Շիրակի մարզում մինչ օրս 26.140 նմուշառում է կատարվել․ դրական դեպքերն ու մահվան ելքերը փոքր թիվ են կազմում

Հանրապետությունում կորոնավիրուսի տարածման տեմպերը նվազում են: Աշնանը գրանցված աճից հետո, նվազումը մասնագետները համարում են համաճարակաբանական օրինաչափություն: Միևնույն ժամանակ, COVID-ի ևս մեկ ալիք կանխատեսում են փետրվար, մարտ, ապրիլ ամիսներին: Սուր շնչառական վիրուսները սեզոնային բնույթ ունեն և այս ամիսները տարածման ժամանակաշրջան են համարվում:

Մասնագետները խոսել են պատվաստումների արդյունավետության, կոլեկտիվ իմունիտետի և Գյումրիում կորոնավիրուսի բուժման բաժանմունքների փակման մասին:

Շիրակի մարզում կորոնավիրուսի առաջին դեպքը հաստատվել է անցած տարվա մարտի 26-ին: Իսկ, ընդհանուր առմամբ, մինչ օրս մարզում կատարվել է 26․140 նմուշառում:

«Ունենք 6․171 դրական հաստատված դեպք և 138 մահվան ելք: Հիվանդացությունը բնակչության թվի 3 %-ը չի գերազանցում, իսկ մահերը 1,5-2%-ը չեն գերազանցում: Վերջին շրջանում նշվում է, որ  մահացությունը բարձրացել է: Ես կասեի, ոչ թե մահացությունն է բարձրացել, այլ ուշ դիմելիության հետևանքով դեպքերը բարդացել են»,- ասել է ՀՎԿԱԿ «Շիրակ» մասնաճյուղի փոխտնօրեն Արմինե Անդրյանը:

Բարդ դեպքերը հոսպիտալացվել են մայրաքաղաքում կամ «Գյումրի» բժշկական կենտրոնում, որտեղ կորոնավիրուսի բուժման համար բաժանմունք բացվեց: Բարդ դեպքերը Գյումրիի ինֆեկցիոն հիվանդանոցից այստեղ էին տեղափոխվում, որովհետև ինֆեկցիոն հիվանդանոցը մոնոպրոֆիլ է, իսկ բժշկական կենտրոնը՝ բազմապրոֆիլ ու ավելի հարմար ուղեկցող հիվանդություններ ունեցողների համար: Այստեղ էլ եղել են հիվանդներ, որոնք ընդունվել են կորոնավիրուսի ախտանիշներով, բայց թեստի բացասական պատասխանով:

Հիմա «Գյումրի» կենտրոնի բաժանմունքը փակվել է, ինֆեկցիոնն էլ վերադարձել է իր գործառույթներին: Հոսպիտալացման ենթակա հիվանդները քիչ են: Ծանր դեպքերն ուղեգրվում են մայրաքաղաքի բուժհաստատություններ, թեթև ախտանշաններով մարդկանց բուժումը տնային պայմաններում է: Միևնույն ժամանակ, համաճարակաբանները կանխատեսում են, որ փետրվար-ապրիլ ամիսների հիվանդացության աճ է գրանցվելու: Ու այս պարագայում, կորոնավիրուսի բուժման համար ծավալված մահճակալային ֆոնդի վերապրոֆիլավորումը արդարացված չեն համարում:

«Գուցե շատ քիչ՝ 50 կամ 30 մահճակալով, բայց պետք էր թողնել, որ այդ մահճակալները գործեին: Եթե ֆինանսավորումն այդ մահճակալների համար պետք է կատարվի Երևանում, թող Երևանից այդքան մահճակալի չափով ֆինանսավորվեն մարզերը: Ես ապակենտրոնացման կողմնակից եմ և դա ի շահ բնակիչների է»,- նշել է Գյումրիի ինֆեկցիոն հիվանդանոցի բժիշկ-վարակաբան Կարինե Տոնոյանը:

Արհեստական իմունիտետ ձևավորելու գործընթացը Հայաստանում ևս մեկնարկելու է: Խոսքը պատվաստումների մասին է: Հիվանդությունների վերահսկման և կանխարգելման ազգային կենտրոնի «Շիրակ» մասնաճյուղի տնօրենն է նշում՝ պատվաստումների 4 տարբերակներ են քննարկվել ու փորձարկվել:

Առաջին փուլով նախատեսված է բնակչության 1 տոկոսին պատվաստել, որի մեջ ընդգրկվելու են բուժաշխատողները և խնամքի կենտրոններում ապրող տարեցները: Երկրորդ փուլով պատվաստվողների թիվը հասցվելու է 3 տոկոսի, խոցելի խմբերում ընդգրկվելու են նաև արտակարգ իրավիճակների, ոստիկանական զորքերի ծառայողները և ուսուցիչները: