Նվիրյալ, անպարտելի հրամանատար, բացառիկ տեսակ… Տեղ գյուղի սահմանագծում զոհված Մկրտիչ Հարությունյանը կամ լեգենդար Մգրոն

2023 թ.-ի ապրիլի 11-ին թշնամու կողմից սանձազերծված ագրեսիայի ընթացքում Սյունիքի մարզի Տեղ գյուղի սահմանագծում հատուկ առաջադրանք կատարելիս քաջի մահով զոհվեց Մայոր Մկրտիչ Հարությունյանը։

Հայրենիքի պաշտպանության և անվտանգության ապահովման գործում ներդրած ավանդի, ցուցաբերած բացառիկ արիության և անմնացորդ, անձնազոհ նվիրումի համար Մկրտիչ Հարությունյանը հետմահու պարգևատրվել է ՀՀ պետական բարձր պարգևով՝ <<Մարտական խաչ>> 1-ին աստիճանի շքանշանով։

Մկրտիչ Հարությունյանը ծնվել է 1989 թ.-ի նոյեմբերի 15-ին Արագածոտնի մարզի Թալին քաղաքում՝ զինծառայողի ընտանիքում։
1996 թ.-ին հաճախել է Թալինի թիվ 1 միջնակարգ դպրոց, այնուհետև ուսումը շարունակել է Թալինի բնագիտամաթեմատիկական հատուկ դպրոցում, որն ավարտել է բարձր առաջադիմությամբ 2006 թ.-ին։
2006 թ.-ին ընդունվել և սովորել է Եվրոպական կրթական տարածաշրջանային ակադեմիայի <<Միջազգային հարաբերություններ>> ֆակուլտետում։
2007 թ.-ին զորակոչվել է պարտադիր զինվորական ծառայության և ծառայել է ՀՀ ԶՈւ հատուկ նշանակության N զորամասում։
2009 թ.-ին զորացրվել է և ուսումը շարունակել <<Միջազգային հարաբերություններ>> ֆակուլտետում՝ ստանալով բակալավրի աստիճան։
2013 թ.-ին պայմանագրային ծառայության է անցել դարձյալ ՀՀ ԶՈւ հատուկ նշանակության N զորամասում որպես սերժանտ։
2014 թ.-ին իր բարեխիղճ ծառայության համար ստացել է <<Լեյտենանտ>> կոչում և զբաղեցրել է հատուկ նշանակության խմբի հրամանատարի պաշտոն։
2016 թ.-ին ստացել է <<Ավագ լեյտենանտ>> կոչում և բարձր պատասխանատվությամբ կատարելով ծառայողական պարտականությունները՝ 2017 թ.-ին զբաղեցրել է հատուկ նշանակության N զորամասի սպա-հրահանգչի պաշտոն։
2016 թ.-ին ծառայողական գործունեությանը զուգահեռ ընդունվել և 2018 թ.-ին բարձր առաջադիմությամբ ավարտել է ՀՀ գիտությունների ազգային ակադեմիայի <<Իրավագիտության>> ֆակուլտետը՝ ստանալով մագիստրոսի աստիճան։
2016 թ.-ին մասնակցել է Ապրիլյան քառօրյա պատերազմին՝ ՀՀ ԶՈւ հատուկ նշանակության ջոկատայինների հետ իրականացնելով մի շարք կարևորագույն մարտական գործողություններ, որի արդյունքում հակառակորդին չի հաջողվել գրավել Արցախի Հանրապետության Մատաղիսի շրջանի Թալիշ գյուղը, և թշնամու հատուկ նշանակության զորքերին (Յաշմա) պատճառվել է զգալի կորուստներ։
2020 թ.-ի սեպտեմբերի 27-ին թշնամու կողմից սանձազերծված պատերազմի առաջին իսկ օրվանից ՀՀ ԶՈւ հատուկ նշանակության N զորամասի սպա-հրահանգիչների կազմում մեկնել է Արցախի Հանրապետություն՝ առաջնագծում մարտնչելով ամենաթեժ կետերում (Քարվաճառ, Ջրական (Ջաբրայիլ), Հադրութ, Կուբաթլու, Սղնախ, Շուշի, Քարինտակ, Լիսագոր)։
Մարտական գործողությունների ընթացքում հատուկ նշանակության ջոկատայինների կազմով մարտնչել և ջախջախել են բազմազգ և վարձկան ելուզակներին։
Ծառայության ընթացքում հատուկ ջոկատայինների կազմում կատարել է մի շարք պատժիչ գործողություններ:
2021 թ.-ին ստացել է <<Մայոր>> կոչում։ Անբասիր ծառայության և փառքով անցած մարտական ուղու համար վերադաս հրամանատարության կողմից առաջադրվել և 2022 թ.-ին նշանակվել է ՀՀ ԶՈւ հատուկ նշանակության N զորամասի սպայական գումարտակի հրամանատարի տեղակալի պաշտոնում՝ միաժամանակ կատարելով գումարտակի հրամանատարի պարտականությունները։
2022 թ.-ին իր գումարտակով մասնակցել է սեպտեմբերյան մարտերին՝ հաջող իրականացնելով հատուկ առաջադրանքներ կարևորագույն նշանակություն ունեցող բարձունքում՝ Իշխանասարում։
2023 թ.-ի փետրվարից նշանակվել է ՀՀ ԶՈւ հատուկ նշանակության N զորամասի սպայական գումարտակի հրամանատար։
Ծառայության ընթացքում որպես ռազմական գործի գիտակի, հմուտ հրամանատարի աչքի է ընկել սխրանքներով և իր առջև դրված մարտական խնդիրների իրականացումը գնահատվել է գերազանց։
Որպես գիտելիքներով զինված հմուտ հետախույզի գործուղվել է մի շարք օտարերկրյա պետություններ, որոնցում կազմակերպված ռազմական միջոցառումներին հանդիսացել է ՀՀ ԶՈւ ներկայացուցիչների կազմում՝
2015թ.-ին մասնակցել է Հունաստանում կազմակերպված հատուկ ռազմական դասընթացներին:
2015թ.-ին մասնակցել է Ռուսաստանի Դաշնության Բլագովեշենսկ քաղաքում եռամսյա լեռնային դասընթացների։
2017թ.-ին մասնակցել է Մեծ Բրիտանիայի Միացյալ Թագավորության (Exercise CAMBRIAN PATROL) զորավարժությանը։
2018թ.-ին մասնակցել է Իտալիայի Հանրապետության Ալպիական զորքերի զորավարժությանը։
2019թ.-ին մասնակցել է Չինաստանի Ժողովրդավարական Հանրապետությունում հայ-չինական համատեղ զորավարժությանը։
2019թ.-ին և 2023թ.-ին մասնակցել է Արաբական Միացյալ Էմիրությունների Դուբայ քաղաքում անցկացվող (THE UAE SWAT CHALLENGE) մրցումներին։
2021թ.-ին մասնակցել է Հունաստանի Սալոնիկ քաղաքում Հայ-Հույն-Կիպրական զորքերի հետ համատեղ զորավարժությանը։
2022թ.-ին մասնակցել է Սերբիայում կազմակերպված զենք-զինամթերքի ցուցահանդեսին:
2022թ.-ի մարտ-հուլիս ամիսներին գործուղվել է Սիրիայի Արաբական Հանրապետություն որպես 9-րդ զորախմբի հրամանատարի տեղակալ։
Հայրենիքի պաշտպանության գործում ցուցաբերած արիության համար պարգևատրվել է <<Գարեգին Նժդեհ>>, <<Անբասիր ծառայության համար>> 1-ին աստիճանի մեդալներով, ռազմական հետախուզության <<Ծառայության համար>> կրծքանշանով, ՀՀ ԶՈւ հատուկ նշանակության N զորամասի Պատվո գրքում զետեղվելու հավաստագրով և մի շարք գերատեսչական պատվոգրերով և շնորհակալագրերով։
44-օրյա պատերազմում հայրենիքի պաշտպանության և անվտանգության ապահովման գործում ներդրած ավանդի, մարտական գործողությունների ընթացքում ցուցաբերած արիության և հմտության համար պարգևատրվել է ՀՀ պետական պարգևով՝ Մարտական ծառայության մեդալով։

Մկրտիչ Հարությունյանը ամուսնացած է, ունի երկու դուստր։