«Իհարկե սա բարդ խաղ էր». Հենրիխ Մխիթարյանը՝ «Ուոթֆորդ»-ի հետ հանդիպման մասին

Ընդամենը երեք օր առաջ «Միլան»-ի դաշտում իտալական  ակումբին հաղթելուց հետո Պրեմիեր լիգայի 30-րդ տուրում «Արսենալ»-ն,  իհարկե, բարձր տրամադրությամբ էր հյուրընկալել «Ուոթֆորդ»-ին: Դա նկատվեց  խաղի հենց սկզբից: Արդեն երկրորդ րոպեին հյուրերի դարպասապահը դժվարությամբ փրկեց իր թիմին, սակայն քիչ անց նա էլ անզոր եղավ դիմակայել Մուսթաֆիի գլխով հարվածին: Երկրորդ խաղակեսին լոնդոնցիների առավելությունը, Մխիթարյանի ճիշտ ժամանակին արված փոխանցումից հետո, կրկնապատկեց Օբամեյանգը: 

Քիչ անց հյուրերը չօգտագործեցին հաշվի տարբերությունը կրճատելու 100 տոկոսանոց հնարավորությունը: «Արսենալ»-ի դարպասին նշանակված 11 մետրանոց հարվածը հետ մղեց Պետեր Չեխը:  Խաղի ավարտից հետո շնորհավորանքներ ստացող ֆուտբոլիստներից մեկը հենց Չեխն էր, քանի որ այս հանդիպումը նրա կարիերայում 200-րդն էր, որում  գնդակ բաց չէր թողել:  11-մետրանոցի դրվագին հետխաղյա հարցազրույցում հատուկ անդրադարձել էր նաև Արսեն Վենգերը: 

«Երբ հաշիվը 2-0 էր, նրանք ստացան 11 մետրանոց հարվածի իրավունք:  Մենք այդ ժամանակ արդեն բավականին հոգնած էինք, և եթե հանկարծ հաշիվը դառնար 2-1, ապա դժվար է ասել՝ հանդիպումն ինչ ընթացք ու ավարտ կունենար:  Ընդհանուր առմամբ դժվար խաղ էր, ինչպես և Պրեմիեր լիգայի բոլոր հանդիպումները: Ամեն դեպքում մենք կարողացանաք բարձր կամային հատկանիշներ դրսևորել և հաղթել»,-նշել է Վենգերը:  

Հաղթական ու վերջին գոլն իր հաշվին գրանցեց Հենրիխ Մխիթարյանը: Այս անգամ Մխիթարյանն ու Օբամեյանգը դերերով փոխվեցին և աֆրիկացու փոխանցումից հետո Մխիթարյանը դարձավ գոլի հեղինակ:  Եվ ամեն դեպքում ընդհանուր արդյունքով լավագույնը լոնդոնցիների կազմում դարձյալ Մխիթարյանն էր:   

Whoscored.com մարզական վերլուծական կայքը 10 հնարավորից 8.79 միավոր տվեց Մխիթարյանին, ինչը ամենաբարձր ցուցանիշն էր դաշտում գնտվող բոլոր ֆուտբոլիստների շրջանում:  Հիշեցնենք, որ Մխիթարյանը լավագույնն էր նաև «Միլան»-ի դեմ խաղում, ու նաև փետրվարի լավագույն ֆուտբոլիստ էր ճանաչվել «Արսենալ»-ի կազմում: 

«Իհարկե  սա  բարդ հանդիպում էր:  Բայց մենք «Միլան»-ի հետ խաղից հետո որոշակի վստահություն ձեռք բերեցինք ու տարբերությունը նախորդ խաղերի համեմատ, կարծում եմ, արդեն զգալի է:  Մենք շարունակելու ենք աշխատել նույն կերպ և ավելացնելու ենք միավորների թիվը:  Մենք շարունակելու ենք խաղալ  երկրապագուների համար՝  նաև այն երկրպագուների, ովքեր վերջին շրջանում չեն գալիս խաղադաշտ»,- պատասխանել է Մխիթարյանը: 

«Ուոթֆորդ»-ի հետ խաղին լոնդոնցիների Էմիրեյթս մարզադաշտում  դարձյալ դատարկ տեղեր շատ կային:  Անհաջող ելույթների շարքը դեռ իր ազդեցությունը թողել է: Շատ մարզական վերլուծաբանների կարծիքով, սակայն, «Արսենալ»-ի վերջին հանդիպումը  թե թիմի, թե  հատկապես մարզչի հանդեպ  առաջացած տրամադրություններում որոշակի դրական փոփոխություն կկատարի:  Երկրորդ հաղթանակը, հինգ խփած և ոչ մի բաց թողած գնդակ, իսկ Վենգերի մասին դարձյալ խոսում են, որ նա դեռ գործի մեջ է: 

«Արսենալ»-ը միայն ես չեմ: Դա մի մեծ կոլեկտիվ է:  Մինչև որոշում ընդունելը ես խորհրդակցում եմ առնվազն  20 հոգու հետ: Ինձ շրջապատում են շատ տաղանդավոր մարդիկ, ովքեր նույնպես  իրենց կյանքը նվիրել են «Արսենալ»-ին:  Շնորհակալ եմ երկրպագուներից ու նաև «Արսենալ»-ի հետ կապ չունեցող, բայց ինձ հարգող չեզոք երկրպագուներից:   Հիմա շատ հարցեր փողն է լուծում, իսկ գլխավոր արժեքները փողի մեջ չեն: Կարելի է սիրել կամ չսիրել «Արսենալ»-ը, բայց պետք է հասկանալ ինչն է ամենագլխավորը ֆուտբոլում: Ափսոսում եմ, որ հիմա այդ մասին շատ չեն խոսում»,- լրագրողի հարցին պատասխանել է Վենգերը: 

Պրեմիեր լիգայի ընթացիկ մրցաշրջանում «Արսենալ»-ը գործնականում  ոչնչի արդեն չի հավակնում, չհաշված թերևս այն որ կայուն, հուսալի  խաղը կարող է որոշակիորեն վերականգնել ակումբի երբեմնի վարկանիշը:  Ինքնավստահությունն  ավելի ամրապնդելու  համար   շատ ավելի կարևոր  է  «Եվրոպա լիգայում»  հաջող հանդես գալը:   Առջևում «Միլան»-ի հետ  պատասխան հանդիպումն է Լոնդոնում և «Արսենալ»-ը հաջորդ փուլ դուրս գալու  բոլոր հնարավորություններն ունի:  Հիշեցնենք, որ այդ հանդիպումը կկայանա  մարտի 15-ին և կհեռարձակվի «Շանթ»-ի ու «Շանթ պրեմիում»-ի եթերում: