Հուսով եմ, որ բանակցությունները կավարտվեն հօգուտ մեր երկրի ու ժողովրդի. Արա Բաբլոյան

ՀՀ Ազգային ժողովի նախագահ Արա Բաբլոյանը հոկտեմբերի 9-ին ընդունել է Լիտվայի Հանրապետության արտաքին գործերի նախարար Լինաս Լինկևիչուսին, տեղեկացնում են ՀՀ Ազգային ժողովի լրատվության և հանրության հետ կապերի վարչությունից:

Արա Բաբլոյանը, ողջունելով հյուրին Երևանում կայանալիք Ֆրանկոֆոնիայի միջազգային կազմակերպության 17-րդ գագաթնաժողովին մասնակցելու նպատակով Հայաստանում գտնվելու կապակցությամբ` բարձր է գնահատել այն փաստը, որ Լիտվան ՀՀ անկախությունը ճանաչած առաջին երկիրն է:

Ազգային ժողովի նախագահը կարևորել է Հայաստանի և Լիտվայի խորհրդարանականների միջև սերտ շփումներն ու համագործակցության ակտիվացումը, ինչպես նաև արդյունավետ խորհրդարանական փոխգործակցությունը միջազգային հարթակներում:

Խոսելով Հայաստան-Եվրամիություն Համապարփակ և ընդլայնված գործընկերության համաձայնագրի մասին` խորհրդարանի ղեկավարը շնորհակալություն է հայտնել Լիտվայի ղեկավարությանը փաստաթուղթը վավերացնելու կապակցությամբ:

Անդրադառնալով ներհայաստանյան իրադարձություններին՝ Արա Բաբլոյանը վստահեցրել է, որ տեղի ունեցած փոփոխությունները որևէ կերպ չեն ազդել հայ-լիտվական հարաբերությունների վրա: Այս համատեքստում օրենսդիր մարմնի ղեկավարը նշել է, որ Հայաստանի վերջին իրադարձությունները ևս մեկ անգամ վկայեցին, որ մեր երկիրը շարունակում է ընթանալ ժողովրդավարության ճանապարհով:

«Որպես ՀՀ ԱԺ նախագահ՝ ինձ համար կարևոր է, որ բոլոր որոշումները լինեն քաղաքական քննարկումների և փոխհամաձայնության շրջանակում: Հուսով եմ, որ այս պահին ընթացող բանակցությունները կավարտվեն հօգուտ մեր երկրի ու ժողովրդի՝ առանց ցնցումների և չեն նվազեցնի մեր երկրի վարկանիշը միջազգային ասպարեզում»,-ասել է Արա Բաբլոյանը:

Լինաս Լինկևիչուսը, շնորհակալություն հայտնելով ջերմ ընդունելության համար, ևս բարձր է գնահատել երկկողմ հարաբերությունների ներկա մակարդակը: Նա կարևորել է երկու երկրների խորհրդարանականների համագործակցությունը, փոխայցերն ու փորձի փոխանակումը: Նախարարը մի շարք ոլորտներում փոփոխություններ իրականացնելու հարցում իրենց երկրի ունեցած փորձը փոխանցելու պատրաստակամություն է հայտնել: Լինաս Լինկևիչուսն ընդգծել է տնտեսական փոխգործակցության զարգացման ու խորացման անհրաժեշտությունը՝ նշելով, որ մի շարք ոլորտներում, ինչպես, օրինակ, տեղեկատվական տեխնոլոգիաների, էլեկտրոնային կառավարման, չօգտագործված մեծ ներուժ կա:

Հանդիպման ընթացքում զրուցակիցներն անդրադարձել են տարածաշրջանային խնդիրներին, քննարկել երկկողմ հետաքրքրություն ներկայացնող այլ հարցեր:

Անդրադառնալով Լեռնային Ղարաբաղի հակամարտությանը` Արա Բաբլոյանը նշել է, որ հակամարտության խաղաղ կարգավորումն այլընտրանք չունի: Խորհրդարանի ղեկավարի խոսքերով` լինելով առաջին հերթին մարդու իրավունքների խնդիր` հակամարտությունը կարող է լուծվել միայն Արցախի ժողովրդի ազատ ինքնորոշման իրավունքի իրացման միջոցով: