Կարևորվել է Հայաստանի և Վիետնամի խորհրդարանների աշխատակազմերի փոխհամագործակցությունը

Վիետնամի Սոցիալիստական Հանրապետության Ազգային ժողովի նախագահ Չան Թան Մանի գլխավորած պատվիրակության՝ Հայաստան կատարած պաշտոնական այցի շրջանակում ՀՀ ԱԺ աշխատակազմի ղեկավար-գլխավոր քարտուղար Դավիթ Առաքելյանն ապրիլի 3-ին հանդիպել է Վիետնամի Ազգային ժողովի գլխավոր քարտուղար-աշխատակազմի ղեկավար Լե Քուանգ Թունգին:

Ողջունելով գործընկերոջը՝ Դավիթ Առաքելյանը կարեւորել է նման փոխայցերի նշանակությունը երկու երկրների խորհրդարանների եւ խորհրդարանների աշխատակազմերի համագործակցության տեսանկյունից:

Նա նշել է, որ Հայաստանի խորհրդարանի աշխատակազմը բարեկամական եւ գործընկերային հարաբերություններ ունի տարբեր երկրների խորհրդարանների աշխատակազմերի հետ: «Նման համագործակցությունը հնարավորություն է ստեղծում ոչ միայն ապահովելու խորհրդարանների բնականոն գործունեությունը, այլեւ ընձեռում է հնարավորություն՝ ուսումնասիրելու այլ երկրների խորհրդարանների աշխատանքների փորձն ու ինստիտուցիոնալ գործելաոճը»,- ասել է Դավիթ Առաքելյանը: Նրա խոսքով փորձի փոխանակմամբ աշխատակազմի աշխատակիցները, ուսումնասիրելով այլ երկրների խորհրդարանների աշխատակազմի փորձը, տարատեսակ ծրագրեր են տեղայնացրել Հայաստանի խորհրդարանում՝ ստեղծելով ավելի մեծ հնարավորություններ արդյունավետ գործունեություն ապահովելու համար:

Դավիթ Առաքելյանը գործընկերոջը ներկայացրել է ԱԺ աշխատակազմի կողմից իրականացված հաջողված եւ արդեն ինստիտուցիոնալ դարձած ծրագրերը: Նա, մասնավորապես, խոսել է «Ամառային դպրոց» ծրագրի մասին՝ նշելով, որ այն հնարավորություն է ընձեռում աշակերտներին ավելի լավ պատկերացնել երկրի կառավարման առանձնահատկությունները:

ՀՀ ԱԺ աշխատակազմի ղեկավար-գլխավոր քարտուղարի խոսքով ակտիվ աշխատանքներ են իրականացվում երիտասարդական խորհրդարանի ներդրման ուղղությամբ, անցած տարի պիլոտային ներդրումից հետո բարձր էր գնահատվել ծրագրի ներուժը երիտասարդության շրջանում: Այս ծրագիրը հնարավորություն կտա երիտասարդներին ուսումնասիրելու եւ ավելի մատչելի պատկերացնելու օրինաստեղծ գործունեությունը, քանի որ երիտասարդները հանդես են գալիս որպես պայմանական պատգամավորներ, մշակում են օրենքի նախագիծ, քննարկում հանձնաժողովներում եւ ներկայացնում երիտասարդներից կազմված խորհրդարանին, որտեղ եւ քվեարկում են: Հաղթած օրինագիծը ներկայացվում է գործող մշտական հանձնաժողովի, իսկ այնուհետեւ լիագումար նիստին՝ քննարկման համար:

Դավիթ Առաքելյանը նշել է, որ Հայաստանի խորհրդարանի աշխատակազմի համար կարեւորագույն առաջնահերթություններից է խորհրդարանի գործունեության եւ գործընթացների թվայնացումը: Նա տեղեկացրել է նաեւ, որ Միջխորհրդարանական միության (IPU) շրջանակում անցյալ տարի մեր երկրում տեղի է ունեցել Երիտասարդ խորհրդարանների տարեկան համաժողովը: Հայաստանի խորհրդարանի աշխատակազմն ակտիվ է նաեւ Միջխորհրդարանական միության աշխատակազմերի ղեկավարների հարթակում:

Լե Քուանգ Թունգը շնորհակալություն է հայտնել Դավիթ Առաքելյանին ջերմ ընդունելության եւ խորհրդարանի հաջողված փորձն ու ծրագրերը ներկայացնելու համար: Վիետնամի խորհրդարանի գլխավոր քարտուղար-աշխատակազմի ղեկավարը եւս ներկայացրել է իրենց աշխատակազմում իրականացված, հաջողված ծրագրերը՝ շեշտելով, որ աշխատակազմերի կողմից իրականացվող գործառույթների որակյալ եւ պատշաճ իրականացումն է ապահովում խորհրդարանի բնականոն գործունեությունը, հետեւապես խորհրդարանների աշխատակազմերի կարողությունների մշտական կատարելագործումը մեծ նշանակություն ունի:

Նա երկու երկրների աշխատակազմերի համագործակցության, համատեղ ծրագրեր իրականացնելու պատրաստակամություն է հայտնել, այդ թվում՝ Միջխորհրդարանական միության աշխատակազմերի ղեկավարների հարթակում:

Նշվել է, որ երկու երկրների խորհրդարանների աշխատակազմերի փոխհամագործակցությունը կլինի արդյունավետ թե՛ խորհրդարանների, թե՛ աշխատակազմերի հարաբերությունների խորացման համար:

Հանդիպմանը ներկա է եղել ԱԺ աշխատակազմի ղեկավարի տեղակալ Հեղինե Խաչիկյանը: