Մենք կհաղթահարենք այս անհաջողությունների շարքը և այսօր կհաղթենք. Վադիմ Սկրիպչենկո

Բարձրագույն խմբի առաջնության չորրորդ տուրին ընդառաջ, «Արարատ-Արմենիա» ակումբի մամուլի քարտուղարությունը զրույց է ունեցել գլխավոր մարզիչ Վադիմ Սկրիպչենկոյի հետ «Փյունիկ»-ի հետ խաղի, թիմի մարզավիճակի և առաջիկա մրցակից «Գանձասար Կապան»-ի մասին:

Ստորև ներկայացնենք հարցազրույցը.

– Ինչպե՞ս եք գնահատում թիմի տրամադրվածությունը անհաջողությունների շարքից հետո:

– Թիմի տրամադրվածությունը շատ մարտական է, ամբողջ թիմը պատրաստ է շտկելու այս իրավիճակը և դա զգացվում է և՛ մարզումների, և՛ թիմային քննարկումների, և՛ անհատական զրույցների ժամանակ: Իհարկե, երկու պարտությունները նստվածք են թողել, բայց պետք է հասկանալ, որ տարվում է աշխատանք, փնտրվում են օպտիմալ տարբերակներ դաշտում: Դեռ պետք է բացահայտել շատ ֆուտբոլիստների հնարավորությունները և մենք կանենք հնարավորինս, որպեսզի հաղթահարենք այս անհաջողությունների շարքը և այսօր հաղթանակ տանենք:

 – Հակասական մեկնարկից հետո դուք պահպանու՞մ եք հավատը թիմի նկատմամբ:

– Ոչինչ չի նվազեցնում մարդկային արժանապատվությունն այնքան, ինչքան սեփական հնարավորությունների վրա կասկածելը: Մարզչական շտաբը և մեր տղաները լավատեսությամբ ենք նայում այս իրավիճակին և պահպանում ենք մեր հավատը թիմի նկատմամբ:

– Կարելի՞ է սպասել կազմի արմատական փոփոխությունների «Գանձասար»-ի հետ խաղում:

– Ե՛վ մենք, և՛ «Գանձասար»-ը խաղացել ենք երկու օր առաջ, դրա համար մենք հավասար պայմաններում ենք գտնվում հակառակորդի հետ: Իհարկե, «Փյունիկ»-ի հետ խաղից հետո կլինեն փոփոխություններ, բայց այդ մասին մենք միայն վաղը վերջնական որոշում կկայացնենք և կտեղեկացնենք մեր տղաներին: Այսօր վերջնական որոշում դեռ չկա մեկնարկային կազմի մասին:

– Ըստ խաղացանկի՝ «Գանձասար»-ը ընդամենը մեկ հանդիպում է անցկացրել առաջնությունում, հասցրե՞լ եք ուսումնասիրել առաջիկա մրցակցին:

– «Գանձասար»-ը բավարար քանակությամբ խաղեր է անցկացրել՝ Եվրոպա լիգայի խաղարկության հանդիպումները, Բարձրագույն խմբի առաջնությունում խաղացել է «Ալաշկերտ»-ի հետ, և ընկերական հանդիպումը «Յունիոր Սևանի»-ի հետ, որը մեզ նույնպես հաջողվեց դիտել: Դրա համար արդեն կան պատկերացումներ մրցակցի մասին՝ բավականին հավասարակշռված թիմ է, լավ կատարողների ընտրությամբ: Ինչպես և մյուս բոլոր ակումբները, «Գանձասար»-ը նույնպես ունի ուժեղ և թույլ կողմեր: Այս պահին ամենակարևորը մեր հնարավորություններն օգտագործելն է. ուժեղ կողմերը հարձակման գծում և հուսալի պաշտպանությունը թույլ կտան մեզ հասնել դրական արդյունքի:

«Արարատ-Արմենիան» 3-րդ տուրից հետո վաստակել է 3 միավոր և զբաղեցնում է մրցաշարային աղյուսակի 7-րդ հորիզոնականը: