Հայաստանը հեղափոխությունից հետո՝ սպասելիքներն ու նոր մարտահրավերները․ քննարկում Գյումրիում

Հետհեղափոխական կրքերն ու սպասումները նոր իշխանություններից. ի՞նչ է սպասում հասարակությանը, ե՞րբ և ի՞նչ ժամկետներում կարող է իշխանությունը արդարացնել ժողովրդի սպասելիքները։ Հեղափոխությունից հետո մարդիկ սպասում են կտրուկ փոփոխությունների ու կյանքի որակի բարելավման: Այս թեմաների շուրջ այսօր Գյումրիում «Հայաստանը հեղափոխությունից հետո. նոր կառավարություն, նոր արժեքներ, նոր մարտահրավերներ» խորագրով քննարկում էր կազմակերպել «Հանուն հավասար իրավունքների» հասարակական կազմակերպությունը:

Քննարկումների շարքը կազմակերպությունն սկսել է Գյումրիից, քանի որ հեղափոխական տրամադրություններն ու սկիզբը հենց Գյումրիում են դրվել: Քննարկման ընթացքում բանախոսները ներկայացրել են, թե ինչ է կատարվում Հայաստանում հեղափոխությունից հետո և առաջնային ինչ խնդիրներ են առանձնացրել իշխանությունները:

«Կոմպաս» գիտահետազոտական կենտրոնի ղեկավար Ղարիբ Հարությունյանն ու «Ռեստարտ» ուսանողական շարժման ղեկավար Դավիթ Պետրոսյանը կարծում են, որ հեղափոխությունից հետո սոցցանցերում ու մեդիա դաշտում դժվար է տարբերել փաստը կարծիքից, ֆեյքերն ու իրականությունը։

«Կա մի կողմից հակահեղափոխական շարժումը և մյուս կողմից, եթե նույնիսկ առաջ գա, օրինակ ներկա իշխանություններին կուզեք կոչեք ընդդիմադիր հայացքներ կամ մոտեցումներ արտահայտողներ, սա նույնպես նույնացվում է հակահեղափոխական շարժման հետ, այսինքն թացը խառնվել է չորի հետ»,- նշել է Ղարիբ Հարությունյանը։

Բանախոսների շարքում էր նաև Շիրակի մարզպետի տեղակալ Սոֆյա Հովսեփյանը, ով կարծում է, որ ստեղծված իրավիճակից դուրս գալու ելքը արժեհամակարգի փոփոխությունն  է։

«Շիրակի մարզում խնդիրները բազմազան են, նախ առաջին հերթին պետք է տանել աշխատանքներ կրթության և առողջապահության ոլորտներում, որովհետև սա ուղղակիորեն կապված է բնակչի հետ և որտեղ կարևորագույն մի խնդիր է լուծվելու ՝ մարդու արժեհամակարգը, այսինքն այն արժեհամակարգը, որը դարձավ հեղափոխության հիմքերից մեկը»,-ասել է Սոֆյա Հովսեփյանը։

Հետհեղափոխական շրջանի կարևորագույն խնդիրներից Ժուռնալիստների «Ասպարեզ» ակումբի խորհրդի նախագահ Լևոն Բարսեղյանն առանձնացնում է Ընտրական օրենսգրքի փոփոխություններն ու արտահերթ խորհրդարանական ընտրությունները։

«Ենթադրում եմ, որ Ազգային ժողովի արտահերթ ընտրություններից հետո պիտի ՏԻՄ ընտրություններ լինեն, իմ ակնկալիքները շատ մեծ են, էս սիստեմը, որը ներմուծվեց հապճեպ Գյումրի, Երևան և Վանաձոր՝ ավագանու և համայնքի ղեկավարի ընտրության շատ անհաջող է, որը փորձը ցույց տվեց, որ սա հանգեցնում է ճգնաժամի, և՛ Գյումրիում, և՛ Երևանում տեսնում եք ինչ վիճակ է»,- ասել է Լևոն Բարսեղյանը։