Հեղափոխությունից մինչ օրս Հայաստանի տնտեսությունն աճել է գրեթե 30 տոկոսով. ՀՀ վարչապետ

Ազգային ժողովի մշտական հանձնաժողովների համատեղ նիստում մայիսի 29-ին մեկնարկել են «Հայաստանի Հանրապետության 2023 թվականի պետական բյուջեի կատարման մասին» տարեկան հաշվետվության նախնական քննարկումները:

Նիստին ներկա են եղել ՀՀ վարչապետ Նիկոլ Փաշինյանը, ՀՀ ԱԺ նախագահ Ալեն Սիմոնյանը, օրենսդիր և գործադիր իշխանությունների ներկայացուցիչներ:

ՀՀ վարչապետը մի շարք հայեցակարգային հարցերի է անդրադարձել, արձանագրել, որ պետությունը պետք է ընկալվի որպես լավ ապրելն ապահովելուն միտված գործիք, իսկ ՀՀ քաղաքացու ձգտումը և նպատակադրումը պետք է լինի լավ ապրելը:

«Իմ գնահատմամբ մարդը, քաղաքացին ուզում է ապրել և ոչ տառապել, մարդն ուզում է վայելել կյանքը և ոչ թե ճգնել, մարդն ուզում է սիրել և սիրված լինել, մարդն ուզում է լինել ազատ, բարեկեցիկ, կենսուրախ և երջանիկ, ուզում է ապրել խաղաղ, արդար և արժանապատիվ միջավայրում: Այս նպատակին պետք է ծառայի պետությունը՝ Հայաստանի Հանրապետությունը»,- ընդգծել է ՀՀ վարչապետը:

Նիկոլ Փաշինյանն անդրադարձել է արժեհամակարգային ընկալումների վերափոխմանը և արձանագրել, որ ՀՀ քաղաքացու համար ազատությունն այլևս բավարար չէ, որովհետև հարկավոր է արդարություն, անվտանգությունն այլևս բավարար չէ. հարկավոր է խաղաղություն: Նրա գնահատմամբ չենք նկատել, որ մեր պետության գոյության ընթացքում այն, ինչն անվանել ենք անվտանգություն, բավականին վտանգավոր է եղել: Գործադիրի ղեկավարի համոզմամբ խաղաղությունն է, որ կարող է ապահովել անվտանգություն: Վարչապետը խոսել է նաև բարեկեցության, կենսունակության նկատմամբ հանրության վերաբերմունքի վերանայման մասին:

Նիկոլ Փաշինյանը համոզված է, որ ժողովուրդը պետք է հասկանա, թե ինչու է ֆինանսավորում թանկ նախագիծ պետությունը: «Եթե ֆինանսավորում է, որ դրա արդյունքում ավելի վատ ապրի, ավելի պակաս ազատ և երջանիկ զգա իրեն, այդ պետությունը մարդու համար կկորցնի իմաստը»,- փաստել է գործադիրի ղեկավարը:

ՀՀ վարչապետը մանրամասնել է արդյունավետ պետության տեսլականը և արձանագրել. «Արդյունավետ պետությունը փոփոխվող աշխարհում անընդհատ փոփոխվելու և զարգանալու, մարտահրավերներին ու նպատակներին հարմարեցված որոշումներ կայացնելու ընդունակ պետությունն է, և սա միակ բանաձևն է, որը կապահովի պետության հարատևությունը և պետության կենսունակությունը»:

Երկրի վարչապետը մանրամասն խոսել է ՀՀ ժողովրդի ազգային արժեքների, բանակի ընկալման փոփոխության, կրթական համակարգի բարեփոխումների անհրաժեշտության վերաբերյալ:

«Փոփոխվող աշխարհում անընդհատ փոփոխվելու և զարգանալու, մարտահրավերին և նպատակներին հարմարեցված որոշումներ կայացնելու ընդունակ կառավարություն, խորհրդարան և կառավարող մեծամասնություն պետք է լինենք: Սա է այն նպատակադրումը և ձեռքբերումը, որն ունենք 2023 թվականի պետական բյուջեի ծախսման արդյունքներով և պետք է շարունակենք սպասարկել այս նպատակադրումը»,- փաստել է Նիկոլ Փաշինյանը:

Բյուջետային հատկացումների համատեքստում նա կարևորել է այն փաստը, որ 2023 թվականին արձանագրվել է 8,7 տոկոս տնտեսական աճ, ինչը 2021 թվականի արտահերթ ընտրությունների նախընտրական ծրագրով արտահայտված նպատակադրումից բարձր է: Նրա խոսքով ե՛ւ 2022 թվականին, ե՛ւ 2023 թվականին այդ նպատակադրումից բարձր տնտեսական աճ է արձանագրվել: «Մեր նպատակադրումն էր տարեկան միջինում ունենալ 7 տոկոս տնտեսական աճ: Կարևոր է արձանագրել, որ 2018 թվականի ժողովրդական, ոչ բռնի, թավշյա հեղափոխությունից մինչ օրս Հայաստանի տնտեսությունն աճել է գրեթե 30 տոկոսով: Սա շատ կարևոր ցուցանիշ է»,- փաստել է ՀՀ վարչապետը:

Նիկոլ Փաշինյանը մանրամասն խոսել է արտագաղթի առանցքային պատճառների, կղերաֆեոդալական մտածողության հաղթահարման կարևորության, աշխատատեղերի ստեղծման հայեցակարգի, գործազրկության նվազման միտումների, հարկերի և տուրքերի գծով եկամուտների, եկամտային հարկի վերադարձի քաղաքականության, աշխատավարձի աճման միտումների և պետական բյուջետային քաղաքականության մի շարք դրսևորումների վերաբերյալ:

Մանրամասները` տեսանյութում: