ասացի՝ ոնց կարող է ես քովիդ ունենամ, երբ որ ես բուժվել եմ քովիդից և արդեն ոչ մի խնդիր չկա իմ մոտ: Նույն օրը գնացել եմ «Գյումրի» բժշկական կենտրոն, հանձնել եմ թեստ: Երեկոյան ժամը 11-ին պատասխանը եկավ, որ բացասական է: Բացի դրանից՝ հանձնել եմ նաև իմունիտետի համար անալիզ և տեղի բժիշկներն ասացին, որ բացառված է, որ քովիդի նկատմամբ նման իմունիտետ ունեցող մարդն ունենա դրական պատասխան: 8 հոգի ու բոլորս ասիմպտոմ, դա անհնար բան է: Այստեղ կա ինչ-որ թյուրիմացություն, կարող է թեստերի հետ է կապված, կամ ինչ-որ բանի հետ է կապված»,- shantnews-ին պատմեց Գյումրիի թիվ 29 դպրոցի մանկավարժ Արուս Պետրոսյանը:

Ինչպես է հնարավոր, որ կորոնավիրուսից ստացիոնար պայմաններում բուժված մարդու մոտ նորից է վարակ հայտնաբերվել, Հիվանդությունների վերահսկման և կանխարգելման ազգային կենտրոնի «Շիրակ» մասնաճյուղի բժիշկները հավանական պատճառ նշել են: Ըստ Արուս Պետրոսյանի՝ հայտնել են, որ իր մոտ փոքրիկ օջախ է մնացել , ինչից էլ կատարվել է նմուշառում:

Կորոնովիրուսի թեստի երկու իրարամերժ պատասխաններ են ստացվել նաև նույն դպրոցի համակարգչային օպերատոր Վարսենիկ Կիրակոսյանի դեպքում: Դպրոցում արված նմուշառման պատասխանը դրական է, իսկ մեկ այլ բուժհաստատության կատարած թեստինը՝ բացասական: Կրկնակի թեստավորման գնացել է, որովհետև որևէ ախտանշան չի ունեցել:

«Ես կասկածեցի, որովհետև ինձ լավ էի զգում, ջերմություն չունեի, ոչ մի բան չկար մոտս: Գնացի մուծում արեցի, երկրորդ թեստը հանձնեցի, ու պատասխանը բացասական էր: Մենք երեքս հանձնել ենք կրկնակի թեստ, մյուս 5 հոգին ասացին, որ գումար չունենք, չենք հանձնի»,- shantnews-ին պատմեց դպրոցի համակարգչային օպերատոր Վարսենիկ Կիրակոսյանը:

Մանկավարժները հիմա մեկուսացված են: Նրանց հայտնել են, որ հիմք է ընդունվում առաջին թեստավորման պատասխանը: Սա չի խախտում Գյումրիի թիվ 29 դպրոցում դասերի վերսկսման ժամկետները: Ուսուցիչները թեստի դրական արդյունք ունեցող ուսուցիչների կոնտակտավորներ չեն համարվում:

«Երբ մենք հարցրեցինք, թե մենք էլ ենք նույն օրը դպրոցում եղել 8 մանկավարժների հետ, բժշկուհին մեզ ասաց, որ արձանագրել են, որ բոլորը եղել են դիմակներով և պահպանվել է հեռավորություն: Սա բժշկության մեջ համարվում է զրոյական շփում, այսինքն՝ մենք չենք համարվում այդ մարդկանց հետ կոնտակտավոր:

Ոչնչից մեծ աղմուկ ստեղծվեց: Դա պայմանավորված է  հենց առաջինը լինելու հանգամանքով: Ես էլ մտածում եմ, որն է ճիշտ, թեստի որ պատասխանի վրա հիմնվել: Մարդուն, վերջին հաշվով, ոչ թե մեկուսացումն է հետաքրքիր, այլ ինքն ուզում է իմանալ՝ հիվա՞նդ է, թե՞ չէ: Շրջապատն էլ է ուզում իմանալ»,- նշեց Գայանե Բիչախչյանը:

Համենայնդեպս, մանկավարժների ինքնազգացողությունը լավ է: Նրանք մեկուսացման մեջ գտնվելու են մինչև սեպտեմբերի 18-ը: Այդ ընթացքում դպրոցում նրանց պարտականությունները դրվել են գործընկեր մանկավարժների վրա: