Հանրապետական 4 պատգամավորները պետք է վայր դնեն իրենց մանդատները. Ալեն Սիմոնյան

«Կարծում եմ՝ այդ հայտարարության տրամաբանական շարունակությունը պետք է այն լինի, որ իրենք հեռանում են Ազգային Ժողովից և վայր են դնում իրենց մանդատները, որովհետև իրենց անձնական կարծիքը չի համընկնում ՀՀ ժողովրդի կարծիքի հետ»,- արձագանքելով ԱԺ Հանրապետական խմբակցության պատգամավորներ Միհրան Հակոբյանի, Կարեն Բեքարյանի, Արման Սաղաթելյանի և Սամվել Ֆարմանյանի կողմից երեկ տարածած հայտարարությանը՝ նշել է ԱԺ «Ելք» խմբակցության անդամ Ալեն Սիմոնյանը:

Հիշեցնենք, որ երեկ Հանրապետական խմբակցության 4 պատգամավորները հայտարարություն էին տարածել, որտեղ  մասնավորապես նշել էին, որ վարչապետ Փաշինյանը պատռում է բոլորի դիմակները՝ մեղադրելով վերջինիս ու նրա թիմակիցներին պատգամավոր «գողանալու» ու պատգամավորների վրա ճնշում գործադրելու մեջ: Հայտարարության հեղինակները վերջին երկու օրերին կատարվող զարգացումները ոչ իրավական և ոչ էլ բարոյական երևույթ են համարում՝ պնդելով, որ անզիջողականությունն ու բանակցելու ցանկության բացակայությունը հասունացնում է հասարակական ու մարդկային հարաբերությունների ճգնաժամի, չափազանց վտանգավոր հետևանքներով:

Պատգամավորները նաև հորդորել են գտնել արդար հանգուցալուծում, չինքնահաստատվել մյուսների արժանապատվության հաշվին, ինչպես նաև չզանգել իրենց, քանի որ իրենք չկան այս էժան խաղում:

Ալեն Սիմոնյանը SHANTNEWS.am-ի հետ զրույցում ընդգծել է, որ թե’ հայտարարությունը, թե՛ հայտարարություն անողներին դիտարկում է անլուրջ դաշտում, քանի որ թե՛ իր, թե՛ իր գործընկերների կողմից պատգամավորների նկատմամբ որևէ ճնշում ոչ միայն չի գործադրվել, այլև իրենք իրենց քայլերով երբեք չեն փորձել հասարակության մեջ լարվածություն սերմանել:

«Այսինքն՝ մենք գիշերով հավաքվում ենք Ազգային ժողովում և փորձում ենք ժողովրդի կամքին հակառակ որոշում կայացնել ու ժողովրդին դրանով բորբոքո՞ւմ ենք»,- հասարակության մեջ ճգնաժամ սերմանելու վերաբերյալ հարցին այսպես է պատասխանել Սիմոնյանը՝ ավելացնելով, որ իրենք ոչ թե լարման են տանում հասարակությանը, այլ փորձում կանգնեցնել ու մեղմել շատ երևույթներ:

«Արդյո՞ք մենք չենք այն իշխանությունը, որին անընդհատ մեղադրում են հակառակի մեջ, անընդհատ մեղադրում են, որ մենք կտրուկ քայլերի չենք գնում, անընդհատ մեղադրում են, որ մենք հայտնի կարկառուն, նախկին իշխանության գործչին բաց ենք թողնում կամ չենք բռնում կամ որևիցե նման բան:

Վերջիվերջո, մեր գործընկերները, ովքեր մեզ մեղադրում են, պետք է կողմնորոշվեն՝ հիմա մենք ճնշո՞ւմ ենք գործադրում, թե՞ այնուամենայնիվ այնքան թույլ ենք, ինչպես ասում է պարոն Շարմազանովը, որ մեկ-երկու «Նիվայի» վարորդ ենք պառկացնում գետնին: Պետք է կողմնորոշվել նախ և առաջ իրենց կուսակցության մեջ և իրարամերժ հայտարարություններ չանել»,- նշել է Ալեն Սիմոնյանը:

: