Քննարկվել են էկոնոմիկայի, տարածքային կառավարման և ենթակառուցվածքների նախարարությունների, Քաղաքաշինության կոմիտեի տարեկան կատարողականներն ու հատկացումները

Հունիսի 1-ին ՀՀ ԱԺ տնտեսական ու ֆինանսավարկային և բյուջետային հարցերի մշտական հանձնաժողովների համատեղ նիստում քննարկվել են «ՀՀ 2021 թ. պետական բյուջեի կատարման մասին» էկոնոմիկայի, տարածքային կառավարման և ենթակառուցվածքների, բարձր տեխնոլոգիական արդյունաբերության նախարարությունների, Հանրային ծառայությունները կարգավորող և Տնտեսական մրցակցության պաշտպանության պետական հանձնաժողովների, Պետական եկամուտների, Կադաստրի, Քաղաքաշինության կոմիտեների տարեկան կատարողականները:

Տարածքային կառավարման և ենթակառուցվածքների նախարար Գնել Սանոսյանը ներկայացրել է տրանսպորտի, ջրային տնտեսության և էներգետիկայի, բնական պաշարների ոլորտների նախորդ տարվա կատարողականը:

Նախարարի տեղեկացմամբ` 2021 թ. նախարարությանը 22 ծրագրի և 16 միջոցառման համար հատկացվել է 243 մլրդ դրամ` նախատեսված 257 մլրդ դրամի փոխարեն: Կատարողականը կազմել է 94,5 տոկոս:

Գնել Սանոսյանի խոսքերով` հաշվետու տարում տրանսպորտի ոլորտին 3 ծրագրի 34 միջոցառման համար հատկացվել է 61,9 մլրդ դրամ: Ջրային տնտեսության ոլորտին` 28,2 մլրդ դրամ` 5 ծրագրի 38 միջոցառման համար, իսկ էներգետիկայի ու բնական պաշարների ոլորտին` 41,8 մլրդ դրամ` 3 ծրագրի 13 միջոցառման համար: Երեք ոլորտին միասին հատկացվել է 132 մլրդ դրամ, իսկ կատարողականը կազմել է 93,7 տոկոս?:

Էկոնոմիկայի նախարար Վահան Քերոբյանը ներկայացրել է իր ղեկավարած կառույցի 2021 թ. իրականացրած ծրագրերն ու բյուջետային հատկացումները:

Տարեսկզբին նախարարությանը հատկացված բյուջեն եղել է 32 մլրդ 319 մլն 738 դրամ, տարվա ընթացքում այն ճշգրտվել է և ավելացել մինչև 45 մլրդ 698 մլն 731 դրամ: Վահան Քերոբյանի խոսքերով` կատարողականը կազմել է 95 տոկոս: Էկոնոմիայի նախարարությունը նախատեսված գործողություններն էապես գերակատարել է:

Տնտեսության և զբոսաշրջության ոլորտներում իրականացվել է 7 ծրագիր, 29 միջոցառում, տնտեսական զարգացման ոլորտում` 6 ծրագիր, 25 միջոցառում, զբոսաշրջության ոլորտում իրականացվել է 1 ծրագիր:

Անդրադառնալով արտահանման ծավալներին` նախարարն ընդգծել է, որ նախորդ տարի 20 տոկոսով աճ է արձանագրվել:

Վահան Քերոբյանի խոսքով` ՀՆԱ-ի ընդհանուր աճին նպաստել են առևտուրն ու ծառայությունները, արդյունաբերությունն ու շինարարությունը:

Ըստ Քաղաքաշինության կոմիտեի նախագահ Արմեն Ղուլարյանի` 2021 թ. կոմիտեին հատկացվել է շուրջ 7,3 մլրդ դրամ: Փաստացի կատարողականը կազմել է 6,8 մլրդ դրամ կամ 94 տոկոս: Կապիտալ ծախսերը 6,8 մլրդ դրամից կազմել են 6,2 մլրդ դրամ, իսկ ընթացիկ ծախսերը` 653 մլն դրամ:

Կոմիտեի պատասխանատվությամբ 2021 թ. ընթացքում կատարվել է պետական բյուջեի 2 ծրագիր:

Կադաստրի կոմիտեի տարեկան ճշտված բյուջեն կազմել է 4 մլրդ 190 մլն դրամ, կատարողականը կազմել է 94,6 տոկոս:

Կադաստրի կոմիտեի ղեկավար Սուրեն Թովմասյանի տեղեկացմամբ` կոմիտեն ունեցել է 1 ծրագիր և դրա շրջանակում իրականացրել է մի քանի միջոցառումներ, որոնցից ամենակարևորը եղել է Հանրապետության ամբողջ տարածքի օդային լուսանկարահանումը, որն ամբողջությամբ իրականացվել է:

Զեկուցողները պատասխանել են նաև ԱԺ «Քաղաքացիական պայմանագիր» խմբակցության պատգամավորների հարցերին: