Գյումրի ԲԿ-ում ներդրվել է «Սուր իշեմիկ կաթվածի բուժման » մարզերում առաջին պետական ծրագիրը

Սուր իշեմիկ կաթվածի բուժման պետական ծրագիրը  Հանրապետությունում ներդրվեց 2019 թվականից ։Պիլոտային ծրագրում նախ ընդգրկվեցին  մայրաքաղաքի երեք կլինիկաները։Արդյունքները գոհացուցից էին, անցած երկու տարիների ընթացքում բժիշկներին հաջողվեց փրկել սուր իշեմիկ ինսուլտի ախտանշաններով  բուժհաստատություններ դիմած  մոտ 1000 քաղաքացու կյանք։

«Հայաստանում ինսուլտը հանդիսանում է մահվան հանգեցնող հիվանդություններից երկրորդը, շատ լուրջ հիվանդության հետ մենք գործ ունենք, երկրորդ կարևոր ու վատ ցուցանիշը այն է, որ ինսուլտը հանդիսանում է հաշմանդամության առաջին պատճառը մեր երկրում։ Եթե թվերով խոսենք, նախկինում, երբ այս ծրագիրը չէր ներդրվել, Հայաստանում ինսուլտից մահացությունը կազմում էր մոտ 30%, այսինքն՝ 10 հիվանդներից երեքը մահանում էին, բայց այն կենտրոններում, որտեղ իրականացվեց ծրագիրը, մահացության ցուցանիշը նվազեց մինչև 12% »,- SHANTNEWS.am-ի հետ զրույցում նշել է նյարդաբան Ժորա Բաղդասարյանը։

Պետպատվերով` լիովին անվճար,  հիվանդներն անցնում են  լաբորատոր-գործիքային անհրաժեշտ հետազոտությունները, մասնավորապես, համակարգչային տոմոգրաֆիա և մագնիսառեզոնանսային տոմոգրաֆիա: Անհրաժեշտ է հետազոտությունները անցկացնել ինսուլտի  ախտանշանների  հայտնաբերումից հետո չորս ու կես ժամվա ընթացքում, դրանից հետո բուժման նորագույն մեթոդները կարող են լինել անարդյունավետ։ Մասնագետներն առաջարկում են երկու մեթոդ, որոնք համարվում են  թանկարժեք ։

«Բուժման տարբեր ձևեր կան, մի դեպքում հատուկ դեղ է ներարկվում, որն ունի տրոմբները քայքայելու հատկություն, և այդ դեղը արյան հոսքով հասնում է ուղեղի խցանված անոթին, քայքայում է տրոմբը և խցանը բացվում է։Սա կոչվում է տրոմբոլիտիկ բուժում, որի համար պետությունը հատկացնում է 1,5 միլիոն դրամ գումար, իսկ երկրորդ մեթոդը, դա վիրահատականն է, որի համար տրամադրվում է 2,5-3,8 միլիոն դրամ»,-ասում է նյարդաբանը։

Պետական ծրագիրը մարզերից առաջինը իրականացվում է Շիրակի մարզում։ Գյումրի ԲԿ-ում կբացվի առանձին բաժանմունք, որտեղ էլ կհոսպիտալացվեն սուր ինսուլտով հիվանդները, տեղում կկատարվեն վիրահատություններ,   լաբորատոր-գործիքային հետազոտություններ։

«Սկիզբը կիրականացնենք Էրեբունի ԲԿ-ի հետ համատեղ՝ ներգրավելով իրենց մասնագետներին, հետագայում արդեն մեր մասնագետները կշարունակեն աշխատանքը։ Ծրագրի հետ մեր կենտրոնը ոչ մի խնդիր չունի, տեխնիկապես հագեցած է։ Մենք նախկինում մեր հիվանդներին ստիպված ուղարկում էինք մայրաքաղաք, բայց հիմա կխնայենք այդ ժամանակը և հենց տեղում բուժօգնություն կցուցաբերենք ծանր հիվանդներին ու կկանխենք մահացության ռիսկը»,- SHANTNEWS.am-ի հետ զույցում նշել է Գյումրի ԲԿ-ի տնօրեն Արմեն Իսահակյանը։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։