Ինչի մասին է խոսել Ալիևը արտասահմանյան ԶԼՄ-ներին տված հարցազրույցում

Ադրբեջանը անհրաժեշտ է համարում օրակարգից բացառել Լեռնային Ղարաբաղի կարգավիճակի հարցը և անմիջապես կարձագանքի Հայաստանի կողմից «ռևանշիզմի ցանկացած փորձի», ուրբաթ հայտարարել է Ադրբեջանի նախագահ Իլհամ Ալիևը արտասահմանյան լրատվամիջոցներին տված հարցազրույցում:

ՏԱՍՍ-ը հավաքել է Ալիևի առանցքային հայտարարությունները:

Ղարաբաղի կարգավիճակի և տարածաշրջանում առկա հակամարտության մասին Ալիևն ասել է.

«Ինչ վերաբերում է կարգավիճակին, ապա Հայաստանի և հայ ժողովրդի համար որքան քիչ խոսեն այս հարցի շուրջ, այնքան լավ: Քանի որ չպետք է կեղծ խոստումներ տալ հայ ժողովրդին։ Կարգավիճակի հարցը անհրաժեշտ է ընդհանրապես բացառել օրակարգից»:

Նա խոսել է Երևանի «ռևանշիզմի» և խաղաղության պայմանագրի մասին։

«Երկարաժամկետ խաղաղության մեկ այլ նախապայման` Հայաստանում, Հայաստանի քաղաքական շրջանակներում հստակ հասկացությունն է, որ վրեժխնդրության ցանկացած մտադրություն խստորեն կպատժվի Ադրբեջանի կողմից: Կասկած չկա դրանում, մենք մեկ րոպե չենք հապաղելու, եթե տեսնենք վտանգը: Եթե ​​մենք տեսնենք զգալի վտանգ, մենք անմիջապես կգործենք»:

«Իհարկե, եթե ամեն ինչ ընթանա ճիշտ այնպես, ինչպես կարծում ենք, մենք չենք բացառում ինչ-որ փուլում խաղաղ պայմանագրի ստորագրումը»:

Ինչպես արդեն հայտնել ենք՝ անդրադառնալով Հայաստանում տեղի ունեցած իրադարձություններին,  Ադրբեջանի նախագահը հայտարարել է, որ Երևանում տեղի ունեցած վերջին իրադարձությունները Հայաստանի ներքին գործն են:

Ինչ վերաբերում է ռուս խաղաղապահներին, ապա նա ասել է.

«Ես ռուս խաղաղապահների գործունեությունը գնահատում եմ բավարար և դրական: Ռուս խաղաղապահների ներկայությունը դրական դեր կխաղա ադրբեջանցի տեղահանվածների Ղարաբաղ վերադառնալու հարցում»:

ՏԱՍՍ-ի փոխանցմամբ՝ նա անդրադարձ է կատարել նաև Ղարաբաղի օդանավակայաններին։

«Ինչ վերաբերում է Ֆիզուլիի միջազգային օդանավակայանին, աշխատանքներն արդեն սկսվել են։ Բնականաբար, այս տարի այն շահագործման կհանձնվի: Մենք ուզում ենք, որ դա աշնան սկզբին լինի»:

«Պետք է ասեմ, որ օդանավակայանների կառուցման մեր ծրագրերը չեն սահմանափակվում միայն Ֆիզուլի քաղաքով: Մենք դեռ ծրագրեր ունենք օդանավակայաններ կառուցել Լաչինում և Զանգելանում»:

Նա խոսել է նաև Ղարաբաղի վերականգնման մասին։

«Մենք ընկերություններ կներգրավենք բարեկամ երկրներից: Ռուսաստանն ու Ադրբեջանը բարեկամ երկրներ են, ուստի, բնականաբար, ներգրավվելու են ռուսական ընկերություններ»:

«Եվ Թուրքիան, և Իրանը, և ապագայում, եթե ցանկություն լինի, Վրաստանը կարող են միանալ այս հարթակին (եռակողմ աշխատանքային խումբ Ադրբեջանի, Հայաստանի և Ռուսաստանի փոխվարչապետների մակարդակով)»:

«Իսկանդեր»-ի մասին խոսելով Ադրբեջանի նախագահն ասել է.

«Մենք չենք տեսել «Իսկանդեր» հրթիռի արձակումը [հայ զինվորականների կողմից Ղարաբաղում հակամարտության ընթացքում]։ Սա պարզապես հերթական սխալն է, որն արդեն արվել է հանրության առջև»: