Պարգևատրվել են Հայկական համադպրոցական գիտության փառատոնի հաղթողները

ՀՀ կրթության, գիտության, մշակույթի և սպորտի նախարարի տեղակալ Արաքսիա Սվաջյանն այսօր պարգևատրել է Հայկական համադպրոցական գիտության փառատոնի հաղթողներին:

ԿԳՄՍ նախարարի տեղակալի խոսքով՝ նմանօրինակ միջոցառումները նպատակ ունեն գնահատելու աշակերտների գրանցած հաջողությունները։

«Մենք պետք է անենք հնարավորը՝ ստեղծելու այն պարարտ հողը և միջավայրը, որոնք մեր դպրոցականներին հնարավորություն կտան կյանքի կոչելու իրենց հետաքրքիր գաղափարները: Վստահ եմ՝ մեր երեխաները շատ հետաքրքիր ու նորարական գաղափարներ ունեն: Շնորհակալություն եմ հայտնում նաև մեր մանկավարժներին: Որքան էլ մեր աշակերտները վառ են ու խելացի, սակայն եթե չապահովվի այն միջավայրը, որում իրենք պետք է կյանքի կոչեն իրենց ներուժն ու մտքերը, արդյունքներ չեն լինի »,- նշել է Սվաջյանը՝ արձանագրված արդյունքների համար շնորհակալություն հայտնելով մանկավարժներին։

Գիտության փառատոնի նպատակն էր դպրոցահասակ երիտասարդների շրջանում գիտական հետազոտությունների նկատմամբ հետաքրքրության սերմանումը, խմբային աշխատանքի, նորարարական նախագծերի իրականացման և դրանց ներկայացման հմտությունների զարգացումը:

Փառատոնին մասնակցող միջին և ավագ դասարանների աշակերտները՝ անհատապես կամ երկուհոգանոց խմբով և գիտական ղեկավարի աջակցությամբ, 2022-2023 ուսումնական տարվա ընթացքում իրականացրել են իրենց իսկ կողմից առաջադրված հետազոտական նախագծեր, իսկ եզրափակիչ փուլի ընթացքում ներկայացրել են իրենց հետազոտությունների արդյունքները։

Փառատոնի ընթացքում 5 տարբեր անվանակարգերում հաղթող է ճանաչվել 17 նախագիծ, 5 նախագիծ հնարավորություն է ստացել մասնակցելու միջազգային գիտական փառատոններին, 12 նախագիծ արժանացել է խրախուսական մրցանակի։

Արաքսիա Սվաջյանը կարևորել է այն փաստը, որ այս տարի Համահայկական համադպրոցական գիտության փառատոնին աննախադեպ մասնակցություն է եղել: Հիշեցնենք՝ երրորդ անգամ անցկացվող փառատոնին «Մաթեմատիկա և ծրագրավորում», «Ֆիզիկա և աստղագիտություն», «Քիմիա», «Կենսաբանություն», «Հասարակական գիտություններ» անվանակարգերում Երևանի և մարզերի 40 ուսումնական հաստատություններից ներկայացվել է 83 հետազոտական նախագիծ:

«Սա շատ ողջունելի է և վկայում է այն մասին, որ մեր դպրոցականները սկսել են ավելի շատ հետաքրքրվել գիտությամբ: Վստահ ենք՝ նման տեմպերի դեպքում մեր դպրոցականների գիտական հետաքրքրությունները շատ ավելի վառ ու արտահայտված են դառնալու: Մենք էլ այս գործընթացի միջոցով ապահովելու ենք թե՛ իրենց մասնագիտական կողմնորոշումը, թե՛ հետագայում բուհական ուսումնառության ընթացքում առավել լուրջ քայլեր անելու ու գիտությամբ զբաղվելու հեռանկարները»,- նշել է ԿԳՄՍ նախարարի տեղակալը:

Մասնագիտական ժյուրիի որոշմամբ «Այբ» դպրոցի ներկայացրած «Կենսաքայքայվող պոլիմերային թաղանթի ստացման սարք», Երևանի Գ. Էմինի անվան թիվ 182 ավագ դպրոցի աշակերտների ներկայացրած «Բուսական պոլիֆենոլները որպես բնական կոնսերվանտներ», Կապանի թիվ 3 միջնակարգ դպրոցից ներկայացված «Ջրածնի այլընտրանքային արտադրություն» և Երևանի Ա. Երզնկյանի անվան հ. 118 ավագ դպրոցից ներկայացված «Տատանում գրանցող և ճանաչող օպտիկական գերզգայուն սարք» նախագծերը երաշխավորվել են միջազգային գիտության փառատոններին մասնակցելու համար:

Նշված նախագծերից առաջինը կմասնակցի մայիսի 14-19-ն ԱՄՆ-ի Տեխաս նահանգի Դալլաս քաղաքում (TX at the Kay Bailey Hutchinson Convention Center) կայանալիք միջազգային գիտական և ճարտարագիտական «Regeneron» (ISEF-2023) տոնավաճառին, մյուս երեքը՝ երիտասարդ գիտնականների ԵՄ «EUCYS» մրցույթին, որը տեղի կունենա Բելգիայի թագավորության Բրյուսել քաղաքում 2023 թ. սեպտեմբերի 13-17-ը։

Նախարարի տեղակալ Արաքսիա Սվաջյանն ընդգծել է՝ գիտությունն այն ուղղություններից է, որը պետք է դուրս գա միջազգային դաշտ. «Շատ ուրախ ենք, որ որոշ նախագծեր ԱՄՆ-ում և Բելգիայում կմասնակցեն միջազգային գիտության փառատոնների: Վստահ եմ՝ նմանօրինակ միջազգային փառատոններին մասնակցությունն ամրապնդելու է մեր տեղը համաշխարհային գիտության մեջ»:

ԿԳՄՍ նախարարի տեղակալի խոսքով՝ ներկայացված նախագծերից շատերը հետագայում առավել լուրջ գիտական հետազոտություն անցնելուց հետո կարող են մեր երկրի տնտեսության որևէ ոլորտում փոփոխության հանգեցնել. «Կային նախագծեր, որոնք շատ խոստումնալից էին: Վստահ եմ՝ այդ նախագծերը հետևողական կերպով առաջ տանելու և լուրջ հետազոտություններ անելու դեպքում կարող են իսկապես հիմնարար ազդեցություն ունենալ մեր այս կամ այն ոլորտի զարգացման գործում: Մեզ համար շատ կարևոր է մասնակցության ծավալների մեծացումը: Որքան շատ մեր երեխաները հետաքրքրված լինել գիտությամբ, որքան շատ իրականացնեն թիմային ու նախագծային աշխատանքներ, այնքան ավելի հաջողելու ենք դպրոցական կրթության մեջ»:

Մասնագիտական ժյուրին առանձնացրել է տարբեր անվանակարգերի մրցանակակիրներին՝ 2 նախագիծ՝ «Մաթեմատիկա և ծրագրավորում», 3 նախագիծ՝ «Ֆիզիկա և աստղագիտություն», 4 նախագիծ՝ «Քիմիա», 6 նախագիծ՝ «Կենսաբանություն» և 2 նախագիծ՝ «Հասարակական գիտություններ» անվանակարգերից:

12 նախագիծ արժանացել է խրախուսական մրցանակի, իսկ Վանաձորի Ս. Թևոսյանի անվան պետական պոլիտեխնիկական քոլեջի «Դեպի վեր» նախագիծն արժանացել է ISEF Community Innovation Award – 2023 մրցանակին։