Յուրաքանչյուր դերասանի համար պատիվ կլինի Գյումրիի թատրոնի բեմում խաղալը. Հրանտ Թոխատյան

Նոր թատերական նախագիծ Գյումրիի Վարդան Աճեմյանի անվան պետական դրամատիկական թատրոնում:
Աճեմյանցիները նախապատրաստվում են նոր թատերաշրջանին, տեղեկացնում է SHANTNEWS-ի թղթակիցը:

Պրեմիերան լինելու է Ալեյն Ռեյնո Ֆուրտոնի «Խելահեղ պատմություններ» պիեսը, որը Գյումրիի թատրոնի դերասանները խաղացել են նաև 2016 թվականին: Նոր բեմադրվողը իր հանգուցալուծումներով ու մոտեցումներով տարբերվելու է նախորդից։ Իսկ աճեմյանցիների հետ համատեղ խաղում են դերասաններ Հրանտ Թոխատյանն ու Ռոզի Ավետիսովան:

«Յուրաքանչյուր դերասանի համար պատիվ կլինի Գյումրիի թատրոնի բեմում խաղալը, ու ես մեծ ուրախությամբ համաձայնությունս տվեցի, հիմա սկսել ենք փորձերը»,-ասաց ՀՀ ժողովրդական արտիստ Հրանտ Թոխատյանը:

«Խաղալ Գյումրիի պատմական թատրոնում մեծ պատիվ է, հատկապես որ խաղալու եմ Թոխատյանի և աճեմյանցիների նման պրոֆեսիոնալ դերասանների հետ, դերս բավական համարձակ կերպար է, կարծում եմ՝ հանդիսատեսին այն դուր կգա, այս ներկայացումն էլ բավական հետաքրքիր գործողություններով է, մնում է սպասել պրեմիերային»,- ասաց դերասանուհի Ռոզի Ավետիսովան:

SHANTNEWS.AM-ի հետ զրույցում թատրոնի գլխավոր ռեժիսոր Լյուդվիգ Հարությունյանը նշել է, որ դերասանների հետ համատեղ ներկայացումներով հանդես գալը աճեմյանցիների համար նոր քայլ չէ. դրամատիկականում են խաղացել ինչպես ՀՀ ժողովրդական արտիստներ, այնպես էլ ՀՀ սահմաններից դուրս թատրոնների ճանաչված դերասաններ:

«Դուք հիշ՞ում եք, Վարդուհի Վարդերեսյանից սկսվել է այն ավանդույթը, որ մեր թատրոնում հրավիրում ենք ճանաչված դերասանների խաղալու մեր ներկայացումներում, սա օգնում է թատրոնին. յուրաքանչյուր նոր ներկայացման մեջ նոր դերասանի ներմուծումը տալիս է նոր մեկնաբանություն, նոր խնդիր, առավել ևս, որ ստեղծագործական խմբի համար հետաքրքիր է աշխատել նոր դերասանների հետ»,- ասաց Լյուդվիգ Հարությունյանը:

Ներկայացումը սիրո, հանդուրժողականության ու համերաշխության մասին է։ Խելահեղ պատմություններ դրամատիկականի խաղացանկում եղել է, հիմա ոչ թե հինը նորից են խաղում, այլ նոր մոտեցումներով ու հանգուցալուծումներով է ներկայացվում:

Պիեսում շոշափվող թեման ճանաչված պրոֆեսորի և անառակների անհասկանալի կապն է: Որտեղ մեկ վայրկյանում պրոֆեսորի խաղաղ կյանքը գլխիվայր փոխում են այդ կանայք:

Ռեժիսորը նոր հանգուցալուծում է տվել պիեսին, եթե նախկին ներկայացումն ավարտվում էր, ճանաչված պրոֆեսորի միայնությամբ. նա մնում էր նորից մենակ, կյանքն էլ՝ տխուր ու առանց խրախճանքների, ապա այստեղ բոլորովին այլ է. փոփոխված իրողությունները ազդեցություն են թողել մշակութային կյանքում ևս:

Սիրո, հանդուրժողականության մթնոլորտում կյանքի խելահեղ պատմությունները այլ ընթացք են ստանում բեմում: Փոփոխություններով ու լավատեսական նոտայով պիեսը Գյումրիում կխաղան սեպտեմբերին, ավանդույթի համաձայն՝ նոր ներկայացմամբ կհայտարարվի թատերաշրջանի բացումը: